BOLOGNA – NAPOLI 10/04/11 (0 A 2)LL’AGGIU VISTA ACCUSSÍ

BOLOGNA – NAPOLI 10/04/11 (0 A 2)
LL’AGGIU VISTA ACCUSSÍ
Erano 20 anni ca nun passàvamo ‘na dummeneca accussí... Nun ce pozzo ancòra penzà ca nsino a ‘e ll’unnece d’ajeressera simmo state primme ‘nclassifica... Po ‘a difesa d’ ‘a Fiorentina fuje fuceta ‘ncuorpo e poca cosa pe ll'attacco d’ ‘o Milanno ca se spugnaje ‘a fresella comme e cquanno vulette e cchesto ggià se sapeva... fine però ce refunnette n’ata vota a Ibraimoviccio jettato fora e se pigliarrà allimmeno ddoje jurnate... Mo dummeneca ca vène âmmo assolutamente vattere a ll'Udinese ô san Paolo...e ppo vedimmo che succede visto ca ‘o Milanno ‘o prossimo turno va a Genova sponna Sampedoria ca oramaje sta luttanno p’ ‘a sarvezza mentre l'Udinese ca à dda vení a vedersela cu nnuje, si – comme pare - joca senza sancezzo è carrecata a vvrenna e ‘ penso ca ‘o Napule tène bboni pussibbilita' ‘e vencere,senza scurdarce ca ‘o calannario d’ ‘o Milanno rummane cchiú ddifficile ‘e chillo luvardo,pecché à dda ancòra affruntà deve ancora Roma e Udinese e à dda jucà contro ô Brescia e mmanco penzo ch’è una passjata; nuje è overo ca ce ll’âmm’ ‘a vedé cu Interre e juventussa, ma a ll’urdimi ddoje jurnate quanno penso ca ‘e juche ggià so’ ffatte! Pe ccuje i’ dico ca ce putimmo credere ancòra! Forza Napoli, Ciuccio fa’ tu e nun farce scetà ‘a chistu bbello suonno ca ce stammo sunnanno! E ddico grazzie a tanti pennarule jettature nurdiste ca cu ‘e barzellette lloro ce fanno accummincià bbuono ‘a semmana!!! Turnammo â partita e dicimmo ca tutto summato guagliú duraje sí e nno ‘nu tiempo sulo ‘a sfita ‘nfra Bbulogna e Nnapule: troppo mullacchione ‘e mmurtatelle rossobblú, e ghiuoco facile pe ‘nu Napule cu ‘o sanco a ll’uocchie, Napule ca passaje arrivate â mez'ora cu ‘o verdummaro (e ‘o chiammo accussí pecché è sputato tale e cquale ô verdummaro ca porta ‘a verdura â casa mia...), voglio dicere cu Mascara, ca menaje dinto ‘a pochi metre ‘na respinta troppo corta ‘e Viviano; po ‘o Napule radduppiaje dint’ô ricupero d’ ‘o primmo tempo cu ‘nu ricore ‘e Marekiaro, dicritato giustamente pe ‘na scacata (un fallo) ‘e Viviano ‘ncuollo a Llavezzi ca lanzato ‘mporta se ‘ntalliaje,facennose jettà ‘nterra dô purtiere d’ ‘e murtatelle doppo ‘na durmuta ‘e tutt’ ‘a difesa bulugnese ca sbagliaje cumpletamente ‘o fuorigioco facennose truvà tutta fora posizzione... posizione. Nchiuse ‘e primme quarantacinche minute ‘ncopp’ ô zzero a ddoje p’ ‘e napulitane , ‘a ripresa nun tenette storie ‘a raccuntà e ffuje ‘na passiata calma e mullacchiosa nsino ê tre sische ‘e ll’arbitro Orsato: Di Vaio se magnaje ‘nu paro ‘e uccasione )ca lle cuncedette ‘o solito culo’echiummo) p’arapí n’ata vota ‘a partita... e ll'unica parata De Sanctis l’êtte ‘a fà a ll'87° ‘ncopp’ a ‘nu tiro ‘a fora ‘e Cherubin. E passammo ê ppaggelle
DE SANCTIS 7 - Urdinaria amministrazione nsino a ll’87° cu ‘nu granne ‘ntervento pe ‘na bbotta ‘e Cherubin. Comme ê granne purtiere ca nun fanno niente pe tutta ‘a partita, ma â ‘ntrasatta, ô mumente uppurtuno, se fanno valé!

CAMPAGNARO 6,5 - N'ammunizzione ca nun se mmeretava e troppo pruvèceta (precoce) ‘o frenaje ‘nchiave ‘e smestute (in chiave propositiva). Ma ô ssolito nun cuncedette niente a nnisciuno dint’â zzona ‘e cumpetenza soja.

CANNAVARO 5,5 - ‘A brutta gara jucata contro â Lazzio ‘o cundizziunaje ancòra se mustraje cacazone (pauroso) e attardato(intempestivo) dint’ê chiusure e dinto a ll’ anticipe, ma – pe furtuna – senza cunzeguenze; cuncedette ddoje uccasione a Di Vaio ca ‘ncopp’ô doje a zzero, nun ne sfruttaje manco una!
RUIZ 6.5: Doppo d’esserse abbuscato ‘nu cartellino jalizzo pe ‘na bbrutta scacata (un brutto fallo) arresecaje ‘e abbuscarse ‘o siconno;ma scampato ‘o periculo cunfermaje ll’impressiona toca toca (ottima) ‘e ll’urdimi partite; quanno po facette ‘na granna smestuta ‘e cinquanta metre me parette ‘e vedé n’ata vota a Krol!
MAGGIO 6.5: Vincette chiaramente, cu ttutto ca ll’abbuttajeno ‘e mazzate (...e Orsato zitto!...), ‘o cunfronto cu Morleo. ‘A maggior parte ‘ell’azzione d’ ‘e cuane (degli azzurri) ô primmo tempo nascettero dô lato suĵo; durante ô siconno tempo facette ‘o terzino ‘e cuntenimento.
YEBDA 7: Isso e Michelino Pazienza furmajeno ‘na tica ‘nsuperabbile a prutezzione d’ ‘a difesa. Se cuncedette pure paricchie asciute (sortite) uffenzive ca rennettero apprennetiva (mísero in apprensione) ‘a retrocuardia avverzaria.
PAZIENZA 7: ‘Na schiccheria, ajere tenette ‘o piede assaje caudo e ‘o dimustraje cu paricchie smestute ‘nverticale lanzanno ‘e cumpagne. ‘A una ‘e chesta nascette ll’azzione ca se cuncludette cu ‘o gollo ‘e Mascara.
DOSSENA 6.5: Rjette cu perzunalità nsino a ll’urdemo e vincennolo ‘o cunfronto cu ‘o napulitano Buscè.
HAMSIK 7: Partenno ‘a luntano,purtaje ‘o scumpiglio dint’â trecquarta avverzaria. Guvernaje a dduvere ‘o pallone durante ô siconno tempo rallentanno a mmestiere ‘a manovra Generuso (altruista) ô mumento ‘e ll'azione ca prucuraje ‘o ricore ca po trasfurmaje cu freddezza. (Dô 76° GARGANO - s.v.)

MASCARA 6,5 – ‘Nu gollo assaje pesante e tanta fatica p’ ‘a squatra.
(Dô 60° ZUNIGA 6 – Sistimato ‘ncopp’â dritta ‘e ll'attacco luvardo quanno ‘e suoje ggià stevano ‘ncopp’ ô doje a zzero, tenette palla facenno rispirà ‘a difesa.)

LAVEZZI 6 ‘Nu punto mancante p’esserse magnato ddoje ‘ncredibbili uccasione e addirittura se fosse mmeretato ‘e pacchere! Ma avastaje ‘nu sciccuso (delizioso) córpo ‘e tacco pe farlo guadambià ‘o seje! Se strascenaje spisso arreto a isso ll’intera difesa d’ ‘e murtatelle arapenno ‘e spazzie addó se lanzajenocumme a ccane arraggiate Mascara e Marekiaro. Peccato però pecché pe cchello ca sape e ppo’ ffà, si vedesse ‘a porta s’ ‘o fumasse a Mmessi!
(‘A ll’ 86° LUCARELLI - s.v.)

All. MAZZARRI 6.5: ‘O Napule suojo vola e ppo’ cuntà ‘ncopp’ a ‘nu meccanismo ‘e juoco ormaje cullaudato e allebbrecante (reattivo)dinto a ògne situazziona.Ajere ‘mmerz’ê ttre ‘a squatra cunquistaje ‘o primmo posto d’ ‘a classifica e ‘o mantenette nsino a ll’unnece e mmeza quanno o Milanno jette a vvencere a Firenze purtannose n’ata vota annante ‘e tre ppunte; e pe mmo ‘o Napule è siconno ‘nsulitaria ‘a cuollo a ll’Interre...., ma tutto po’ ancòra succedere!

ll’arbitro ORSATO 4’: Stu tecnico ‘nfurmatico, rrobba ‘e Montecchio è ‘na meza cazetta comme â maggioranza ‘e ll’arbitre taliani. Scuntentaje a tutte quante: napulitane e bbulugnise ;scennette ‘ncampo diciso a pigliarsela cu ‘e napulitane e p’accummincià s’ ‘a scuntaje cu Campagnaro ‘ngiustamente ammunito quase a ll’inizzio e pe continuà pe tutta ‘a partita siscaje a senzo unico contro ô Napule permettenno ê murtatelle ‘nu juoco viulento, ‘ntimidatorio e simulatorio senza sanziunarlo maje;nun vulette vedé e nun siscaje ‘nu ricore a ffavore d‘’o Napule gruosso comme a ddoje case quanno ‘nu pierepetterra ca nun m’arricordo ‘o nomme afferraje pe ‘nu vraccio a Ddossena e ‘o carriaje ‘nterra; mettette ll’uoglio ‘a copp’ô peretto quanno êtte a fforza siscà ‘o ricore pe scacata (per fallo) ‘e Viviano ca stennette a Lavezzi a ‘nu metro d’ ‘a porta. Siscaje sí ‘o ricore, ma lle mancaje ‘o fecato ‘e jettà fora, comme ‘a recolamento, ‘o purtiere, urdemo ommo e ll’ammunette sulamente! Si vo’ dDio ce sentimmo lunnerí ca vène. Stateve bbuone!
R. Bracale Brak