NAPOLI – PARMA 16/09/12 3 A 1LL’ AGGIU VISTA ACCUSSÍ

NAPOLI – PARMA 16/09/12 3 A 1 LL’ AGGIU VISTA ACCUSSÍ Ajere, doppo d’avé fatto ‘o cuollo luongo p’ ‘a sospensione d’ ‘o campiunato giacché jucava ‘a nazziunala taliana (e a mme nun me ne passa manco p’ ‘a capa...visto ca so’ napulitano pe nascita e ttaliano pe fforza) ajere aspettaje ‘a rencontra cu ‘o Parma pe vedé si ‘o Napule ce fósse riuscito a vvencere ‘a terza partita ‘e fila e fósse riuscita a nun farse surpassà e a mantené ‘o passo d’ ‘a Lazzio ca a mmiezo juorno êva fatto ‘o vallo ‘ncopp’â mmunnezza a Cchievo (1 a 3) e d’ ‘a juventussa ca pe pparta soja s’arrubbaje ‘e tre ppunte cu ‘o Genoa(1 a 3) adderezzanno ‘na partita ca s’era misa malamente... e ll’ adderezzaje manco a dicerlo cu ‘nu ricore naturalmente favezo e arrubbato ‘a chillu figlio ‘e coperativa ‘e Asamoh, ca appena tesserato cu ll’ati delinquente juventine, ggià à capito ca à dda ‘mbruglià tanto se sape ca â scuatra d’ Agnelli tutto è permiso e tutto se perdona, comme dimustraje ll’arbitro Rocchi passato pur’isso ‘ncopp’ô strato paca d’ ‘a Fiatta e d’ Agnelli. Stevo dicenno ca ajere aspettaje ‘a rencontra cu ‘o Parma pe vedé si ‘o Napule ce fósse riuscito a vvencere ‘a terza partita ‘e fila. E mme dicette bbuono pecché ‘o Napule ce riuscette a vvencere pure si me facette sparpetià pecché nun fuje crestiano ‘e nchiudere ‘a rencontra ggià ô primmo tiempo quanno Cavani sprecaje ddoje o tre accasione ‘mpurtante... fine cumunque se vincette pure si me stongo ancòra magnanno ‘e mmane pe bbia ca De Sanctis e socie nun fujeno crestiane ‘e mantené ‘a porta nosta nzerrata e pigliajeno ‘na rredda ca rimettette ‘ndiscussione ‘o risultato e me facette vení m’o mammatrone nfi’ a cquanno, ô finale ‘e rencontra Insigne nun riuscette a mettere dinto ‘o pallone d’ ‘a sicurezza! Ditto chesto, passammo ê ppaggelle: DE SANCTIS 5 – Oramaje dorme sempe cu ‘a zizza ‘mmocca; ajere restaje a gguardà cu ‘a vocca aperta, senza fà niente comme ‘o pallone traseva ‘mporta. Dinto a n’ata uccasione ascette a scampule ‘e cape ‘e sacicce senza piglià ‘o pallone, lassanno ‘a porta sguarnita e pe furtuna Belfodil(lo) (o n’ato ca nun me ricordo) sbagliaje ‘o tiro. Dico: ma ch’ aspetta Mazzarri a metterlo a rriposo e a ffà jucà a rRosati? Stammo appena â terza jurnata e pe corpa soja ggià tenimmo ddoje rredde ‘ncopp’ô scartiello!E ‘sti ccose a lluogo se pavano. CAMPAGNARO 6,5 – Bbella rencontra d’ ‘o toro argentino ca praticamente nun sbagliaje niente ‘ndifesa e spisso se sganciaje annante accumpagnanno ll'aziona. CANNAVARO 6 - Nun facette danne e ringrazziammo a dDio, ma quacche vvota sguarnette ‘a difesa pe gghí a ffà, senza mutivo e zzuco, ‘o nnacchennello annante! ARONICA 5,5 - Accumminciaje bunariello, ma ‘nchiusura d’ ‘a primma mmità se ‘nzallanette paricchio, ma pe furtuna nun facette guaje; ascette pe ‘nu ‘mpiccio (infortunio) ca se prucuraje a ppe isso. (dô 46° GAMBERINI 6 - Trasette cu bbona perzunalità, facennose sèntere ‘ncopp’ê pallune aute, ma faticaje a libberarse d’ ‘o pallone nfessennose spisso a ffà periculosamente passagge e passaggielle cu culo’echiummo sotto a ll’uocchie d’ ‘e ducale, mente De Sanctis penzava ê vvacche ‘mPuglia.) MAGGIO 6,5 - Ô primmo tiempo fuje ll'arma ‘e cchiú d’ ‘o Napule. Sfunnaje quase sempe dê pparte soje vincenno ‘a sfita cu Gobbi e chella cu Lucarelli ca spisso s’ allargaje dâ difesa pe ghirlo a nchiudere;peccato ca nun ‘ncarraje ‘nu cruzzo decente! INLER 5,5 – Ajere nun le riuscette ‘e fà fammacone (filtro) annante â difesa accussí comme ce steva abbituanno;pigliaje n’inutile cartellino jalizzo ca lle cumplicaje ll’esistenza.Giustamente Mazzarri ‘o sostituette (dô 64° BEHRAMI 6 – Riescette a ddà cchiú sustanza ô centrocampo luvardo, ma sape e ppo’ ffà ‘e cchiú!). DZEMAILI 6,5 – Cugliette ‘o palo cu ‘nu bbellu tiro ‘e punizzione e facette tanta pressione (pressing) cu ccegna e dinamisemo, ma surtanto a ll’arranqua (nella ripresa) le riuscette ‘e fà ‘a stessa atalossa fatta contro â Fiorentina;tanti pallune ricuperate,tanti bboni ripartenze, ma purtroppo sbagliaje spisso ll’urdemu passaggio. HAMSIK 7,5 – Jucaje poco, ma chellu poco ‘o ffacette a mmestiere, dimustranno pe l'ennesima vota pecchè è fundamentale pe Mazzarri. Lanzaje cu rica e cumpasso a Pandev(vo) dint’ ‘accasione d’ ‘o ricore e ô mumento d’ ‘o doje a zzero détte sempe a Pandev(vo) n’ajúda (assist) a zzuco ‘e caramella. Ê mumente ‘e difficultà rallentaje a arte ‘o juoco e sul’ isso sapette lanzà a Maggio ‘mprufunnità. ZUNIGA 5 – L’atalossa d’ ‘o culumbiano nun me cunvincette:troppo melandruso (lezioso), troppu fummo e nniente arrusto; prubbabbilmente ‘o guaglione sufferette ‘e ddoje rencontre fatte cu ‘a nazziunale e ‘o ritorno ‘nritardo doppo ‘na trasvulata ca ‘un ferneva maje. PANDEV 8 – Rientraje e fuje subbeto dicisivo, dimustranno ‘e meritarse tutta ‘a cunfianza (fiducia) ca ‘a suggità lle dà: se prucuraje ‘o ricore ca sbluccaje, forze troppo ampressa, ‘a rencontra, po rializzaje ‘o doje a zzero e servette ‘nu granne pallone a Insigne, chillo ca servette a mettere ‘o punto fermo â rencontra. Tanti gghiucate ‘mpurtante,paricchie pe pruteggere ‘o pallonne servenno ‘e cumpagne.’O Napule, pe mme, nun ne po’ ffà a mmeno ‘e ‘stu guaglione! CAVANI 5,5 – ‘Nu punto mancante pecché uno comme a isso nun se po’ permettere ‘e magnarse ddoje o tre rredde!Purtaje ‘o Napule ‘nvantaggio cu ‘nu bellu ricore, se mettette ô ssolito ô servizzio d’ ‘a scuatra dànno ‘nu granne ajuto; dint’ ‘accasione d’ ‘a siconna rredda cu ‘na magaria facette partí ‘o contropiede; sí tutto overo però sprecaje malamente ddoje o tre accasione pe nchiudere ‘a recontra e cchesto nun se fa! (dô 76° INSIGNE 7 – Trasette e nun se facette pregà pe nchiudere ‘a recontra sfruttanno a mestiere ‘o bbassurero (suggerimento) ‘e Pandev(vo) e superanno a mMirante ‘a duje passe.Ô finale avette pure ll'uccasione pe radduppià, ma nun ce riuscette .’O guaglione nun è fuoco ‘e paglia è ggià ‘o san Paolo jesce pazzo pe Lorenzigno!). MAZZARRI 6,5 – ‘A scuatra facette ‘na bbona primma mmità dànno spettaculo, ma nun riuscette a cuncretizzà ‘e tanti accasione criate.Forze ‘a mancanza ‘e cuncretezza se po’ spiecà pure cu ‘a fatica ‘e ll’ambusciaggio (impegno) duppio d’ ‘e tanti nazziunali. Justa ‘a sustituzzione ‘e Cavani, (troppo ‘mpriciso), cu Insigne ca ricumpensaje ‘a cunfianza avuta, signanno ‘a rredda d’ ‘a sicurezza. è overo ca ô core nun se cumanna e ca isso è ‘nnammurato ‘e Zuniga, se songo cumprumise (fidanzati) ‘ncasa e pare ca ànnu ggià dato parola, ma ‘o culumbiano, ca aizava troppa porvera, êv’ ‘a essere sustituito! arbitro GERVASONI 5,5: Carta canusciuta nun se smentette; tenette ‘o cartellino jalizzo facile, ma soprattutto cu ‘e napulitane, mentre cu ‘e ducale fuje ‘e maneca larga! Tanto è vvero ca ô mumento d’ ‘o ricore sacrusanto ‘mmece d’ ‘o jettà fora se limitaje sulamente a ammunirlo a mMirante che s’era menato, urdemu ommo, ‘ncuollo a Pandev(vo). Cunchiudenno che putimmo dicere? Dicimmo ca 'o ‘mpurtante è vencere,ma mo nun ce muntammo ‘a capa; p’ ‘o mumento stammo tenenno ‘o passo d’ ‘a Lazzio (furtunata) e d’ ‘a juventus(sa) (mariola)... e penzammo a ccampà juorno pe gghiuorno, rencontra doppo rencontra senza parlà ‘e scutetto o ‘e piazzamento.Po ‘e cunte ‘e facimmo a ll’urdemo, sott’ô lampione! P’ ‘o mumento âmm’ ‘a penzà sulo ô Catania e ppo â Lazzio ca i’ tengo ‘ncopp’â ponta d’ ‘o vernecale! Si dDi’ vo’ ce sentimmo ‘a semmana ca vène speranno ca fraditanto ggiovedí nun ce ‘ntussecammo. Staveti bbe’! R.Bracale Brak