NAPOLI – JUVENTUS (26/09/15) 2 A 1 ‘A VEDETTE ACCUSSÍ

NAPOLI – JUVENTUS (26/09/15) 2 A 1 ‘A VEDETTE ACCUSSÍ Biancale, fuja-fuje, trezziole e bbotte a mmuro guagliú!Ajeressera ô san Paolo avette raggiona d’’a vecchia zoccola janca e nnera cu ttutto ca ‘ntribbuna ce steveno troppi cestarielle accumincianno ‘a ggiggino uocchie-stuorte, nedveddo, agnelli, antonio conte i ‘a jatta morta soja, ma ca però chiú ‘e sicciarce a Insigne e ffarlo fa male nun putetteno; ‘o Napule vincette e cunvincette pure si ‘a nichèmata (vittoria) fove stretta e cachettica (striminzita) addó s’êsse pututo vencere cchiú llargo e ssenza arrubbà niente e soprattutto se fósse pututo farlo mantenenno ‘a porta acrata (inviolata), ‘mmece ‘e piglià ‘nu stuco(gol) fesso e ‘mpruvviso.Passammo ê ppaggelle: REINA 7 Temmelíodiso (fondamentale)! Soprattutto p’’a passiona ca ce mette essenno quase ‘na specie ‘e capo-ultrà cu ‘e guante. Ajeressera se facette apprezzà súbbeto doppo nemmeno ‘nu quarto d'ora, quanno appurrettaje (respinse) ‘nu diacunale maligno ‘e Zaza. ‘Nu capolavoro po quanno fermaje a zZaza trasuto dint’â camma piccerella, ma nun putette farce quase niente ‘ncopp’ô stuco (gol) ‘e Leminà accumparuto â ‘ntrasatta comme a ‘nu fantasema! HYSAJ 6,5 – Pure quanno se truvaje ‘ndifficultà gestiunaje (gestí) a mmestiere ‘o pallone e nunn’ ‘o sprecaje quase maje; a ll’epata difenziva (in fase difensiva) se dètte ‘a fà contr’ô fisico ‘e Pogbà [sempe cchiú cavallo ‘e Bellomunno e ffiglio ‘e coperativa], e ddê cuntraste spisso ascette nechítiso (vincitore)! ALBIOL 6 - Solo ‘na vota Zaza s’’o facette accelleranno, ma pe ffurtuna Reina ce mettette ‘na pezza appurrettanno (respingendo). P’’o riesto nun sufferette cchiú ‘e tanto. KOULIBALY 6,5 ‘O fisico atletico d’’o francese lle permettette d’ascí nechítiso (vincitore) dô dessaffío (sfida) cu Dybala, pure si ‘na vota o ddoje perdette ‘a cuncentrazzione, ma senza cunsequenzie. GHOULAM 5,5 ‘Na surpesa pe ccomme ‘o truvaje migliurato a ll’epata difenziva (in fase difensiva) addó se ll’êtt’ ‘a vedé cu ‘o fisico ‘e Leminà. Peccato però ca proprio ll’algerino se perdette ô francese dint’a ll’azziona ‘mbrugliata d’ ‘o stuco(gol) juventino! ALLAN 7,5 Atalossa dignificata ( prestazione maestosa) d’ ‘o brasiliano ca facette sentí ‘a presenzia soja a ttutto campo luttanno spalla a spalla cu ‘e mediani savujarde e cuntrastannole sempe pure quanno cercajeno ‘a porta. JORGINHO 7 Turnato a cuntrullà ‘o centrocampo,quanno ‘o Napule fove ‘mpussesso ‘e palla, chesta passaje sempe p’’e piere suoje e, a pparte unu pasiglio (un sol passaggio) sbagliato, ll’antraffa (gara) soja fove sustanzialmente acabata (perfetta).’E chistu passo pare ca Valdifiori è destinato a scarfà ‘a panca.E chi sa si ‘o pappone n’ è ccuntento! HAMSIK 6,5 Cu ll’atalossa (prestazione) soja sundizzaje (abbinò) qualità e cquantità fatte faticanno pulitelicamente (lavorando preziosamente) a centrocampo e, asciuto Insigne, ‘nfilannose dint’ê spazzie ca lle s’arapetteno. (Da ll'80° DAVID LÓPEZ 6 - Sarri ‘o menaje dinto pe rinfurzà ‘o centrocampo ô mumento d’’o finale travulgente e isso nun se perdette nè a zZazzà, nè a nnisciun’ ato!) INSIGNE 7,5 Atalossa (prestazione) assaje pusitiva ‘a soja sott’a ll’uocchie ‘e chillu cestariello ‘e Conte,ca magnannose ‘a jatta morta ca porta ‘ncapo fove custretto a apprezzà ‘o stuco(gol) d’’o frattese ca cupulianno (duettando) cu ‘o Pipita, mettette ‘a palla lla addó bbuffonno pe cquanto se stennesse, nun ce arrivaje.Peccato ch’êtt’ ‘a mullà primma d’’o tiempo pe nun saccio qua’ ‘mpiccio a pparte dritta. Che sfurtuna! (Dô 39° MERTENS 5 M’êsse aspettato assaje ‘e cchiú ‘a ll’arillo belga ca partette largo ‘ncopp’â fascia e avette ‘ncopp’ô pere ‘nu pallone ca sprecaje mannannolo a sfresà (sfiorare) ‘o palo quase ô scuppò (termine) d’’o primmo ajone (tempo); a ll’arrancua (nel secondo tempo) aizaje porvera ‘ncapunennose cu quacche antupisíaco (dribbling) inutile addó êsse pututo gestiunà [gestire] meglio ‘a facenna). HIGUAIN 9 È dde n’atu pianeta; sserata maravigliosa pe ll’argentino ca cupulianno (duettando) cu Insigne lle furnette ‘na palla d’oro, chella ‘e ll’uno a zzero.P’ ‘o riesto nun mullaje maje ‘nu pallone, pruvannose a essere sempe utile â scuatrra mo ‘e sponna e mmo cu ‘nu lanzo ‘e primma e mmettette ‘a curnicia a ll’atalossa (prestazione) soja apprimma facenno ‘e pprove ô 60° cu ‘nu tiro ‘e dritta ca spaventaje a bbuffonno custretto a mmetterce ‘e punie e súbbeto doppo pigliannose ‘a scena, ‘o pallone i ‘a porta cu ‘na cagliosa mancina e spaventosa ca chiejaje ‘a mana d’’o purtiere .(Da ll'84° GABBIADINI sv). CALLEJON 6 Se muvette assaje, ma ‘o seje lle spetta cchiú ca ato ‘e stima e ppe premio pe ccomme fove dispunibbile a sacrificarese ajutanno a sHysaj come si fósse ‘nu frato! all. SARRI 6,5 ‘Na granna atalossa (prestazione) d’ ‘a scuatra soja ch’êsse pure pututo, comme aggiu ditto, vencere cchiú largo e mantenenno ‘a porta acrata (inviolata); pacienza; se ne parla n’ata vota pecché doppo d’avé vinciuto contro a n’avverzario ncrifato, mo se po’ gguardà ô ffuturo cu cchiú cunfianza (fiducia). Allimmeno accussí sperammo. arbitro ORSATO 4 Comme ve dicette ‘a vota passata, nun parlo cchiú ‘e ll’arbitre, pure pecché aggiu fernuto ‘a scorta d’ ‘e chillèmmuorte, nun tengo vaffanculo ‘e spicce e cchiú ‘ngenerale ati maleparole... Mecco sulo ‘o voto e crediteme! E ccu cchesto ve saluto e ssi dDi’ vo’ ce sentimmo â prossima vota, ca mo comme a mmo nun saccio quann’è. Staveti bbe’ RaffaeleBracale Brak