NAPOLI – FIORENTINA (18.1.20) 0 A 2 ‘A VEDETTE ACCUSSÍ

NAPOLI – FIORENTINA (18.1.20) 0 A 2

‘A VEDETTE ACCUSSÍ

E cche nne parlammo a ffà guagliú?! Cca ‘o fatto è overamente niro. Ajeressera ô san Paolo accumminciajeno ‘o jauallo d’ejudo (girone di ritorno) cu ssette parme ‘e saciccio i ‘a viola, ‘mmece d’abbuscà ce scarucchiaje pe ddoje a zzero ô 26' cu  Cchiesa i ô 74' cu Vlahoviccio e tutt’’e ddoje vote fove Luperto ca nun ‘e ccuntrastaje.

Rassignammoce guagliú: ‘o Napule nun ce sta cchiú  e

Llorenzigno  e cumpagne se surbettajeno ajeressera ‘a quarta uzzimma (sconfitta) cunzecutiva ‘ncampiunato; Chiesa ô 26’,lassato sulo da Luperto a ttre metre dâ porta avette juoco facile pe ssignà. Piezzo e ppejo a ll’arrancua   (ripresa)quanno ô 74’ sempe Luperto nun fove capace ‘e cuntrastà  a Vlahoviccio ca futtette a  Ppastacrisciuta cu ‘nu mancino a ggiro sotto ll’abburro (incrocio) d’’e pale addó ‘o purtiere nun putette arrivà. Furtuna ca primma ‘e ‘sta siconna addaffa (rete) Pastacrisciuta cu dduje bbelli tacculle (interventi) era stato capace ‘e nun aumentà ‘a ddosa d’’a scutuliata. ‘O fatto cchiú scuro fove ca cu ttanti minute a ddispusizziona ‘e nuoste nun foveno crestiane ‘e signà manco ll’addaffa (rete) d’’a bbannera. Nurmale ca ‘a scuatra ascesse ‘nfra ‘e sische ca cummentajeno ‘a mubbara (partita) d’’o Ciuccio sballata dô primmo a ll’urdemu minuto; ‘nu sibbacco (match) maje cuntrullato dê nuoste senza ficre (idee), senza ticca  (fiducia), enza urganizzazziona e cquase rassignate.   Dint’â scuatra nosta se salvaje sulo Pastacrisciuta e fforze pure  Lozano che allimmeno ce mettette cegna  (grinta).’O riesto tutte arret’â lavagna accummincianno dâ trasera  (difesa), passanno p’’o ‘Ncrifato, p’’a Anema Longa, pe Ddemme, pe Ppeppe ‘a ‘nguenta. ‘Nzomma zimmare e crapette una mbulletta! Capite a cche stato sta ‘a Cchiesa?!

Passammo ê ppaggelle:   

OSPINA[Pastacrisciuta] 6,5  Cumme v’aggiu ditto, pure cu ‘e ddoje addaffe (reti) pigliate fove ‘o meglio d’’e suoje salvate cu ddoje bbelli pparate ‘ncopp’a Cchiesa  da n’uzzimma (sconfitta)cchiú ppesante.   

HYSAJ[Mezacucchiara] 5  Nun me piacette, Gattuso però ll’aiutaje p’’a scesa i ‘o ‘nzallanette  facennolo partí a ddritta e ppo spustannolo a mmancina.

 DI LORENZO 5  Cunfermaje pure ajere ca nunn’è ‘nu centrale ma n’udí (terzino) e Ggattuso se ne accurgette quanno oramaje fove troppo tarde.

 MANOLAS[Chitelassa] 5,5  Ajere nun fove sempe isso e ‘a fora ‘e quacche cchiusura centrale lassaje tanti bbuche addó ‘e nassie  (attaccanti) ‘e Iachini se ‘mpezzajeno quanno vuletteno.

 LUPERTO 3,5 -  Serata no e atalossa (prestazione) ca è mmeglio scurdarce visto ca ajeressera smarrunaje malamente cchiú ‘e ‘na vota e sse purtaje ‘ncopp’â cuscienza ‘e ddoje addaffe (reti) ‘e Chiesa e dde Vlahoviccio! Nunn’ ‘o pozzo perdunà!

ALLAN [‘O ‘Ncrifato] 5  ‘Mpriciso, poco mascullo (lucido) miso a gghiucà ‘ncopp’â ferza ‘e dritta se vedette ca nun ce se truvaje arrancanno senza cunchiurere niente ‘e bbuono; nurmale ca a ll’arrancua rummanesse fora. [dô 56'  DEMME 5 Bbadajo  (esordio) ‘nserie A da scurdà: ‘mmiez’ô campo nun se facette apprezzà nè se vedette annante a ddà ‘na mana; doppo ‘nu cartellino jalizzo (giallo) se scanzaje ‘e poco d’essere jettato fora. Taggellato (rimandato).]

 RUIZ[AnemaLonga] 5  Pure pe isso serata no: ‘mpratteca nun se vedette; è overo ca fove miso a ffà ‘nu mestiere ca nunn’è ‘o suĵo, ma abbiaje a gghiucà doppo bbuono ‘nu quarto d’ora e ‘int’ a ttutte ‘e nuvantasei minute ca se jucaje se facette apprezzà sulo pe ‘nu bbellu pallone urtizzato (verticalizzato) pe Ppeppe ‘a ‘nguenta ca però sciupaje malamente. Troppo poco a ppietto ‘e chello ca putesse fà.

 ZIELINSKI 5 – Pur’isso ajere nun fove né ccarna né ppesce: nun cuntrastaje e nun riuscette a trtruvà ‘a porta periculosamente. Taggellato (rimandato).

[dô 64'  LOZANO 6-  Allimmeno ce mettette ‘o ppoco ‘e cegna (grinta) cu quacche ttallisso (guizzo) a dritta, ma nun ne cacciaje zuco.

 CALLEJON[Peppe ‘a ‘nguenta] 4  Sta stracquo e sse vedette; sbagliaje troppi pallune e nnun lle perdono d’esserse magnato n’addaffa (rete)nun mettenno a ffrutto ‘na granna palla d’Anema Longa.

[dal 75' Fernando LLORENTE 4,5  Aizaje porvera senza cunchiurere ‘nu saciccio. Avette ‘na bbona accasiona pe ssignà, ma ‘a sciupaje e mmenaje a llato ‘e capa senza centrà ‘a porta.]

MILIK[Sant’Arcadio] 6- Abbandunato dê cumpagne avette assaje pochi pallune e  ffacette ‘o ppussibbile cumme quanno cu ‘na bbella durrea (girata) a vvolo mancina dette da fà a Dragowski. Peccato ca nun putette fà ato.

INSIGNE[Lorenzigno] 5,5  Nun me pozzo scurdà chella timmurria (punizione) ‘ncopp’ô 0-2 tirata ‘na chiaveca cu ‘nu jabbro (cross) cumpletamente sbagliato.Però fove uno d’’e poche a essere periculuso quanno avette n’antecchia ‘e spazzio e ffove isso sfurtunato a scardà ‘o palo vascio cu ‘nu bbuono dritto.

all.:  GATTUSO 4  Aggio paura ca, ‘e chisu passo,  ‘o calavrese nunn’  arriva a ggiugno ‘mpanca cuana (azzurra); p’’o mumento ‘a mucamara (avventura) soja sta addivintanno ‘nu cuscemarro (incubo): cinche mubbare  (partite) ‘e campiunato e quatto azzimme  (sconfitte), tre mísemo (addirittura) ô san  Paolo.Sbagliaje, ajere a ppartí    cu Chitelassa e Di Lorenzo, chietta centrale, ma po fove traruto da Luperto ca smarrunaje malamente, ma fove itimma (colpa) soja ‘a ficra (idea) sballata ‘e spustà ‘o ‘Ncrifato a ddritta e cchella ‘e ‘nfessirese cu Anema Longa centrale ‘mmiez’ô campo a ffà fà  chello ca nunn’è mestiere suĵo.  Troppi fessarie, pure quanno gestiunaje ‘e cagne.Ca ‘o Cielo ce mettesse ‘a mana soja!

Arb. PASQUA 6 Facette ‘o duvere suĵo

A ‘stu punto dicimmo ca ‘e  sische d’’e muidde (tifosi) e ‘a mazzidda uzzimma  (l’ennesima sconfitta) ô san Paolo,  quarta ‘ fila  ‘ncampiunato doppo chelle contr’ ô Bbologna,ô Parma e â Bbisciona rappresentano a mmestiere ‘a situazziona d’’o Napule nuosto ca oramaje sta ê piere ‘e Pilato e nun tene ‘a forza ‘e repigliarese. Nun ce rummane ca sperà ca ‘e ccose jesseno meglio ‘ncoppa Itaglia i ‘o putimmo vedé ggià marterí ca vene quanno ô san Paolo scenne ‘a scuatra d’’o pappavallo ‘e Lotito. Abbiammo a ffà ‘e ccorne e vverimm ‘e scanzarce n’ata grezza! Succedesse, si ‘o Cielo ‘o vvo’, ve ne parlo miercurí ca trase. Staveti bbe’. R. Bracale Brak