NAPOLI – LAZIO (C.I.22.1.20) 1 A 0 ‘A VEDETTE ACCUSSÍ

NAPOLI – LAZIO (C.I.22.1.20) 1 A 0

‘A VEDETTE ACCUSSÍ

Tutto a pposto guagliú! Finalmente ajeressera vedettemo ‘na scuatra, ‘a nosta!,  ca ce piacette pecché vedettemo tutte ‘e cuane (azurri) jucà cumme ce piace cu ccegna (grinta) cu azzaja(cattiveria) cu ggenio e vvuluntà, sapenno chello ca vuleveno,e ccercannolo senza sparagnarese nsi’ ô nuvantacinchesimo tant’è overo ca acetteno tutte cu ‘a maglietta surata. Eaffuzzajeno (vinsero) ncapo ‘e duje minute scarze  cu n’addaffa (rete) d’’o capitano Lorenzigno ca se zucaje meza trasera (difesa) lazzuiale e mmettette ‘a palla dint’â rezza chiammannose, finalmente!, ll’applavuso d’’o san Paolo e cchell’addaffa (rete) ce avastaje pe ffarece jí ‘nnante ‘ncoppa itaglia addó mo ‘e nuoste se ll’ànn’’a vedé cu cchi affezza ‘nfra ‘a Bbisciona i ‘a Viola dduje accunte uno cchiú scamuso ‘e ll’ato ca ggià ce ànnu scarucchiato ‘ncampiunato... Chella d’ajeressera fova ‘na mubbara  (partita) da nun crerere : Immobile sbagliaje  ‘nu ricore,ca ll’ucummo (arbitro) ll’êva rijalato, Mezacucchiara  e  Lleiva foveno mannate fora dint’ê primme vintinche minute e nnuje e lloro centrajemo ‘nu paro ‘e pale pedono. Gattuso, forze s’accuntentaje ‘e ll’uno a zzero e ccuntinuaje a mmetere dinto jucature ‘e mità ccampo lassanno sulo a Ssant’Arcadio ;sinamparco (comunque)’O Napule ‘e Coppa avette chello ca cercava pigliannose ‘a surisfazziona d’uddaffà (eliminare ‘a Lazzio, amilla (detentrice) ‘e ll’arcasso  (trofeo) apprudanno â sfarnaja  (semifinale). P’’o mumento nun è ppoco!

Passammo ê ppaggelle:

OSPINA[Pastacrisciuta] 6  Attiento e ‘na vota tanto, facette sula ‘na meza fessaria ‘nnaccasione ‘e ll’addaffa (rete) ‘e Immobile aramarrata (annullata) p’attasallulo (fuorigioco) d’’o turrese.   

HYSAJ 5 [Mezacucchiara] Nun me piacette tanto, asasa (soprattutto) quanno doppo essere stato nutizziato (ammonito) trasette a’ncopp’ a uno ca mo nun me ricordo, chiammanose ‘o siconno cartellino jalizzo (giallo) e ffacennose mannà fora; è overo però ca ‘o primmo jalizzo nun ce steva, cumme nun ce steva ‘o ricore datose ca fove  Caicedo a menarse a ccapa  annante quanno ggià Mezacucchiara steva cercanno ‘e alluntanà ‘a palla.  

DI LORENZO 6,5  Asasa (soprattutto) a ll’arrancua (ripresa) sufferette ‘nu poco, ma nun mullaje, strignenno ‘e diente e ffacennose vedé pure  annante.Partuto ‘nchietta cu Chitelassa doppo vinte minute êtte ‘a spustarese a ddritta.

MANOLAS[Chitelassa] 7 Granna atalossa (prestazione) ‘Nu muriaconno (una muraglia) affuzzaje ‘o stibbacco (vinse il duello) cu Immobile ca sulo ‘nnattasallulo (in fuorigioco) vedette ‘a porta nosta.

RUI 6   S’’o mmereta pure si nun sempe fove priciso. Cercaje ‘a porta ô niajo (al finale, ma centraje ‘o sette. Peccato!.

DEMME 6,5 Cercaje asasa (soprattutto) ‘e mettere ajello (ordine) senza esaggerà ma se facette sentere assaje a ll’epata ‘e pressiona (in fase di pressing).

LOBOTKA 6 Pochi minute, ma avastajeno pe ddimustrà ‘e sapé tuccà ‘a palla e dde puté cumannà ‘o juoco [dô 22' LUPERTO 5,5 Accumminciaje cu ‘nu paro ‘e grossi  fessarie, pe ffurtuna senza cunzequenzie, ma jette meglio a ll’arrancua (nella ripresa)].

ZIELINSKI 6  Êsse pututo fà ‘e cchiú, però se sacrificaje ‘mmiezì’ô campo, mettennoce ‘a cegna (grinta) nicessaria. Peccato ca nun cercaje ‘a porta.

CALLEJON[Peppe ‘a ‘nguenta ] 5,5  Mubbara (partita) senza zuco e ccunnimma: ô ssolito se sacrificaje, ma a ll’epata ‘e defatta (in fase di spinta) nun se nutaje quase.[dô 68'  ELMAS[‘O ‘Turco] 6  Se facette nutà appurtanno frischezza â munavara (manovra).]

MILIK[Sant’Arcadio] 6 Ô ssolito ‘o rummanetteno sulo a rrejere ‘o pisemo ‘e ll’ujummo (attacco); nunn’avette vita saleja  (facile), però se dette da fà, cugliette ‘nu palo e ajutaje ‘a scuatra turnanno pure areto!  

INSIGNE[Lorenzigno ] 7  Accumminciaje ‘nfra ‘e sische d’’e muidde (tifosi),ma doppo duje minute se chiammaje ll’applavuse signanno e ppigliannose ‘a scuatra ‘ncopp’ê spalle. Finalmente! [dô 77'  RUIZ s.v. Trasette justo pe ffà sciatà ‘o capitano.]

All.  GATTUSO 6 Doppo tant’amaro, finalmente assagguaje ‘o ddoce; custretto quase subbeto  a ccagnà pruggetto decidette d’accuntentarese ‘e ll’uno a zzero e lle jette bbona. Ô niajo (nel finale) attrassaje  (arretrò) troppo ‘a scuatra, ma arrivaje addó vuleva. Cuntentammoce.

Arb.: MASSA 5  Doppo d’’o ricore, ca nun ce steva dato â Lazio[ma ‘a Madonna se cvedette e Immobile ‘o sbagliaje] pigliaje cchiú ‘e ‘nu zzarro a ll’arranqua (nella ripresa).

E allimmeno chesta è ffatta e ringrazziammo ô Cielo. Ce simmo levato dâ faccia ‘e pacchere sfurtunatamente pigliate ‘ncampiunato e mmo sapato ca vene ce avimm’’a levà chille pigliate dâ vecchia zoccola e ll’âmm’’a fa asasa (soprattutto) p’accuncià ‘a crassifica ch’è overamente è brutta. Si ‘o Cielo ‘o vvo’ ve ne parlo dummeneca ca trase. Staveti bbe’! R.Bracale Brak