EMPOLI – NAPOLI ( 13/09/15) 2 A 2 ‘A VEDETTE ACCUSSÍ

EMPOLI – NAPOLI ( 13/09/15) 2 A 2 ‘A VEDETTE ACCUSSÍ Tengo ‘o bbeleno nfi’ a ‘mpont’ô musso e ancòra nun ce pozzo credere ca ajere all’ora d’’o diggestivo a Empoli ‘o Napule nun riuscette a vvencere e ffove custretto pe ddoje vote a ccorrere appriesso ô risultato i ô finale s’êtte accuntentà ‘e appena ‘e ‘nu punto, cosicché doppo tre gghiurnate ‘e campiunato ‘ncrassifica tenimmo sulo dduje punte ô pizzo d’’e nove ca me fósse aspettato! C’è ppoco ‘a fà; me dispiace d’’o ddicere ‘na aggio ‘a ‘mpressione ca pure chesta vene a essere n’ ata tempurata (stagione) ‘e sufferenzia e ppenzo ca, p’’o mumento ‘stu Sarri nun me pare ‘o trainèrro ca ce po’ fà sunnà ‘nu bbellu suonno. Ajere,allimmeno pe ttutto ‘o primmo ajone (tempo) me parette ca ll’Empoli êsse pututo fà chello ca vuleva mentre ‘e cuane (azzurri) scise ‘ncampo cu ‘a divisa sango ‘e pimmice, arrancaveno malamente. E cche saciccio! I è overo ca ajere ‘o Napule êtte ‘a jucà nun sulo contro a ll’Empoli, ma pure contr’ a cchella granna mmunnezza ‘e banti e d’’a chenca soja, ma cu ‘nu poco cchiú d’attenziona arreto e cchiú ccegna (grinta) annante s’êsse pututo fà ‘e cchiú. ‘Mmece chi t’’o ddà? Arreto cu mMaggio e Albiollo ca faceveno fessarie, e annante cu ssulo Lorenzigno ca faceva coccosa e ccu Marekiaro, ‘o Pipita e gGabbiadini ca aizavano porvere nun fove ‘nu bbellu vedé e êttem’’a ringrazzià ‘o Cielo si apprimma cu Llorenzigno e ppo cu Allan(no) riuscettemo a acchiappà ‘o risultato e nun turnajemo mazziate. Certo ‘e duje stuche ‘e ll’Empoli foveno tutt’ e dduje irreculare..., ma ‘o Napule, si è ‘o Napule e nno ‘na pruvinciala, nun s’à dda attaccà ê ffelinie ‘e n’ arbitraggio fetente,à dda fà isso ll’antraffa (partita), mettenno paura a ll’avverzario e nno facennose spaventà! Passammo ê ppaggelle: REINA 6: Nun putette fà niente ‘ncopp’ê stuche ‘e ll’Empoli; ascette n fi’â trecquarte pe llanzà ‘e suoje e ppo nun êtte fà nient’ato. . MAGGIO 4,5: Jucatore arrivato ô capolinia; m’addimanno pecché ancòra ‘o fanno jucà. ‘Ncopp’ô primmo stuco (gol) ‘e ll’Empoli nun riuscette a ss’allinià cu ‘e cumpagne ‘e sezziona (reparto) lassanno ‘nghiuoco a sSaponara. Chelli rrari vvote ca pruvaje a accumpagnà ll’azziona sballaje sempe ‘e cruzze (cross). Dô lato suojo, cu Ssaponara ca però se purtaje ‘a palla annante cu ‘na mana[senza ca Banti i ‘a chenca soja cecasseno a vvedé], nascette pure ‘o stuco (gol) d’’o doje a uno. ALBIOL 4.5: Nun ce pozzo credere, ma pure ajere dimustraje ‘e nun tené nè ccazzimma nè presenzia ‘e spirito, facennose fotterre pe ddoje vote ‘a Saponara. ‘Ncopp’ô primmo stuco (gol) ‘e ll’Empoli ’nu difenzore, campione d’’o munno, nun po’ permettere ô primmo sapunaro ca se trova ‘e passaggio ‘e fà trenta metre ‘e campo senza cuntrastarlo o senza menarlo ‘nterra primma ca trase dinto â camma (area) ‘e ricore. CHIRICHES 5: Che peccato! Fósse stato ‘o meglio lla ddereto si ‘nnaccasione d’’o siconno stuco (gol) nun avesse sciveto ‘e jí nchiusura lassanno a pPucciarelli sulo.So’ ccose ca nun se fanno! HYSAJ 5: Nun capisco pecché Sarri ‘nziste a ffarlo jucà a mmancina addó è ‘nu pesce for’ acqua; cumminfatti fove tardiva ‘a diacunale soja ‘ncopp’a pPucciarelli ‘nnaccasione d’ ‘o doje a uno. ALLAN 6: Premio p’’o stuco d’’o pareggio, ma cumplessivamente nun riuscette nè a difennere, nè a attaccà a mmestiere. Forze à dda ancòra trasí ‘nforma, ma nun vulesse ca ll’Udinese c’ êsse fatto ‘nu pacco! VALDIFIORI 5: Urtizzaje (verticalizzò) poco e nnun riuscette maje a ppiglià p’’a mana ‘a scuatra. [Dô 59° JORGINHO 5:Justo ‘o tiempo d’abbuscarese ‘nu cartellino jalizzo (giallo) senza maje epitemmà (incidere) ‘ncopp’ô fullè (match)] HAMSIK 5,5: Se decidette a ffà coccosa sulo a ll’arrancua (ripresa) doppo ‘nu primmo ajone (tempo) assaje deludente. Troppo poco! INSIGNE 6,5: Facette a mmestiere ‘a plantiglia (ruolo)ca ll’accumencia a ppiacé assaje e truvaje ‘nu stuco (gol) ca fove ‘nu capolaloro; peccato però ca ne sbagliaje n’ato assaje cchiú ffacile. [Dô 72° CALLEJON 4,5: Trasette, ma fove comme si nun fósse trasuto; nun accucchiaje ‘o riesto ‘e niente, risultanno mituico (estraneo) â scuatra.] GABBIADINI 6:Premio pe Il’ajuda (assist) d’’o pareggio d’Allanno. A surpresa scenette ‘ncampo titulare dô primmo minuto; trasette dint’a ll’azzione d’ ‘o stuco (gol) ‘e Lorenzigno, ma a ll’arrancua (ripresa) perdette ‘na granna accasione nun cuntrullanno ‘o pallone a ttu ppe ttu cu sSkorupski.’A meglia cosa ‘a facette vedé appunto cu Il’ajuda (assist) p’’o pareggio d’ Allan(no). Avesse avuto fà ‘e cchiú! [Dô 65° MERTENS 5,5: Pruvaje a mmettere ‘nu poco ‘e pepe a ll’antraffa (partita), ma nun ce riuscette.] HIGUAIN 5: Jurnata no pe ll’argentino ca fove poco presente dint’ô juoco luvardo (azzurro). Pacienza; po’ ccapità pure a ‘nu campione! ALL. SARRI 5: ‘A ‘mpressiona fove ca ‘o Napule se regge ‘ncopp’ê suliste senza tené ‘na vera idea ‘e juoco ‘e scuatra; ‘a trasera (difesa) addó ce sta sempe quacche elemento ca nun dà cunfianza (fiducia), fa ancòra troppa acqua. Nun è ccuncepibbile ca doppo tre antraffe (partite)’o Napule ggià tene seje stuche (gol) a ll’uciuso(passivo)! arbitro BANTI 3: granna mmunnezza isso e ttutta ‘a chenca soja. Siscaje ad capocchiam e ssempe contro ê cuane (azzurri) e ccunvalidaje ‘e duje stuche (gol) ‘e ll’Empoli, tutt’e dduje ca nun foveno reculare: ‘o primmo pecché nascette ‘a ‘na rimessa laterale ca fósse tuccata ê cuane (azzurri) e isso assignaje ê tuscane, ‘o siconno pecché chiaramente Saponara se purtaje ‘a palla annante cu ‘na mana e nnè isso, nè ‘a chenca soja se n’addunajeno. Ma i’ me ll’êsse ‘a piglià nun tanto cu isso, ma cu cchi ‘o disignaje pecché nun è ccurretto mannà ‘nu livurnese a arbitrà ‘na scuatra tuscana! Ma ‘nnitaglia purtroppo succede chesto e ato! E cu cchesto ve saluto e si ‘o Signore ‘o vvo’ ce sentimmo viernarí ca vene, speranno ca ggiovedí a ssera ô san Paolo, pe ll’antraffa(partita) d’ E.L. , ‘e cuane(azzurri) ce facesseno ‘o piacere ‘e riuscí finalmente a vvencere. Staveti bbe’! R.Bracale Brak