NAPOLI – LAZIO (20/09/15) 5 A 0 ‘A VEDETTE ACCUSSÍ

NAPOLI – LAZIO (20/09/15) 5 A 0 ‘A VEDETTE ACCUSSÍ Tengo ‘o core dint’ô zzuccaro, guagliú! Ajeressera ô san Paolo,pure si annante a ppoca ggente [ca ce aveva creduto] , ‘e cuane cundetteno ‘o bbisso ‘e ggioverí passato e doppo d’’e ccinche purpette date ô Brugge, ajeressera detteno cinche sfugliatelle ricce â scuatra d’’o pappavallo ‘e lotito e de chillu sbruffone ‘e Pioli ca aveva ditto ch’ erano venute pe vvencere, addó se ne turnajeno malamente paccariate visto ca ‘o Napule se levaje dâ faccia ‘o scuorno d’’a scunfitta ca â tempurata (stagione) passata ll’era custato caro e amaro. E cce vuleva, ce vuleva proprio ‘a nichèmata (vittoria) sunante d’ajeressera ca dètte cuntinuità a cchella ‘e ggioverí passato ‘nn’ E.L. e ddètte ‘na risposta a cquacche mala lengua ca ggià musechiava e mmazzecava malamente visto ca doppo tre gghiurnate ‘ncrassifica ‘o Napule teneva sulo dduje punte, frutto ‘e ‘na scunfitta e dduje paregge. E ffove risposta larga, cauzante e cunvincente e nun fa niente si chilli quatte zappielle d’’a Lazzio nun foveno cacchie ‘e metterce ‘mpenziero e ‘ncampo ce fove sulo ‘na scuatra: ‘o Ciuccio! Nun mettimmoce a ccercà ‘o pilo ‘int’a ll’uovo! Era ‘mpurtante véncere assicurannose ‘a primma nichèmata (vittoria)’ncampiunato e arrivaje! ‘O Napule vincette e vvincette bbuono e addirittura sabrasanno.Passammo ê ppaggelle: REINA 7,5 Miezu punto ‘e cchiú p’’alleria ca dimustraje alluccanno e zumpanno comme a ‘na scigna ògne vvota ca ‘o Napule signaje; è overo ca ll'unica parata ll’êtt’ ‘a fà ô finale ascenno ‘ncopp’ê piere ‘e Keità e pp’’o riesto se guardaje ll’antraffa (partita) a gratisse, ma uno comme a pPepe te mette sicurezza e tranquillità e ss’ammereta sette ‘e partenza. HYSAJ 7 Miso ancòra ‘na vota ô pizzo suojo juosto, ciovè a ddritta nun sbagliaje niente e sse dimustraje attiento a ll’epata difenziva (in fase difensiva) e particularmente prisente quanno se trattaje d’appressurà (spingere) chiammannose ll’applavuso d’’o san Paolo cu n’atalossa caritiva (prestazione generosa). Raul ALBIOL 6,5 Antraffa (partita) tranquilla p’’o spagnuolo ca sulo ‘na vota ô finale se facette piglià ‘ntassezza (in velocità) ‘a Keità e rReina c’êtt’ ‘a mettere ‘na pezza! KOULIBALY 7 Ancòra ‘na cunvincente atalossa (prestazione) d’’o francese ca nun sbagliaje niente e ppartecipaje pur’isso ô ggiro ‘e palla cu ccalma e pricisione; s’êsse pututo però sparagnà ‘na paraínesa (ammonizione)proprio fessa.. GHOULAM 6 Antraffa (partita) accorta ‘e ll’algerino ca se cuntentaje ‘e restà ‘e guardia ô bbidone a mmancina senza appressurà (spingere).Menu male ca da ll’ata parte ce penzaje a ffarelo Hysaj. ALLAN 7,5 Dètte cunferma ca tanto spienne, tanto vale: pere vellutato comme dimustraje cu ll’ajuda (assist) pe gGabbiadini, micidiale pe ccomme se sapette ‘nzerí, amílicco (implacabile) comme culaturo (filtro) e ssiconno stuco (gol) cunzecutivo cu ‘a maglia luvarda (azzurra) cosa niente male pe uno ca ‘e mestiere nun fa esattamente ll’artigliero (punta). JORGINHO 7 Assaje migliurato a ppietto d’’a tempurata passata (stagione scorsa), ajere curiarcaje (dominò) ‘o centrocampo e sse facette truvà sempe libbero p’’o passaggio d’’e cumpagne nun sbaglianno maje ‘nu pustirizzo (appoggio) e mettenno ordine ‘mmiez’ô campo. HAMSIK 6.5 Confermaje ‘e truvarse bbuono a ffà ‘a mezzala senza l'assillo criativo d’’o trecquartista. (dô 60° LOPEZ 6 Trasette senza preoccupazzione o prubbleme quanno ‘e juoche erano bbelle e ffatte e ll’avverzario era oramaje ‘nu fantasema .) CALLEJON 6 - Atalossa (prestazione) poco spettaculare, ma utile. Cu Hysaj e Allan(no) furmaje ‘nu bbellu triangulo a dritta. Êsse pututo pur’isso partecipà ô festivallo d’’e stuche (gol)si D’Amato nun êsse siscato a ddispietto quacche siconno primma ‘a terma (fine) proprio mentre ‘o spagnuolo jeva a ccunchiudere. HIGUAIN 9 - È dde n’atu pianeta. ‘A granna delusione ‘e maggio passato fove definitivamente scurdata cu dduje stuche (gol) fatte e n’ato unuicàto (propiziato) senza scurdarce tutt’’a fatica fatta spaventanno tutt’ ‘a tràsera (retroguardia) avverzaria. Ascette ‘nfra ll’applavuso d’’o san Paolo. (dô 65° GABBIADINI 6,5 Trasette e ccercaje ‘o stuco (gol) truvannolo cu n’isaguggio [inserimento]centrale conchiuso cu n’ affo [tocco] doce doce ê spalle ‘e Marchetti) INSIGNE 8 - Rispunnette a ll’atalossa (prestazione) ‘e di Mertenso contro ô Brugge cupiannolo a ccarta-gravone cu scatte,protobbullíe (iniziative), cagne ‘e direzzione, ajude (assist) a zzuco ‘e caramella comme a cchillo ca mannaje Allanno ‘mporta e facennose truvà ô posto justo, ô mumento justo a mmettere dinto ‘o terzo stuco (gol). Tutto summato ‘e cchiú nun êsse pututo fà! (dô 74° EL KADDOURI s.v.) All. Maurizio SARRI 7 ‘Ncarraje ‘a furmazziona i ‘a scuatra vincette e cunvincette; se vedette ca ‘o passaggio ô 4-3-3, evidentemente è ‘o motulo cchiú adatto p’’e caratteristiche d’’e jucature ca tène. arbitro DAMATO 4,5 Vecchia carta canusciuta st’avvocato ‘e Barletta(e ccomme a ppugliese quase certamente tifoso juventino) è ‘nu chiafeo, fúceto e sciacqualattuca(incapace) e ati vvote addirittura vennuto!Turnato a diriggere ‘o Napule doppo paricchiu tiempe dê ‘nguacchie fatte precedentemente ‘ndanno d’ ‘o Napule, tentaje ‘e tutto pe dà fastidio ê cuane e se mettette pe ‘mmiez’ê piere d’ ‘e napulitane custrette a scartà primma a isso e ppo ê jucature lazziale e nun vedette ‘o juoco viulento e ppruvucatorio d’ ‘e delinquente ‘e Pioli, ausaje dduje pise e ddoje mesure valutanno ‘e falte (falli) ad capocchiam e spisso ô ccuntrario e ssempe ndanno d’ ‘o Napule e sparagnaje cchiú ‘e ‘nu cartellino jalizzo (giallo) ê lazziale; ma ‘a ‘nfamità cchiú grossa ‘a facette siscanno quacche siconno primma ‘a terma (fine) proprio mentre Cagliecònno jeva a ccunchiudere p’’o pussibbile seje a zzero! E‘nchiudimmola cca ringrazzianno ‘sti guagliune p’ avé vinciuto n’antraffa(partita) ‘mpurtante! Forza Napule, Ciuccio fa’ tu e mmiercurí a ssera jenno a mModena contr’ô Carpi,facce sunnà! S i dDi’ vo’ ce sentimmo. R. Bracale Brak