NAPOLI – BOLOGNA (17/09/16) 3 A 1 ‘A VEDETTE ACCUSSÍ

NAPOLI – BOLOGNA (17/09/16) 3 A 1 ‘A VEDETTE ACCUSSÍ Tutto è bbuono chello ca fenesce bbuono! I ajeressera ô san Paolo fenette bbuono a ttaralle e ffalnghina..., ma chilli quatto profuche ‘e chella faccia ‘e cestunia ‘e Donadoni, pure jucanno praticamente sulo pe ccumplessivamente ‘na trentina ‘e minuti, ddiece ô primmo ajone e vvinte a ll’arrancua (ripresa) ,poco mancaje ca nun ce ‘ntessecasseno ‘a serata allimmeno nfi’ ô 61’ quanno finalmente Sarri, capenno ‘o fatto a cche s’ammetteva, se decidette a ffà trasí a sant’Arcadio e ‘o nassia (cannoniere) pulacco nuosto ce levaje ‘e castagne dô ffuoco, mettenno dinto dduje stuche uno meglio ‘e n’ato [e ppo ve dico] e risulvette ‘a pratica â faccia ‘e chelli ddoje lote: Bergami e gGentile,almullacche (commentatori) ‘e Sky ca so' dduje cestarielle 'e mmerda ca però,ajere s'êtten’’a fà cchiù ddinto 'e dint'ô fetillo e ddoppo d’ 'o siconne stuco (gol) 'e ll'artigliero pulacco nuosto s’êtten’ ‘a magnà 'nu fenucchio tuosto, s''o stanno ancòra rrusecanno e ll'è rrummaso 'mmiez'ê diente! Passammo ê ppaggelle: REINA 5 ‘Nu zifo (voto) mancante pecché si fove dicisivo ‘ncopp’a ‘na carugnata ‘e Zemaili doppo overo pochi minuti ‘e mubbara (partita),’nguajaje tutta ‘a facenna facennose, ô ssolito, cogliere ‘mpriparato ‘ncopp’â cunchiusione forte, ma ‘a luntano e ccentrale ‘e Verdi ca valette ‘o mumentaneo uno a uno d’’o bBulogna. Accussí nun po’ gghí! Pepe s’êsse decidere a gghí a ddu ‘nu bbuono tabbibbo (oculista); pe mme tene prubleme ‘e miupia e ‘a luntano nun ce sfessecheja troppo! Pe ffurtuna ca ll’indecisione soja nun ce custaje cara visto ca trasette sant’Arcadio; ma si nun ce fósse stato? HYSAJ 6 Cumplessivamente meglio a ll’epata difenziva (fase difensiva) ca a cchella ‘e màdera (propositiva)pure pecché con Krejci e ccumpagne pronte a ffà ‘e guappe, nun se putette permettere ‘o lusso ‘e scennere ‘nnante! ALBIOL 6,5 Tutto summato se cumpurtaje meglio ‘e Koulibaly cu ‘nu primmo ajone (tempo) bastantamente tranquillo e ccu ‘n’arrancua (ripresa) ch’êtte ‘a stà pronto e attiento pe nnun avé surprese i ‘o ffacette senza nisciunu prano (errore). KOULIBALY 5,5 Miezu zifo (voto) mancante pecché doppo ‘nu primmo ajone (tempo) tranquillo jette ‘ndifficurtà a ll’arrancua (ripresa), quanno ‘o bBologna palliggiaje curra (sfera) ‘nterra e cquanno ‘e murtadelle ‘e donadoni s’accustajeno â camma nosta, isso abballaje periculosamente, ma pe ffurtuna, senza conzequenzie! STRINIC 6 Jette bbuono pe n’ajone (un tempo), sia a ll’epata difenziva (fase difensiva) ca a cchella ‘e màdera (propositiva). A ll’arrancua però se ne scennette e ffove sustituito cu Ghoulammo [dô 67' GHOULAM 6,5 Ll’avastajeno poco cchiú ‘e vinte minuti pe ddimustrà quanto po’ essere artachibbo (ficcante): jucaje bbuono tutte ‘e pallune avute, truvanno pure ‘o tiempo ‘e ‘nu paro ‘e tatacalle (sovrapposizioni) pricise]. ZIELINSKI 7 - Uno d’’e pochi a rrummané zabbo (costante) praticamente pe ttutta ‘a sibbacca (gara); ‘e ccruste (percussioni) soje foveno pe bbona parte d’’o primmo ajone (tempo) ‘a slacca (l'arma) ‘ncchiú d’’o Napule i ô tellicuso (finale) cuvvaje (costrinse) a Kraftho a ss’abbuscà ‘o cartellino russo. JORGINHO 5 ‘Nu zifo (voto) mancante pecché si pe quarantacinche minuti cercaje ‘e mettere tartibbo (ordine) a ccentro ‘e campo navianno (smistando) pallune e ppallune, senza maje però n’istiglia (verticalizzazione) seria a ll’arrancua (nella ripresa)se ne scennette malamente ‘e posa nsi’ a rijalà, perdenno palla comme a ‘nu fesso, n’ iummuddadde (contropiede) periculuso ô bBulogna. Pe ffurtuna Sarri annasiaje quala aria tirava e ss’ ‘o chiammaje ‘mpanca. [dô 72' ALLAN 6,5 – Partette a ssurpresa ‘mpanca e quanno trasette jettava fuoco p’’e rrecchie e sse dètte da fà ‘nventannose cu ‘na granna accellerazziona, ‘nu iabbro a zzuco ‘e caramella pe Insigne ca però sciupaje malamente; che peccato! Pe ppoco po nun trovaje isso stesso ‘o stuco doppo ‘o nuvantesimo!] HAMSIK 5,5 Contro â Dinamo nunn’è ch’êsse jucato bbuono i ajeressera sí e nno facette quaccosa, assaje meno ‘e chello ca ce se s’aspetta ‘a uno comme a isso; ‘e bbuono appena appena ‘na cunchiusione senza frutto e quacche jusaida (assist), però ‘nteliggente comme a cchella p’’o doje a uno ‘e sant’Arcadio. CALLEJON 7 Chillo d’ajere fove ‘o nummero 5 ‘ncampiunato i ‘o nummero 50 cu ‘a maglia arzacca (azzurra) d’’o Napule e pp’’o mumento nsi’ ê quatto doppo magnato, è ‘o mumentaneo caponassía (capocannoniere) d’’o campiunato. P’o riesto ‘o solito bbello íaudo (rendimento)suĵo e nun lle se po’ addimannà ‘e cchiú! GABBIADINI 4,5 Che delusione, ‘stu chiagnazzaro! Sí over’ è ca avette pochi pallune a ddisposizziona, ma manco s’’e ghiette a ccercà partecipanno ô juoco e ffacennose nutà; niente! Chilli pochi pallune avute nun ‘e sfruttaje a dduvere tiranno ‘mporta a ssalve meza vota, mentre p’’o riesto sbuffaje, s’aggitaje e e currette a vvacante; ‘nzomma ‘nzustanza, perdette n’atu treno passato inutilmente. E mmo ave voglia ‘e piccià dint’a n’angulo d’’o gurfaccale (spogliatoio)! Nun penzo ca Sarri se fa cartià ancòra dê llacreme soje [dô 61' MILIK 9,5 Ato che pipita e ppipita! Chisto è ‘na PEPITA d’oro a vvintiquatto carate e sse cunfermaje pure ajere n’artigliero (cannoniere) ‘e razza mettenno dinto ‘a solita pareglia (doppietta) soja ca fove dicisiva pe rrisolvere ‘a mubbara (partita) rijalanno ll’intisarra (vittoria) ô Napule cu dduje stuche (gol) uno meglio ‘e n’ato: ‘o primmo, doppo ‘nu bbellu muvimento pe ttruvarese ô posto justo a rrecoregliere ‘o bbassurero (suggerimento), cu ‘nu pallunetto ‘ncuollo ô purtiero asciutole ‘ncontro i ‘o siconno cu ‘na cagliosa ‘a trenta metre ca chijaje ‘e mmane ô purtiere; istinnaio(fenomenale)! Trasette ô quarto d'ora ‘e ll’arrancua (ripresa), e ‘ncapo ‘e dicessette minuti ce facette vedé ca pe mmana soja è ppussibbile ‘a quadratura d’’o chirchio! Trasette e i penzo e spero ca nun sse nne jesce cchiú! ‘E chisto nun se ne po’ ffà a mmeno!!] INSIGNE 5 ‘Nu zifo (voto) mancante pecché nun fove cumpletamente cuntinuo ma sulo magamirro (intraprendente) visto ca cu ‘e nfinte soje e ccu ttanti mubbadare (iniziative) Krafth(e) nun ce capette ‘o riesto ‘e niente; però ’o peccato murtale gruosso suojo, ca nisciunu preveto lle po’ pperdunà fove ca nun truvaje ‘o stuco (gol) e sse ne magnaje uno gruosso quanto a ‘nu palazzo ‘e casa pe bbia ‘e ‘na retissante (clamorosa) ‘mpricisione sotto porta ca nun lle cunzentette ‘e mettere a ffrutto ‘nu iabbro (cross) a zzuco ‘e caramella ‘e Allan ca, ‘o piscaje libbero e ffranco mettennolo a ttu ppe ttu cu ‘a porta! E cche saciccio! Po dice ca uno ‘o piglia a ccucchiere ‘affitto! All.SARRI 6,5 – Facette buono a ppuntà ‘ncopp’ ô rutizzio (turnover): chist'anno,lassanno perdere ‘e llacreme ‘e quaccheduno [capisce a mme] se po’ ffà! Però spero ca avesse capito ha capito che nun po’ e nun à dda fà a mmeno d’’o PEPITA, ca sant’Arcadio è mmiraculuso overo e cce serve comme ô ppane! Arbitro Doveri 5 ‘A chiena i ‘a vacante, ma ‘e cchiú nun dico. E ccu cchesto ve saluto; fermammoce cca ddannoce appuntamento, si dDi’ vo’ a ggiovedí ca vene doppo d’’o scontro ‘e nàcchela(trasferta) cu ‘o Genoa,p’’o turno ‘e miezo semmana , speranno ca ve pozzo cuntà n’ata vota, bbelli ccose! Staveti bbe’. R.Bracale Brak