NAPOLI – JUVENTUS (26.1.20) 2 A 1 ‘A VEDETTE ACCUSSÍ

NAPOLI – JUVENTUS (26.1.20) 2 A 1

‘A VEDETTE ACCUSSÍ

Che suddisfazziona guagliú e cche bbella cosa! ‘Ntribbuna-divano stammo ancòra sbattenno ‘e mmane ê guagliune ‘e Gattuso ca ajeressera ô san Paolo affuzzajeno (vinsero) contr’â vecchia zoccola  mettennolo a ppitoffio a Ssarri, a Rronaldo, a Ddybala a cchillu sittantuno d’’o Pipita i a ttutt’’o riesto d’’a chenca ‘e delinquente janche e nnire.

‘Nzomma, guagliú ‘o Napule, pe ffarece cuntente, scigliette p’ ajà (risorgere) proprio ‘o sibbacco (match) cchiú scamuso contr’â scuatra ca da sempe ce à  acciso ‘e figlie dint’â connola; pirciò putite capí ‘a priezza nosta e d’’e quarantamila d’’o san Paolo ca da ajeressera turnaje a ffà ll’attaffo (tifo) ‘ncopp’ê bbemate (spalti) dànno ‘na bbona mano ô Ciuccio a ffà ll’armusassa ‘e vattere ‘a vecchia zoccola. Succedette tutto all’arrancua  (nel secondo tempo) doppo ‘nu primmo ajone ‘e titticca (tattica) e accurtezza; ‘o Napule cagnaje faccia e ccercaje d’affuzzà (vincere) e cce riuscette e ffove ‘mprimmose  jadara  (merito) ‘e Lorenzigno che primma scennette ‘nchietta cu Sant’Arcadio verzo ‘a muntaca (area di rigore) jummerdina  e ddô lemmeto arcujaje (costrinse) Szczesny a ‘na raffadda  (respinta) corta, frissa  (preda) ‘e Zielinski ca ô 62’ ce purtaje ‘mmeizo (in vantaggio), poi a ll’86’ Lorenzigno se pigliaje ‘o sfizzio ‘e mettere perzunalmente ‘a firma sott’â siconna addaffa (rete) cuana (azzurra); peccato ca  ô 92’, doppo ‘nu miezu ‘nquacchio ‘nfra Di Lorenzo mitriddejo(indeciso)  i ‘o Lungagnone (ca ascette troppo tarde)  Ronaldo riuscette a ssignà p’’e janche e nnire.

Peccato! Se fósse pututo affuzzà pe ddoje a zzero e ffósse stato cchiú bbello. ‘Nu poco ‘e pacienza, nun mettimmoce a ccercà ‘o pilo ‘int’a ll’uovo e ppassammo ê ppaggelle:

MERET[‘O Lungagnone] 5,5 Miezu zifo (voto) mancante pecché dopp’esserse guardato ‘o sibbacco (match) senza maje essere chiammato ‘ncausa, quanno ô 92’ ll’êsse avut’’a fa, se ‘ntalliaje cunzentenno a Rronaldo ‘e signà.A Ppastacrisciuta nun fósse succieso.

HYSAJ[Meza Cucchiara] 7  Che granna atalossa (prestazione)! Sempe mucannajo   (convincente) e zzabbetto (costante) dette filo ‘a torcere a  Rronaldo ca fove custretto a ccagnà curzia i a  Ddybala ca nun cunchiurette ‘nu saciccio; ‘e cchiú spisso nchiudette ‘mmiezo. Bravo!

DI LORENZO 6 Pure a isso miezu zifo (voto) mancante pecché cumplessivamente fove sí tuosto e ppruiciso, ma se purtaje ‘ncopp’â cuscienzia  ll’essere stato mitriddejo(indeciso)  ô 92’ quanno Ronaldo signaje. Voglio sperà ca ô Ggialante nun fósse capitato.

MANOLAS[Chitelassa] 7 Nun smarrunaje pe nniente: mascullo (brillante),priciso e stiappo ( reattivo) fove ‘nfra ‘e meglie d’’e suoje.

MARIO RUI 6  Quacche ddemmo  (appoggio) sbagliato e ‘nu pasiglio (passaggio) arreto ca ce facette vení ‘a vermenara, ma pure cchiú ‘e n’arnassabba   (discesa) a mmancina e ddoje bboni  nchiusure ‘ncuoll’a   DdouglasCosta.

 RUIZ[Anemalonga] 6  Pe pparicchiu tiempo durmette cu ‘a zizza ‘mmocca senza maje riuscí a mmimmaddà (verticalizzare) e ssulo ô niajo  (nel finale) venette fora e ffacette coccosa. Po’ ffà meglio.

DEMME 6,5  Bbona atalossa (prestazione) ‘nnante â trasera (difesa). Se detta da fà jazzajanno (disturbando) Dybala e tajennanno (impostando).[Dô 69' LOBOTKA 6  Dimustraje ‘e tené ‘nu pere cummilfò e granna aiueja e ppiacette a Ggattuso p’essere tuosto e artabbetto (coriaceo) ma assaje mundebbetto  (disciplinato).]

 ZIELINSKI 7  ‘Ncriscenza; doppo ‘nu primmo ajone (tempo) ca se guardaje ‘a castagna a ll’arrancua venette fora , sagliette ‘e mistaua (livello), tirajee asasa (soprattutto) se facette truvà ô mumento justo ô posto justo pe ssignà ll’uno a zzero. [Da ll 81' ELMAS 6 ‘e stima]

CALLEJON[Peppe ‘a ‘nguenta] 7  Jabbraje (crossò), tagliaje, servette a Llorenzigno ‘a palla d’’o doje a zzero; AlexSandro êtt’’a sputà sanco pe mmantenerlo. Mo sí!

 MILIK[Sant’Arcadio] 6  Lassato sempe sulo jucaje cumme  puissa (boa), spisso spalle â porta,muvennose bbuono p’’e duje carigginne (esterni). [Dô 90' LLORENTE s.v.]

 INSIGNE[Lorenzigno] 8 Fove ‘o meglio ‘ncampo cumme si fosse ajato (risorto): talucco  (frizzante),se magnaje ‘o campo; signaje ‘na granna addaffa (rete) doppo d’avé prucurato ‘a primma. Applavuse!

all.  GATTUSO 7  Presentaje ‘na scuatra tosta, misa ‘ncampo a mmestiere, ‘na scuatra corta ca raggiunaje p’’e primme quarantacinche minute e ascette fora a ll’arrancua addinitanno periculosa, signanno e affuzzanno (vincendo )  cu jadara  (merito).

Arb. MARIANI [e ‘a chenca soja] 4 A ll’arrancua siscaje pe ppartito pigliato, ‘nu tummulo ‘e timmurrie(punizioni), ca nun ce steveno, a ffavore d’’e janche e nnire ca se menajeno ‘nterra pure si uno ‘e gguardava stuorto o pure lle diceveno: “Che bell’uocchie ca tiene!” o lle spiaveno: “Sòreta quanto se piglia, cumme s’’a passa zìeta ‘a monaca?” Pe nnun ddicere d’’o ricore ca nun vulette vedé quanno Cuadrado spustaje ‘na palla cu ‘a mana dint’â muntaca (area di rigore)jummerdina.

E bbasta accussí. Fermammoce cca assaje cuntente d’ajeressera; mo a ffevraro ‘o Napule va a Ggenova contr’â Sampedoria e si ‘o Cielo ‘o vvo’ ce sentimmo marterí ca vene speranno ‘e  ccuntareve  ca ‘o Ciuccio à cuntinuato a ffà bbella fijura e nnun torna cu ‘na vranca ‘e mosche ‘mmano! Statevi bbe’ R.Bracale Brak