FROSINONE – NAPOLI (10/01/16) 1 A 5

FROSINONE – NAPOLI (10/01/16) 1 A 5 ‘A VEDETTE ACCUSSÍ Biancale, fuja-fuje, trezziole e bbotte a mmuro, guagliú e coppola ê ddenocchie! ‘O Napule, cu ‘a sustanziosa nichemata (vittoria) cunquistata ajere a ll’ora d’’a tiella ‘ncopp’ô campo d’’o Frusinone se chirraje (laureò) campione ‘e vierno d’’o campiunato, piazzannose a 41 punte ‘ncimm’â crassifica. Ora mo quaccheduno me po’ ddicere ca ‘sta cosa d’essere campiune ‘e vierno nun conta niente e ca ‘e cunte se fanno sott’ô lampione… Nun dico ‘e no,ma nisciuno me po’ ‘mpedí ‘e cunziderà ‘stu fatto ‘nu bbuonu efudío (auspicio) p’’a nichemata (vittoria) finale. Accussí sperammo!Soprattutto pecché, ‘o Napule visto ajere se dimustraje digno d’’a nichemata (vittoria) finale, senza scurdarce ca ô 1989/1990, anno d’’o siconno scutetto ‘o Napule fove campione ‘e vierno. E accussí sperammo ancòra â faccia d’’e ssecce, d’’e cestarielle e dde chi ce vo’ male!Ma turnammo a ajere e veddimmo ‘e ppaggelle: REINA 6 Nun putette fà niente ‘ncopp’ô stuco (gol) ‘e Sammarco e p’’o riesto nun fove chiammato a ffà nisciuno straurdinario. HYSAJ 6,5 S’abbuscaje ‘nu justo cartellino jalizzo (giallo) ca s’êsse pututo sparagnà, ma cumplessivamente ‘a soja fove n’atalossa d’epipeto ( prestazione di livello) nun cuncedenno spazzio dâ curzia soja e prupunennose cu cqualità. ALBIOL 7 Soprattutto pecché sbluccaje ‘o fullè (match) facennose truvà, e nunn’era semplice, ô posto justo, ô mumento justo ‘nnant’ô sicono palo.P’’o riesto cunfermaje ‘e ppusitive atalosse (prestazioni) ‘e ll’urdimi mise lassanno poco o niente a ll’attaccante d’ ‘o Frosinone. KOULIBALY 6,5 - Miezu zifo (voto)mancante p’avé lassato libbero a sSammarco; p’’o riesto bbona atalossa (prestazione) d’’o francese ca doppo d’’e tre centrocampiste cuane (azzurri) fove chillo ca gghiucaje ‘na cifra ‘e pallune e ttutte d’epipeto (livello), garantenno ô Napule ‘o plantamiento (impostazione) nicessario. STRINIC 7 – Miso ô posto Ghoulammo, se cunfermaje jucatore sistimato e priciso, addirittura cchiú ppulito ‘e ll'algerino. ALLAN 7 - Riturnato titulare assicuraje n’atalossa (prestazione) ‘e qualità e cquantità dint’ a ttutt’ ‘e ddoje ll’epate (fasi), sempe ‘nmuvimento, pronto a ffà sponna a gGiorgino e a mMarekiaro. JORGINHO 7 – Rientrato doppo d’’o turno ‘e scualifica se repigliaje ‘a riggia d’’a scuatra, jucanno ‘e primma e cercanno spisso ‘o varco centrale, cu ‘na cifra ‘e pallune ca passajeno p’’e piede suoje. HAMSIK 7,5 Cunfermaje d’essere jucatore muddado(determinante) a ttutto campo e sse levaje pure ‘o sfizzio ‘e signà cu ‘na granna prugressione. (dô 77'CHALOBAH 6 ‘e stima). CALLEJON 6,5 Manco ajere truvaje ‘o stuco(gol) ,ma se dimustraje ‘o solito jucatore inteliggente e nnicessario cu bbelli ghiucate, facenno girà palla cu cqualità pure dint’ô stritto. (dô 74’ EL KADDOURI sv -). HIGUAIN 9+ - ‘Nu fenomeno; mannaje ô manicomio ‘a trasera (difesa) d’’o Frosinone, procurannose e ppo mettenno dinto ‘o ricore d’’o doje a zzero, comme me piace a mme: cu ‘na cagliosa centrale e ppricisa.Nun cuntento mettette ‘a firma sott’ô quatto a zzero bevennose meza trasera (difesa) e lassanno senza parole ll’avverzarie tanto ca ascette chiammannose ll’applavuso pure d’’e tifuse d’’o Frosinone! (dô 64’ GABBIADINI 7 Trasette e ssubbeto truvaje ‘o stuco (go)l cu ‘nu tiro ‘e mancina ca levaje ‘a porvere sott’ô sette.Se mmeretasse ‘e jucà ‘e cchiú, ma se joca cu unnice perzone e à dda restà fora!) MERTENS 6,5 - Nun truvaje ‘o stuco (gol), tiranno a llato cchiú de ‘na vota, ma l’atolossa (prestazione) soja fove assulutamente pusitiva, mettenno sistematicamente scumpiglio ‘ncopp’â curzia ‘e mancina quanno ‘a mubbara (partita) ô pprincipio parette bluccata. Sarri 9 S’à dda sulo ringrazziarlo p’avé purtato ‘o Napule ‘ncimm’â crassifica d’’o campiunato i a essere campione ‘e vierno cu ‘nu percorzo ca p’’o mumento è straurdinario.E vvoglio essere ‘o primmo, facennole ll'avucurie 'e cumplianne, a rricunoscere ca à dato n'anema â scuatra, ‘na mentalità nova [comme se vedette ajere ca ‘a scuatra, pure ‘nvantaggio ‘e quatto a zzero, cuntinuava a nnun dà tregua a ll’asvverzario attaccannolo e cercanno ‘e levarle palla ] e ‘nu juoco,sfruttanno nun sulo unnece uommene, ma cumincianno a nnun fà mancà ‘o rutizzio (turnover) p’assicurà cchiú a lluongo pussibbile cuntinuità e ll’epipeto (livello) ca dice isso! ‘Nzomma tutte note pusitive pe don Maurizzio, rrobba da applavuse cunvinte pure cunzideranno ‘e ttante nichemate aiurupee (vittorie europee,). E fermammoce cca., cuntente ‘e chello ch’è succieso e ddannoce appuntamento, si dDi’ vo’ a ddummeneca ca vene doppo d’’o scontro casalinco ‘e sapato a ssera cu ‘o Sassuolo, quanno spero ca ce levammo ‘e pacchere ‘a faccia pigliate ê vintitré d’austo.Staveti bbe’. R.Bracale Brak