CAGLIARI – NAPOLI (26.02.18) 0 - 5 ‘A VEDETTE ACCUSSÍ

CAGLIARI – NAPOLI (26.02.18) 0 - 5

‘A VEDETTE ACCUSSÍ

Che ssuddisfazziona e cche sfizzio ajeressera guagliú pe cchello ca ‘e guagliune cuane (azzurri) sapetteno fà jenno a cCagliari a ppurtarle ‘na guantiera ‘e quatto sfugliatelle ricce cchiú una frolla [ ‘e rricce, una ô 29' cu Peppe ‘a ‘nguenta, n’ata ô 42' cu cCiruzzo, n’ata ancòra ô 61’ cu Marekiaro, ‘a frolla ô 72’ cu lLorenzegno,e ll’urdema riccia e ccauda ‘e furno ô 90’ cu mMario Rui] i a ffà annuzzà ‘ncanna a cchillu strunzo ‘e Cragno ‘e pparole scunchiusunate soje d’’e juorne passate quanno aveva vummecato ca ll’isulane êsseno fatto contr’ô Napule ‘a mubbara (partita) d’’a vita, pe ffà ‘nu favore â vecchia zoccola janca e nnera. ‘O Napule lle dètte ‘a risposta ca se mmeretaje e lle lassaje ê spalle cinche pallune e ffoveno pure poco, pecché durante ê primme vinte minute d’’o sibbacco (match) [quanno ‘o Ciuccio lassaje sfucà ‘e lucale], pure avette ddoje o tre accasione e nnun ‘e sfruttaje, nè putette sfruttà ‘nu ricore sacrusanto ca lle fósse spettato, ma ca  chillu sacchetto ‘e ll’ummeto ‘e Giacomelli [3 e ppo ve dico] nun vulette vedé e nnun lle dètte... si no êssemo nchiuso ‘o primmo ajone (tempo) ‘ncopp’ allimmeno ô quatto a zzero [‘mmece d’’o doje a zzero, comme fove] e ll’arrancua (ripresa) ‘ncopp’ a ll’otto a zzero e nnisciuno êsse pututo dicere niente! Ma avastaje cumme sbrasajemo e ccumme se vincette! Jammo ‘nnante e ppassammo ê ppaggelle:

 REINA 8  Nunn’êtte ‘a fà assaje, ma s’’o mmereta tutto  pecché mantenette ‘a porta acrata (inviolata) rispunnenno presente  mo cu ‘e mmane, mo cu ‘e piere quanno fove chiammato ‘ncausa ‘ncopp’ô zzero a zzero ‘na vota ‘a chillu pacco attaccato cu ‘o spavo spapacciato, ll’ecchese Pavoletti,  ‘na vota  da Han(ne) e ‘ncopp’ô tre a zzero da Lykogiannis(se) cu ‘nu tiro ‘e timmurria (punizione) velenosa ca Pepe aizaje ‘ncopp’a ll’afachía (traversa).

 HYSAJ [MEza Cucchiara] 7 Atalossa taminna (prestazione preziosa); sempe attiento arreto e pprupusitivo quanno sagliette pe ddà ‘na mano, comme quanno [42’] favurette pe mmità  ‘o stuco (gol) ‘e Ciruzzo.[dô 73'  MAGGIO 6 facette ‘o ssuĵo.]

ALBIOL 6,5[‘O Masto] Pe ‘na ventina ‘e minute Pavoletti cercaje ‘e darle da fà, ma ‘mpratica nun cunchiudette niente. ‘o Masto passanno ‘o tiempo se mettette ‘ntusiello e ppe tutte fove notte! 

KOULIBALY[‘O gGIALANTE] 6,5  Pur’isso ô pprincipio avette ‘o cche ffà cu ‘a chietta  Han(ne)-Pavoletti,ma cu ‘e bbone o cu ‘e mmalamente risulvette sempe ‘a facenna. Giacomelli ‘o nutizziaje (ammoní) e nn’êsse pututo fà a mmeno. Tutto migliuraje doppo ca ‘o Napule sbluccaje ‘a pratteca.

 RUI 7 – ‘O veco migliurato juorno pe gghiuorno e mme fa piacere;ajere nun sulo stuppaje a fFaragò senza cedere maje, ma accumpagnaje ll’azziona palliggianno a mmestiere cu ll’ate,apprimma  sfresaje (sfiorò) ll’addaffa (rete) e ppo ‘a truvaje ô 90’ cu ‘nu tiro ‘e timmurria (punizione) da ‘ncurnicià.   

ALLAN[‘O ‘Ncrifato] 8  Mutavvio (strepitoso), oramaje nun sbaglia cchiú ‘na mubbara (partita) mettennoce ggenio (voglia) corza e ccegna (grinta) e lluttanno sempe cu ‘o sanco a ll’uocchie, azzannanno feliette cu ‘na qualità ttale ca ‘o fa fà sempe bbella fijura, comme ajere ca  nun sulo currette, ricuperaje e ggestiunaje (gestí) tanti pallunne,ma riuscette ‘a sbruccà ‘a facenna mettenno ‘ncopp’ô pere ‘e Peppe ‘a ‘nguenta  ‘a palla ‘e ll’uno a zzero! Applavuse! 

JORGINHO 7  Ô ssolito dint’ô stritto e pp’’a ggiumetria ‘e munauara  (manovra), tanto ‘e cappiello; ll’êsse miso ‘e cchiú si avesse urtizzato  (verticalizzato) cu cchiú pricisione, ma nunn ‘’o ffacette. Peccato!  [dô 75'  DIAWARA 6 ‘e stima; jucaje poco, ll’êsse fatto trasí diece minute primma]

HAMSIK[Marekiaro] 7  Finalmente ‘o capitano fove isso e sse facette apprezzà ggià dê primme minute dimustranno d’essere ‘nserata: sapette sempe ch’êv’’a fà, fove priciso quanno cupuliaje (dialogò) ‘int’ô stritto o da luntano  Dalle e ddale pur’isso fove premiato da n’addaffa (rete) bbella e aspettata e arrivata i aggiu perzo ‘o cunto  ‘e quante  ne so’!

 CALLEJON[Peppe ‘a ‘nguenta] 7  Periculo custante a  ddritta, nchiudette jucanno a ccentro; apprimma sfresaje ‘nu stuco(gol) po ô 29’, dicenno grazzie ô ‘Ncrifato,  truvaje chillo ca spilaje ‘o varrile ‘e ‘nu sibbacco (match) da vencere assulutamente.

 MERTENS[Ciruzzo] 7  Se piazzaje lla nnante e mmettette ‘ntribbule e ‘ntempesta ‘a difaja (difesa) lucale, ma nun mancaje ‘e lassà ‘o signo suĵo ô 42 mettenno dinto ‘a palla d’’o doje a zzero ‘int’ô campo addó capette ‘e puté jucà ‘mmiezo cumme marcazzo (centravanti).[dô 64'  ZIELINSKI 6,5 Se facette vedé súbbeto addó capitaje, mo ‘a cca , mo ‘a lla e se jette a guaragnà ‘a timmurria (punizione) d’’o cinche a zzero!]

INSIGNE[Lorenzigno] 7,5  Ancòra ‘na granna mubbara (partita);atalossa (prestazione) overamente  sustanziosa p’’o frattese ca fove anàtrupo (devastante) a mmancina p’’e pasiglie (passaggi) ca facette  e ppe ccumme cupuliaje; ajeressera però truvaje pure ‘o stuco quanno ô 72’ cunfezziunaje cauda cauda  ‘a frolla d’’o ricore tirato cu freddezza e ppricisione! ‘Assa fà ô Cielo!

all.  SARRI 7,5  Avettemo ajere a  cCagliari,’a prova d’’o nove  ca, si è caso, a ppietto d’’o passato campiunato,  ‘o Napule sape  sufferí, aspettà, vení fora, vencere i addirittura sbrasà divertennose e facenno divertí.

arb. GIACOMELLI,cu‘a CHENCA soja e cchille d’’a VARRA 3

Scennette ‘ncampo senza sapé ‘e che se trattava, siscaje a vvienetenne i ‘e signalinie ll’ajutajeno p’’a scesa; assaje primma ca ‘o Napule accumminciasse a sparà trezziole, durante ô primmo ajone (tempo), nun vulette vedé ca Castan(ne)acchiappaje a cCiruzzo ê spalle  p’’a maglietta e s’’o carriaje ‘nterra, mentre cercava ‘e tirà e ttutto chesto dint’â muntaca (area di rigore) ‘e ll’isulane; isso nun vulette vedé, chille d’’a Varra ca lle cunzola ‘a sora nun ll’alluccajeno ‘int’ê rrecchie:”Ma tu  che cacchio staje facenno?! Viene a vvedé ca nunn’ hê visto manco ‘o saciccio!...” e ghiettemo annante vincenno ô stesso largo e bbuono â faccia lloro, d’’a vecchia zoccola, ‘e Cragno  e dde chi ce vo’ male! Llurdema puttanata ca facette ‘stu scumbino d’arbitro fove ca doppo d’avé dato tre minute ‘e ricupero, arrivate ‘ncopp’ô cinche a zzero pe nnuje, siscaje súbbeto ‘a scumpetura (fine) senza farle jucà e ‘ntribbuna divano n’amico se preoccupaje dicenno: “E ssi mo, ‘o Cagliare, ‘mmezziato dâ vecchia zoccola, prutesta che succede?” Lle rispunnette: “Nun te piglià penziere! Cca ll’unico ch’ êsse ‘a prutestà è ‘o Napule pecché s’è vvisto levato tre minute ‘e divertimento i ‘a pussibbilità ‘e signà ancòra!”.

E ffermammoce cca cuntente e ssuddisfatte ‘e cumme jette ajeressera ‘nZardegna e dde cumme fenette ‘na mubbara (partita) ca ‘o muntarribbo (allenatore) Lopez(zo),se penzava nun fósse  "signata" ‘mpartenza, ma ca  ‘mmece fenette, comm’era justo ca fenesse cu ‘nu largo, sustanziuso cinche a zzero pe nnuje! Staveti bbe’ e ssi dDi’ vo’ ce sentimmo dummeneca ca vène pe ccuntarve ca ‘o Ciuccio à mazziato pure ‘e pecurare rumanise scise ô san Paolo!

Raffaele Bracale Brak