NAPOLI- BRUGGE (17.09.15E.L.) 5 - 0 ‘A VEDETTE ACCUSSÍ

NAPOLI- BRUGGE (17.09.15E.L.) 5 - 0 ‘A VEDETTE ACCUSSÍ Êv’ ‘a succedere! Primma o doppo êv’ ‘a succedere ca ‘o Napule facesse ‘o Napule e tturnasse a ddarece ‘a suddisfazziona ‘e vencere. E succedette ajere mmerz’ê ssette cu ll’estrèia (esordio) ‘nnAiuropa d’’o Napule ‘e Maurizio Sarri ca cu ‘a divisa luvarda (azzurra) êtt’ ‘a scennere ‘ncampo ô San Paolo senza ‘o tifo d’’e ddoje curve p’ ‘a sculifica arremmeriata pe bbia d’’o bburdello succieso pe Napule-Dnipro.Storta va deritta vène! ‘O Napule finalmente s’assicuraje ‘a primma nichessa (vittoria) d’’a tempurata (stagione) e se ll’assicuraje larga e sustanziosa truvannola contro ô Brugge, furmazziona belga ca me parette poca cosa pure si quacche pennarulo aveva scritto ‘e nunne uppetimarela (sottovalutarla) visto ca dint’a ll’edizziona precedente d’’a cumpetizziona era arrivata nsi’ ê quarte ‘e finale cedenno ô Dnipro, doppo d’essersene chiavate chianette.Ajere però non foveno nicessarie, ma finalmente [doppo ‘e tante bbuche ‘ncapo ca ogneduno ll’êva fatto] pe ll’accasione Sarri facette finalmente ‘a penzata bbona ‘e tené fora a mMaggio [ca oramaje s’êss’ ‘a chiammà Nuvembre] spustanno Hysaj a ddritta, ciové ô pizzo suojo naturale e mmettenno a mmancina a gGhoulammo, cu Koulibalý, Ggiorgigno e lLopezzo ca foveno ll’ati nnuvità! P’’a verità nun è ca se vedette ‘nu Napule nuovo, ma sulo jucature ca finalmente e ppe ffurtuna fessarie nun ne facetteno e n’avverzario abburdabbile pe ccuje mo ô primmo ca êsse ‘a dicere ca ajere s’ accumminciaje a vvedé ‘a mana ‘e Sarri, lle levo ‘o saluto i ‘o piglio a ccucchiere ‘affitto! Passammo ê ppaggelle: REINA 6 Durante ô primmo ajone (primo tempo) se facette apprezzà soprattutto pe cquacche llanzo luongo e ppriciso direttamente dint’â mità ccampo d’’o Brugge,ma difenzivamente fove poco ‘mplicato (coinvolto)visto ca overamente ll'unnece belga nun le dette penziero e ssulo ‘na vota pe sfarma (colpa) ‘e Koulibalý [ca nun se facette ‘e cacchie suoje e gghiette a ddàrele fastidio] fallette, ma senza cuzequenzie, n’asciuta ‘e punio. HYSAJ 6 Turnato finalmente ‘ncopp’â fascia d’appartenenza soja,mettette ‘a musarola a cchillu tale Bolingoli-Mbombo ca se facette nutà cchiú pe cchillu nomme ‘a gheliugrafia (cartone animato) ca pe ato, accussí ll’albanese avette pure ll’aggio d’appressurà (spingere) i ‘o ffacette cchiú ‘e Ghoulammo. ALBIOL 6 Finalmente n’atalossa (prestazione) senza sfregazze (sbavature). P’’a verità Sarri nn’aveva chiaramente pigliato ‘e ddifese ‘ncunferenzia stampa, ma sinceramente ajeressera ‘o spagnuolo nunn’êtte ‘affruntà gruossi pericule visto ca Leandro Pereira cchiú ca nu centrattacco me dètte ‘a ‘mpressione d’essere ‘nu curdisco (agnello)cu ‘a cora ‘mmiez’ê ccosce! KOULIBALY 7 N’atalossa (prestazione) diapresa (sontuosa) ‘a soja andivinanno, fora ca ‘na vota[quanno, pe ffurtuna senza cunsequenzie, jette a rrompere ‘o saciccio a rReina], tutt’ ‘e muvimente, casa ca lle permettette ‘e cuntrullà a dDiaby e a lLeandro Pereira quanno capitajeno dê pparte soje e d’ascí pure palla ô pere. GHOULAM 6- ‘E ‘ncuraggiamento visto ca facette cchiú ppoco ‘e chello ch’êss’ avuto ‘a fà, accuntentannose ‘e mantené ‘a pusizziona senza appressurà (spingere); i accussí p’isso ll’antraffa (partita) fove cchiú ca ato n’allenamento pe ttruvà cundizziona e cunfianza (fiducia) ‘nvista d’’e prossime antraffe (partite) DAVID LÓPEZ 5,5 Miezu punto mancante pecché quanno ‘o Pipita lle servette ‘nu signore pallone ‘a mettere ‘mporta isso sbagliaje tutto! P’ ‘o riesto ‘o solito fullè (match) ‘e quantità pecché ‘a qualità, purtroppo, nun è proprio articulo suojo! JORGINHO 6,5 Premio pecché dô pere suojo ‘e dritta partette ‘o pallone ca Cagliecònno fravecaje ‘mporta dâ curzia ‘e dritta, e ppecché‘ncopp’â timmurría (punizione) centrale sempe dô pere suojo ‘e dritta partette chillu zuccaro ‘e cucchiaro ca addivintaje ‘o siconno stuco (gol) ‘e Mertens; p’’o riesto ‘a ‘mpressione però fove ca nun ghiucasse maje ‘e primma e fósse troppo rilassato, cosa ca forze avastaje contr’ô Brugge, ma ca nun saccio si po’ avastà ‘ncampiunato addó ‘a cchiú ffessa scuatra è mmeno crucifera d’’e bbelge! HAMSIK 6,5 S’êtt’ ‘a movere assaje ‘mmiez’ô campo comme privisto d’’o 4-3-3 e mMarekiaro facette chello ch’êva ‘a fà allarganno ‘o juoco quanno putette. Po’ s’arricurdaje pure d’essere ‘na mezz'ala, e cercaje ‘e ‘nzerirese nsi’ a cche ô pprincipio ‘e ll’arrancua (all'inizio della ripresa) ll’arrivaje ‘a suddisfazziona perzunale d’’o stuco (gol). (Dô 62° ALLAN 6 Sulo ‘na mez’ora, ma justo pe ddimustrà ‘e nun essere ‘nu pacco e ppe ffarce reggistrà ‘na bbell’ ajuda (assist) p’’o pere ‘e Cagliecònno,ca mettette a ffrutto ‘o pallone!) CALLEJON 7 P’’a verità De Bocko lle lassaje troppu spazzio, Bolatto se pusizzionaje a ccapa ‘e saciccio e accussí don Cosè mettette ‘mporta ‘a dritta cu ‘nu tiro a effetto truvanno ‘nu granne stuco(gol) cercato e nno truvato pe scagno comme dicetteno tanti pennarule ca nun capisceno ‘nu cacchio ‘e pallone. P’ ‘o riesto ll’atalossa (prestazione) ‘e don Cosè da esterno e non ‘a siconno artigliero (punta) fove cunvincente assaje, cu ttanti infanise (aspetti) pusitive pecché don Cosè affunnaje comme vulette ‘ncopp’â curzia ‘e dritta cruzzanno (crossando) a zzuco ‘e caramelle pe Mmertenso ca facette ‘o doje a zzero. Comme si nun avastasse cumpletaje ll’opera mettenno ‘mporta, p’’o cinche a zzero, ll’ ajuda (assist) d’Allanno HIGUAIN 6- Me dispiace ‘e nun puterle mettere ‘e cchiú, ma doppo d’esserse fatto ‘nu mazzo tanto currenno a vvacante senza ca ‘e cumpagne lle desseno ‘na palla decente, quanno finalmente ll’avette se facette fermà dô purtiere ‘o primmo tentativo e ‘ncopp’ô rimbalzo, ‘mmece ‘e trasí cu ttutt’’a palla ‘mporta, ‘a depositaje ‘ncopp’ô palo. Che ppeccato! So’ ccose ca ‘nu campione nunn’ à dda fà! (Dô 71° GABBIADINI sv). MERTENS 7,5 Dduje stuche (gol) e n’ajuda (assist) ‘ncapo ‘e ‘na cinquantina ‘e minute: sí, va bbuó ‘o Brugge nun fove pe nniente acatamato (irresistibile) ma ch’ ato êv’ ‘a fà Driesso: ‘nu taglio ‘a cca, n’ajuda (assist) ‘a lla e ssempe cu ccegna (grinta)e ‘nteliggenza: atalossa (prestazione) da applavuse! (Dô 75° INSIGNE sv). ALL. SARRI 6+ - Ajeressera pruvaje p’’a primma vota dô pprincipio ‘o 4-3-3 i ‘o risultato fove subbeto pusitivo pure pecché Bolatto & ssocie ce detteno súbbeto ‘na mana i cumplessivamente ‘o Brugge ‘e Preud'Homme ggià durante ô primmo ajone(primo tempo) se squagliaje , pruvanno sí e nno tantella ‘e riazziona, ma nun capitalizzaje niente cusicché ‘o Napule riuscette a allungarese ‘ncopp’ê ccurzie allarganno ‘o juoco e truvanno spazzio cu Mertenso e Cagliecònno, mentre a ccentrocampo, pure si cu bradúteta (lentezza), Ggiorgigno faceva ‘o vallo ‘ncopp’â mmunnezza. E bbasta accussí;ll’estreglia (debutto) ‘nnAiropa meglio ‘e accussí nun putette jí. Ringrazziammo ô Cielo e nun ce scurdammo ca ‘o risultato rutunno e ll’atalossa (prestazione) generale ànn’ ‘a serví no pe ce vallià inutilmente, ma pe ffarece cunquistà chella cunfianza (fiducia) nicessaria pe sbluccarece e ppe ffarece guardà ô ffuturo cu ‘a cunvinzione ‘e puté cunquistà chillu digno posto ca cumpete â scuatra luvarda (azzurra). Accussí speranno ve dongo appuntamento si dDi’ vo’ a llennerí ca vene doppo ll’antraffa (partita) casalinca ‘e dummeneca a ssera cu ‘a Lazzio ca ce à dda dà ‘a cunferma ‘e chello fatto ajere. Staveti bbe’! R.Bracale Brak