BENEVENTO – NAPOLI 04/02/18 0 A 2 ‘A VEDETTE ACCUSSÍ

BENEVENTO  – NAPOLI 04/02/18 0 A 2

‘A VEDETTE  ACCUSSÍ

Tutto a pposto, guagliú, sí tutto a pposto cu ‘o Ciuccio ca ajere  a ssera   jette a gghiucà ‘ncopp’ô campo d’’e streche ‘e Bbeneviento e lle cunzignaje ‘na riccia [ô 20’ cu cCiruzzo] e ‘na frolla [‘o 48’ cu mMarekiaro] vincenno pe ddoje a zzero, ppigliannose accussí n’ata vota ‘a cimma d’’a crassifica e ddànno ‘a risposta â vecchia zoccola ca pe pparta soja êva sbrasato pe sette a zzero  contr’ô Sassuolo,  una d’’e ttre scuatre assineje (satelliti) soje,ma  lle servette sí e nno a ffarece preoccupà [pure si ‘o ssapevemo ca accussí fósse juta], pecché po a ttard’ora ‘o Napule  nun nne lassaje manco ‘e frecule  (briciole) cunquistanno ‘a settema nichemata (vittoria) cunzecutiva  ‘ncampiunato contr’ê   streche ‘e Bbeneviento partute súbbeto assaje  lutenare (aggressive) pe gghiucarese ‘a mubbara (partita) d’’a vita [cumme fanno, chi sa’ pecché...,  tutt’’e scuatre ca ‘ncontrano’o Napule], ma s’êtteno ‘a fà dint’ô prozo, pecché ‘o Ciuccio facette  sí sfucà ‘e streche pe ‘na dicina ‘e minute, ô pprincipio d’’o primmo ajone, ma po pigliaje ‘e mmesure juste e apprimma cu Llorenzigno cugliette n’afachía retissanta (traversa clamorosa)e arrivate ô 20’ cu ‘na malatia ‘e Ciruzzo ‘e ccasticaje ‘a primma vota, mettenno ‘nchiaro ‘e ccose comme steveno ca foveno perfezziunate definitivamente ô 48’ cu mMarekiaro, ca dicette grazzie a pPeppe ‘a ‘nguenta pe cchella palla da mettere sulo dinto. ‘Nzomma cumpressivamente tutto a pposto [cumpresa ‘a ‘stavarra a tTuleto ca ajere  annullaje ‘nu ricore siscatoce contro ‘a Di Bello], tutto a pposto si nun cuntammo ’a preoccupazziona pe ccundizzione ‘e Ciruzzo custretto a ascí ô 76’ pe bbia ‘e ‘nu caucione ca le prucuraje ‘nu ‘mpiccio a ll’astràcalo (caviglia) mancino e sperammo ca se risolve ampressa ampressa.

Passammo ê ppaggelle:

REINA 6 – Se facette truvà sempe pronto pure si foveno poche ‘e cunchiusione d’’e streche  ‘int’ô specchio.

 HYSAJ[Meza Cucchiara] 6  Se sta affinanno e ajere nun ghiette maje ‘mpatenza cu D’Alessandro; però fove meno presente a ll’epate uffenziva (fase offensiva), ma nun servette.

KOULIBALY[‘O Gialante] 6,5  Se facette rispettà pure troppo sbagliajanno sulo quanno stennette a cCosta e ffove salvato da ‘stavarra a tTuleto; p’’o riesto  tutte ll’azzione d’’o Ciuccio partertteno dê piere suoje.

 ALBIOL[‘O Masto] 6,5 Nun sbagliaje niente.

 RUI 6  Ô pprincipio fove sistimaticamente  zumpato da Brignola, ma a ll’arrancua  (nella ripresa), pigliate ‘e mmesure,  aizaje ‘nu muro  i a ddritta nun scappaje cchiú nnisciuno.

ALLAN 7  Uno d’’e meglie, fove ll’urdemo a mmullà e cce mettette cegna (grinta) e ccorza pe ttutt’’a mubbara (partita). Nun le perdono sulo ca pe ddoje vote, arrivato ô lemmeto d’’a muntaca (area di rigore) cercaje ‘a porta sbaglianno ‘mmece ‘e serví ‘nu cumpagno meglio piazzato.

 JORGINHO 6,5  Cumme a ll’ate p’’e primme diece minute ô pprincipio sufferette ‘o juoco d’’e streche, ma po s’assestaje accumincianno a mmacenà juoco dànno accussí armizzanno  (equilibrio) a ttutta ‘a scuatra. [dô 79’ DIAWARA 6 ‘e stima pecché  tuccaje pochi pallune cuntentannose ‘e fà ‘a guardia ô bbidone d’’a nichemata  (vittoria).]

HAMSIK[Marekiaro] 7  ‘O capitano ô pprincipio ‘e sibbacco (match) se dette da fà facennose truvà mo a ddritta, mo a mmancina, sbaglianno ‘o stuco (gol) ‘nu paro ‘e vote, ma ô 48’ finalmente ‘o truvaje cu ‘nu bbellu muvimento pe mmettere dinto ‘o doje a zzero cu ‘na palla d’oro ‘e Peppe ‘a ‘nguenta. [dô70’  ZIELINSKI 6,5 Trasette subbeto ‘int’ô juoco e ttentaje ddoje o tre cunchiusione.]

CALLEJÓN[Peppe ‘a ‘nguenta] 6,5  Peccato p’’a mira sbagliata pecché êsse pututo signà ô niajo (al finale) ‘e sibbacco (match), pecché p’’o riesto, ô ssolito,  jucaje a ttutto campo risultanno ‘na spina ‘int’ô scianco d’’e streche e ffove isso ca dètte a mMarekiaro ‘a palla d’’o doje a zzero, chella ca nun se puteva sbaglià!

MERTENS 7,5[Ciruzzo]  Se muvette cuntinuamente e ffove isso ca cu ‘na vera e pproprio  malatia ô 20’ sbluccaje ‘a facenna mettenno ‘e ccose ‘nchiaro e abbianno ‘a furmazziona cuana (azzurra) p’’a strata d’’a settema nichemata (vittoria) cunzecutiva.Grazzie. Cugliuto cu ‘nu caucione ‘e spalle ca lle prucuraje ‘o ‘mpiccio ca v’aggiu ditto, êtte ascirsene; che peccato! [dô 76’  ROG [‘A Bbelva] 6 ‘O cruato ‘int’a ll’urdemu quarto d’ora cercaje ‘e jucà quanti cchiú ppallune pussibbile spustato ô posto ‘e Peppe ‘a ‘nguenta ca s’accentraje.]

 INSIGNE [Lorenzigno] 6  Êsse signato cu cchillu pallunetto suojo, ‘mmece ‘e cogliere ll’afachía (traversa) se nne fosseno cadute ‘e bbemate (spalti), ma po’ sparette...

all. SARRI 6  ‘E suoje lassajeno ê streche ‘e primme minute   ma po facetteno chello ca s’êv’’a fà.

Arb. DI BELLO 5 Chisto ce porta bbuono, ma è scemo e ssisca a ccapocchia e ‘o ffacette pure ajere nun cecanno cchiú ‘e ‘nu carí (fallo) fetente d’’e streche e nnun piglianno maje ‘a dicisiona justa cumme ‘nu ricore siscatoce contro ca, pe ffurtuna ‘sta varra a tTuleto lle facette cassà.

E fermammoce cca cuntente ‘e comme se cumpurtaje ajere ‘o Ciuccio e ffacimmo ‘mparanza ‘na  nuvena a san Ggennaro ca Ciruzzo nun s’è ffatto assaje male e ttorna dispunibbile ggià pe ssapato a ssera quanno ô san Paolo arrivano ati accunte scamuse, ‘e frate cucine d’’e pecurare rumanise  e vvonno o nun vvonno âmm’’a turnà a vvencere!

Accussí sperammo! E ssI Ddi’ vo’ ve ne parlo dummeneca ca vène. Staveti bbe’.

R.Bracale Brak