CATANIA – NAPOLI 1 A 1 LL’AGGIU VISTA ACCUSSÍ

CATANIA – NAPOLI 1 A 1 LL’AGGIU VISTA ACCUSSÍ

Fernette a vvrenna cu ‘nu pareggio uno a uno ca è mmeglio ‘e ‘nu caucio ‘nculo, ma nun è cchello ca m’aspettavo e ca speravo; è cumminfatte puteva jí meglio assaje, si Mazzarri avesse ‘ngarrato ‘a formazzione e ‘e cagne, si – preoccupato ca Bergonzi avesse pututo jettà fora a Grava (ca ‘a troppu tiempo steva venenno a cchi sî ttu e cchi songo i’ cu Mascara) e farlo squalificà p’’a prossima partita contro ô Milanno – nun ll’avesse fatto ascí lassanno ‘a difesa ‘mmano a Cannavaro e a Zuniga, ca aveva sustituito (che ghiastemma!) a Ddossena... e comunque puteva ‘o stesso jí meglio si ‘o Napule avesse accumminciato a gghiucà comme sape già doppo ô vantaggio signato ‘a Cavani, e nun avesse aspettato ca ‘o Catania pariggiasse pe deciderse a gghiucà.... e soprattutto fosse juto meglio si a ll’urdimu minuto Cavani nun se fosse magnato ‘nu gollo facile facile... Ma cu tutte ‘sti si nun se va a nnisciuna parte e ‘o Napule è turnato dâ Sicilia cu appena ‘nu punticiello, n’è stato cacciato dô siconno posto e mannato ô quarto e ‘o cchiú bbrutto è ca mo sente ‘ncopp’ ô cuollo ‘o sciato d’ ‘a juventússa. Pozzo dicere subbeto ca pe mme a pparte ‘e sbaglie ‘e furmazzione e de sostituzzione ‘e Mazzarri, ‘a colpa è d’ ‘o fatto ca ‘o Napule tène troppi nazziunale è cchisto è ‘nu prubblema comme à ditto ‘o stesso Mazzarri:
Riepiluganno, ‘e guagliune napulitane facettero ‘nu primmo tempo senza zuco e senza sale e nun riuscettero a truvà ‘a quadratura d’ ‘o chirchio pure pe merito d’ ‘e catanese,ca ‘nzerrajeno tutte ‘e spazzie custringenno dinto a ‘na morza Gargano stracco assaje e ‘o povero Pazienza ca cantaje e purtaje ‘a croce. E però me s’allargaje ‘o core comme a ‘nu cufenaturo quanno (me pare fosse ‘o 39esimo) Cavani cuncretizzaje ‘a primma vera azzione d’attacco d’ ‘o Napule. Troppo ampressa! ‘O Napule s’assettaje e ‘a ripresa fuje simmele e cunforme: i rossobblú cuntrullajeno ‘a partita pure si ‘o fatto d’ ‘a cumannà ‘mmiez’ô campo nun apprudava a nniente si nun tenimmo cunto ‘e ‘na capata ‘e Spolli ca De Sanctis riuscette a devià cu ‘na parata cchiú spettaculare ca difficile...; ma dalle e ddalle ‘o cucuzziello addiventa tallo e ô 23esimo ‘o Catania truvaje ‘o pareggio: Ricchiuti servette dâ mancina n’assisto preciso pe ll'argentino Gomez, ‘o diretto marcatore sujo, Zuniga, trasutoô posto ‘e Dossena ( e nno ‘e Maggio!) da appena dduje minuti, se facette truvà ‘mpriparato e si facette lassà ‘ncopp’ô posto, Culo’echiummocannavaro (nun ce scurdammo ca ‘ndifesa ‘o Napule joca a zzona e culo’echiummo avesse ‘a essere ‘o centrale) nun ‘o jette a ddà ‘na mana e ‘o Catania signaje ‘o gollo ‘e ll’uno a uno p’ ‘a cuntentezza d’ ‘o pubblico d’ ‘o Massimino. Sulo doppo d’ ‘o pareggio, ‘o Napule accumminciaje a gghiucà ‘a Napule: troppo tarde, pure pecché a ll’urdemo a ll’urdemo Cavani se magnaje ‘o gollo d’ ‘o possibbile doje a uno e ‘o Napule s’avette accuntentà ‘e ‘nu punto sulo ca comunque dicimmo ch’ è ‘nu bbuono punto, cunquistato ‘ncopp’ a ‘nu campo tuosto, contro a ‘na squatra tosta e tignosa... Mo sperammo ca Mazzarri ammesca ‘nu poco ‘e ccarte e nun fa jucà sempe e ssulo ‘e stesse e sperammo ca ‘a partita ‘e ggioverí contro ô Liverpullo, nun ce ‘ntosseca chella ‘e llunnerí ca vene contro ô Milanno. Accussí spero. E vedimmo ‘e ppaggelle meje:
DE SANCTIS 6- ‘A chiena e ‘a vacante... Bbelli pparate decisive dinto a diverze uccasione, sia ô primmo ca ô sIconno tempo, ma po troppe periculose asciute a vvuoto e tanti rilance sbagliate! Avesse pututo fà coccosa ‘e cchiú ‘ncopp’ô gollo d’ ‘o Catania!...
GRAVA 6.5 ‘O surdatiello nuosto nun fuje nè bbello,nè alicante ma cuncreto assaje, pure si cu paricchi falle ‘ndanno ‘e ‘nu Mascara scatenato; a ffavore ‘e ll’averzano quacche bbuono anticipo!
(dô 7′ s.t. ARONICA 6 Dicisivo pe diverze chiusure.)
CANNAVARO 4 Poco cuncreto e spisso spisso ‘ndifficultà. Pe ggrazzia ‘e Ddio se facette jettà fora pe ‘nu fallo inutile e carogna e accussí ce ‘o simmo levato ‘a tuorno per lo meno p’ ‘a partita cu ‘o Milanno!
CAMPAGNARO 6,5 Partita difficile pure per l'argentino ca s’êtt’ ‘a stà sempe ‘mpusizzione difenziva ( pure pe ddà ‘na mano a Cul’echiummo) , ma nun putette maje fà sentere ‘a presenza soja ‘mmiez’ô campo o radduppianno ‘ncopp’â fascia destra...
MAGGIO 4 ...’o peggio dô primmo minuto. Nun saccio pecché Mazzarri se ‘nfessisce a mmetterlo sempe e a nun sostituirlo maje! Me pare ca ‘o giuvinotto scenne ‘ncampo sempe sturduto e pare ca ‘a capa ‘a lassa chi sa’ addó...C’è poco ‘a fà: ‘o matrimonio nun lle porta bbuono; i’ ‘o cunzigliasse, si sta preoccupato d’essere fatto priore ‘e san Martino ‘e se purtà ‘a mugliera appriesso e farla assettà a vvista in tribbuna!’Nzomma ajere facette ‘a cchiú scadente d’ ‘e ppartite sbaglianno tutto chello ca puteva (stoppe,crosse, e passagge pure ‘e cchiú facile) e nun facenno maje niente ‘e pusitivo!
GARGANO 5 Stanco e cu ‘e ccosce mosce, s’arrangiaje; fuje pure vulenteroso ma spisso jette dint’ê chiavette (fu in difficoltà). Diverze ‘e ppalle perze, quaccuna ‘mpurtante e periculosa.Se ‘ncapunette a ttirà ‘e punizzione e nun è arta soja!
PAZIENZA 6,5 Pure ajere – comme a ati vvote – avette fà ‘a fatica soja e cchella d’ ‘o cumpagno ‘e reparto e s’ ‘a sbrigaje ô mmassimo sia a ffà ‘a diga ‘mmiez’ ô campo ca a smistà pallune: ce ne vulessero ‘nu paro!
DOSSENA 5,5 Vulenteroso e abbastanza cuncreto, ma nun è stato determinante, po nun sape tirà ‘mporta!
(21′ s.t. ZUNIGA 4 Pesantissimo ll’errore ‘ncopp’ô gollo d’ ‘o pareggio d’ ‘o Catania: stette ‘mbambulato ‘mmiez’a ll'area e nun tenette manco ‘a forza ‘e dicere a Culo’echiummo: Aiútame. P’ ‘o riesto, sulo pochi ppalle e tutte sbagliate!)
Hamsik 5- Pur’ isso stanco! Quase assente; si levammo ‘nu bbuonu tiro ‘a fora prucurato ‘a ‘na palla arrubbata ‘a Cavani e ‘nu bbuonu crosso nun sfruttato proprio dô Matador , tentaje sulamente quacche attacco spisso però allungannose malamente ‘o pallone; ‘a Marekiaro se po’ pretennere cchiú assaje! Ll’aspetto cu Liverpullo e Milanno!
Lavezzi 6+Apparentemente stanco e svugliato, provaje - senza riuscirce ‘mpieno - a ajutà ‘a varca fattivamente. Fuje merito sujo ‘o crosso vincente p’ ‘o gollo ‘e Cavani.
CAVANI 6,5 (media ‘e 8 + 4,5: otto p’ ‘o gollo fatto, quatto e mmiezo pe cchillo magnato).Uno comme a isso nun po’ sbagglià!, Nun à dda sbagglià!...
All. Mazzarri 4.5 Francamente nun ‘o capisco! ‘Na vota cagna meza squatra, ‘na vota(comme a ajere ca Maggio e Gargano nun s’avessero avuto proprio ‘a convocà) ‘a mantene fissa quanno ‘mmece ce vulessero dduje o tre ccagne dô pprincipio! Misteri!Me dimanno comme farranno ‘sti jucature stanche d’ ajere a rejere Liverpullo e Milanno dinto a ll’arco ‘e ‘na semmana! ‘Na cosa po m’ è ttroppo chiara e cioè ca quanno ‘nu jucatore lle sta antipatico e non lle piace ‘o mette ‘e parte definitivamente.È ggià succieso forze cu Quaglia e mmo sta succedenno cu Santacroce ca sarrà vennuto a gennaio.Ma ‘nzomma pe capí, chisto che vo’? ‘Na panchina corta o una stracorta cu 13-14 curazziere eccezziunale capace ‘e rejere pe ‘na staggiona sana senza cale ‘e cundizzione,senza ‘nfurtunie, squalifiche, espulsioni, malatie, prubbleme perzunale, viaggi ‘ntercontinentali.Se è accussí o è scemo o è ‘nu spallettone (presuntuoso)! Turnanno a ajere: Mazzarri non po' nun vedé chello ca tutte vedono .......Gargano tira punizioni assurde....ajere addirittura ne tiraje una direttamente ‘nfallo laterale!!!!! Pecché nun lle dice ‘e nun se canzà ‘e tirà ‘e ppunizzioni e pecché nun ‘o sostituisce quanno sta stanco? E ppo s’ allamenta che "abbiamo giocato male" e va truvanno a Cristo dinto a lla pina: "Abbiamo mezza rosa che gioca in nazionale, partono in forma smagliante e tornano distrutti. E' un merito del Napoli avere giocatori che militano in nazionale, ma è oggettivamente un problema". Sarrà pure overo,ma si tiene ‘e siconne linee ll’hê ‘a fà jucà; si po nun so’ bbone, ‘a colpa è sempe ‘a toja ca te ll’aje scivete e ll’hê vulute!
Arbitro BERGONZI 4.5 Cierti vvote à purtato bbuono,ajere no! E i’ nun ‘o vulesse cchiú; nun è scartellato, ma è ‘na meza cazetta comme ô riesto ‘e tutte ll’arbitre italiane e se porta ancòra appriesso ‘o pisemo d’ ‘e critiche ca avette p’’e duje rigure date ô Napule (staggiona 2007/2008) contro â juventússa; ‘a tanno, quanno arbitra ‘o Napule, pe fa vedé ca nun stà abbaccato cu ‘e napulitane sisca sempe contro e ‘nzerra tutte ‘e dduje ll’uocchie cunzentenno(senza piglià pruvvedimente) all’avversarie d’ ‘o Napule (comme succedette ajere,ca primma ‘e tirà fora ‘nu cartellino giallo ‘nfaccia a ‘nu catanese, ce penzaje diece vote e arrivaje quase â fine d’ ‘a partita…) cunzentenno ‘nu juoco viulento e carugnesco (nun m’arricordo ‘e nomme... ), favezo e ammagagnato (Mascara, Maxi Lopez etc.). Purtroppo tutte ll’arbitre italiane so’ meze-cazette e ce avimmo ‘a accuntentà; allimmeno chisto porta quase bbuono! e ppo ajere ce facette ‘o favore ‘e jettà fora a culo’echiummocannavaro accussí ce ‘o simmo levato ‘a tuorno per lo meno p’ ‘a partita cu ‘o Milanno!
Ce sentimmo!
Brak