NAPOLI – BOLOGNA 19/12/12 coppa italia (1 A 2)‘A VEDETTE ACCUSSÍ

NAPOLI – BOLOGNA 19/12/12 coppa italia (1 A 2) ‘A VEDETTE ACCUSSÍ E che ne parlammo ‘a ffà guagliú! Cca ce à cacato ‘o cane niro o ce ànnu menato ‘a favetta... e addimannate a cchillu cestariello ‘e gGiggino-uocchie stuorte! Cert’è ca ajeressera (stessu peccato e stessa penitenza...) - comme jette e comme venette -, ‘o Napule frisco virolo ‘e Cannavaro scualificato, nun se levaje ‘e paccare ‘a faccia, chille paccare ca dummeneca passata aveva asseccato dô Bologna e perdette n’ata rencontra cu ‘a scuatra ‘e Poli facenno n’ata granna fijura ‘e mmerda... ca ato ca metterse scuorno, s’êsseno avute tutte ‘mparanza nchiuderse dinto a ‘nu cesso e nun ascí cchiú! Cunchiusione d’ ‘a tarantella: ‘o Napule , campione ‘ncarrica d’ ‘a cumpetizziona, avette ascirsene sott’ô colpo dâ Coppa Italia e ‘o ffacette comme pejo nun se putesse fà, paccheriato ‘ncasa pe ddoje a uno ‘a ‘na scuatra ‘mbuttunata ‘e riserve. E nun è a ddicere ca se trattaje d’ ‘o contraccolpo pe cchello ch’era succieso cu ‘a famosa sentenza ca ‘ncampiunato aveva fatto sciulià ‘a scuatra ô quinto posto … No, no! ‘A verità overa è ca ‘e cuane nun ne tenono cchiú e stanno attraverzanno ‘nu mumento assaje dellicato, forze ‘o cchiú bbrutto d’ ‘a gestione Mazzarri e (si nun aggiu perzo ‘o cunto) so’ ttre fullé ‘e fila ca ‘e pigliammo ‘ncopp’ê rrecchie. Ajeressera perdetteno ll’urdema cuincidenza pe salvà ‘na tempurata, ca a ‘stu punto, primma fernesce meglio è! ‘A scuatra, accummincianno ‘a ll’allenatore,nun ce sta cchiú né cu ‘a capa, né cu ‘e ccosce e pure si a gennajo De Chiacchiaroniis, Bidòn(no) e socie ‘ntervenono seriamente(cu ‘e sorde e nno cu ‘e chiacchiere) ‘ncopp’ô mercato sta a rriseco overamente ‘ncampiunato ‘e fallí ll’ubbiettivo minimo: chillo d’ ‘o terzo posto. Passammo ê ppaggelle va’ e ppure ‘sta vota nun pozz’ essere largo ‘e maneca: DE SANCTIS 5: Proprio nun ce simmo: nun se ponno piglià ddoje rredde comme a cchelle d’ajere: una cu ‘o pallone ca te passa pe ‘mmiez’ê cosce, e n’ato cu ‘na botta ‘a vinte metre... Overo ca all’arranqua facette dduje ‘ntervente straurdinarie, ma nun dètte maje ‘a sicurezza nicessaria ô reparto. Jucaje cu ‘a fascia ‘e capitano al ô vraccio, ma nun le servette a nniente! E De Sanctis è accussí, Rosati piezzo e ppejio... cca s’ànn’ ‘a accattà dduje bbuoni purtieri: Bardi e pPegolo! CAMPAGNARO 5,5: Dicimmo ca fuje ‘o meno peggio ‘e ‘na difesa ca facette acqua. Pare ca se ne va. Se vede ca s’è sfastediato ‘e stà ‘mmiezo a ‘nu presepio comme a cchillo cuano! FERNANDEZ 4: Accumminciaje bunariello,cu ccegna e cumanno..., po chianu chiano e nun capisco ‘o pecché se ne scennette ‘e posa nfi’ a risultà ‘o peggio d’ ‘o mazzo e nfi’ a ffà quacche grossa puttanata comme a cchillu passaggio arreto ca pe ppoco nun favurette a Pasquato.Chisto è ‘nu mistero: joca cu ll’Argentina e è ‘nu campione, joca cu ‘o Napule e è scadente... ( dô 75° ZUNIGA s.v.) BRITOS 5: Pure pe isso ‘nu passo arretto a ppietto ‘e ll’atalosse ‘e ll’urdemi vvote. Forze pavaje ‘o siconno fullé dinto a ttre gghiuorne o se penzaje ca ‘a facenna fósse semprice... cert’è ca nun me piacette nè a mme, nè a cchille d’ ‘a tribbuna divano, viecchi tifuse! MESTO 5: Pe ccerto fisicamente cchiú ‘nforma ‘e Maggio ma nun se facette nutà ca ‘nu paro ‘e vote. INLER 5: Ancòra ‘na vota se truvaje a avé a cche ffà cu ‘na scuatra cumpattata,’ntruppecosa, difficile ‘a scuzzecà,‘na scuatra cumpattata ca nun cuncedette ô turco-napulitano ‘o spazzio nicessario pe ddà ê cumpagne suje pallune ‘nteressante e cumminfatte fuje custretto a paricchi fullune ‘nfase ‘e ‘mpustazzione. DONADEL 4,5: E’ a ccurto ‘e priparazziona e se vedette.Ê vvote se jette pure annascunnenno. Me fósse aspettato ca o isso o Dossena fósse juto a ffà muro annante ô solito Kone quanno chisto tiraje e ce arruvinaje ‘a serata..., ma chi t’ ‘o ddà? Forze à ggià capíto o saputo ca nn’ ‘o vonno caccià! DOSSENA 4,5: Pure isso venette servuto poco e malamente, ma pe pparta soja, sbagliaje tutt’ ‘e ghiucate cu amàrteme e fullune ‘ncopp’ê cruzze, rrobba ‘a pigliarlo a ppacchere! (81° INSIGNE s.v.) EL KADDOURI 5: Partette bunariello zumpanno spisso ll’averzario po – te saluto e sóno - sparette nfi’ a scumparí dô juoco.(60° HAMSIK 5,5: Trasette e saccudiaje ‘a scuatra, ma fuje pe poco e nun avastaje!) PANDEV 5: Tanti buoni muvimente ma pure ddoje rredde (ca putevano significà qualificazziona) magnate annante ô purtiere! E che saciccio! CAVANI 6: Nun sulo pecché signaje ‘a rredda (‘a vintunesima d’ ‘a tempurata) ca ce facette vedé ‘a luna ‘int’ô puzzo.Jucaje cu ccegna e vulio e sultanto ddoje granni pparate ‘e Stojanovic lle levajeno ‘o sfizzio d’ ‘a pareglia! Se fósse pure abbuscato ‘nu ricore pe falta ‘e Portanova ca ‘o cauciaje..., ma ll’arbitro dicette ca no! All. MAZZARRI 4,5: Quanno ‘na scuatra perde ‘a sfarma è ssempe pure ‘e ll’allenatore e si Mazzarri se passa ‘a mana p’ ‘a cuscienza capisce addó à sbagliato accumincianno dâ panca. Se vo’ piglià n’anno ‘e riflessione? E s’ ‘o pigliasse ampressa, ce facesse stà cuiete! l’arbitro DOVERI 4 ‘E stima e pe nun averce dato ‘nu ricore sacrusanto; ma se tratta’e carta canusciuta e m’aspettavo pure ‘e pejo ‘a ‘stu guaglione, ‘mpiacato (nun se sape ‘e che) vulterrano ‘e trentacinche anne abbituato ‘ncampiunato o ‘ncoppa itaglia a trattà ‘na chiaveca ‘e scuatre meridiunale. E cu chesto ve saluto e ce sentimmo, si dDi’ vo’ â prossima vota R.Bracale Brak