BARCELLONA – NAPOLI amichevole (6/8/14) 0-1 ‘A VEDETTE ACCUSSÍ

BARCELLONA – NAPOLI amichevole (6/8/14) 0-1 ‘A VEDETTE ACCUSSÍ Ajeressera a gGinevra scicco fullè ammestuso (lussuoso match amichevole) ‘nfra ‘o Napule e ‘o Barcellona, ca cunzentette a don Rafele ‘e mettere â prova ‘e jucature suĵe contr ‘ a una d’’e scuatre cchiú mmeglie d’ Airopa. Overo ca ‘o Barcellona êtt’’a fà a mmeno ‘e quacche elemento, ma pure don Rafele s’êtt’’a privà ‘e quaccuno d’’e suĵe appena acchianatese (rientrati) a Castelvolturno doppo d’’e fferie e sto parlanno ‘e Fernandèzzo, D’Henrique e d’hHiguainno. Sinamparco ‘o fullè fove ‘nteressante e divertente e soprattutto ‘o Napule vincette, cosa ca fa sempe piacere e nnuje, ‘ntribbuna divano, nun ce chiagnettemo ‘e diece evere rijalate ô presidente ca ‘e ‘na manera o n’ata se sta magnanno ‘o tuppo nuosto...’Nzomma se vincette pure si sultanto pe uno a zzero e ttutto summato p’’e guagliune ‘e don Rafele fove ‘nu bbuono esame pure si ‘o Barcellona mancava ‘e quacche nomme ‘mpurtante e Luísso Enrique a ll’arrancua facette addirittura nove cagne mannanno ‘ncampo tanti guagliune, ca però,proprio pecché frische e guagliune, curretteno assaje cercanno ‘e mettere ‘ndifficultà ‘e cuane; ma nun ce riuscetteno e ffenette pe zzero a uno ‘nfavore d’’o Napule, ca dimustraje ca si ce sta ancòra quaccuno ca â dda faticà, sta ggià a ‘nu bbuonu punto e è ggià pronto p’’o prevío (preliminare) ‘e Ciampionsa. Passammo ê ppaggelle: RAFAEL 7,5 Muorto ‘nu papa se ne fa sempe n’ato! ‘O Napule ll’à tenuto sotto a ‘na voccola chiammata Reina, pe n’anno sano..., ma mo è ‘o mumento ‘e ‘stu guaglione, diaducco (erede) ‘e Julio Cesare, ‘mporta â nazziunala brasiliana; ajeressera salvaje miraculosamente e ddoje vote ‘ncopp’a Munírro e ffove sempe attiento quanno ascette. Se ripetette ô finale ‘ncopp’a Deulofeu.’Na sicurezza. MAGGIO 5,5 Quacche pprano (errore) ‘e troppo quanno agghistraje (agganciò) malamente quacche pallone facile; p’’o riesto rummanette a ambuscià (presidiare) ‘a camma soja (la sua zona) accumpagnanno poco o niente ll'azziona. (dô 46° MESTO 5 Casinista quanno appressuraje (spinse), facette ‘na grossa fessaria ‘ncopp’a Jordi Alba ca avette via libbera verz’â porta nosta; pe ffurtuna ca Pedro nun apprufittaje!) ALBIOL 7+ Se mettette cu ‘a bacchetta d’’o direttore d’urchestra ‘mmano e ccumannaje a mmestiere tutt’’a tràsera (difesa)nun cummettenno manco ‘nu sfregazzo (sbavatura)e facennose apprezzà pe tant’ati bbelli ‘ntervente. (da ll’ 85° LUPERTO sv – Mannato ‘ncampo pe ddarele ‘a suddisfazziona ‘e jucà quacche mminuto contr’ô Barça,’o guaglione d’’o '96 nun sfiguraje.) KOULIBALY 7,5 ‘Stu Panzanato ‘e ciucculata, nun è cchiú ‘na surpresa; pure ajeressera, e ccontr’ô Barça, no contr’ô si’nisciuno ‘nnIndonesia!, confermaje tutte ‘e cqualità fisiche e tenniche fatte vedé precedentemente a dDimaro e contro Paocko e cKallonì! Me piacette pecché duminaje ancercanno (anticipando) e ‘ncopp’ô juoco auto, nè me dispiacette quanno nun ce penzaje ddoje vote pe ffà quacche trasuta tosta e ssenza pietà! BRITOS 6 Miso ‘ncampo ancòra ‘na vota comme terzino esterno ‘e mancina nun appressuraje (spinse) praticamente maje ma assicuraje ‘a nicessaria ‘urostía (solidità) difenziva (dô 46° GHOULAM 6- A ppietto d’’o cumpagno ‘e sezziona [reparto] appressuraje [spinse] ‘e cchiú, ma nun sempe fove priciso quanno cruzzaje [crossò].) JORGINHO 6,5 - Fove ll'ommo d' assiesto (ordine) d’’o centrocampo luvardo (azzurro). Mantenette ‘a calma pure quanno ‘nu certo Sergi Busquètso ‘o pressaje cercanno ‘e levarle ‘o sciato;dimustraje ‘e stà criscenno juorno pe gghiuorno sia fisicamente ca p’’o carattere.Jette ‘nu poco dint’ê chiavette sulo quanno ll’avverzarie partetteno ‘ncontropiete. (dô 61° INLER 6 Mettette súbbeto a ddisposizziona d’’a scuatra soja tanta perzunalità, riuscenno a essere ‘mpurtante sia annante â tràsera (difesa) ca quanno prupunette juoco!) GARGANO 5,5 Se ‘mpignaje, nun dico ‘e no e ce mettette tantu muvimento..., ma nun se ponno fà ‘e cutalette d’annecchia cu ‘a carne ‘e cavallo e sse vedette: Iniesta ‘o superaje spisso cu eculía (disinvoltura) e ‘o Mota sbagliaje troppi bbassurere (suggerimenti), nè riuscette maje a aizà ‘a capa pe renderese conto ‘e chello ch’êv’’a fà! (dô 71° DZEMAILI 7 Facette chello ca sape fà, cumpresa ‘na cagliosa ‘a quaranta metre ca chijaje ‘e mmane ô purtiere Bravo e assicuraje ‘a rredda d’’a nichessa [vittoria]finale ‘nfra ll’applavuse d’’o pubblico sguizzero; p’’o riesto se pusizziunaje bbuono a trancàra (scudo) d’’a tràsera [difesa].) CALLEJON 6,5 Facette ‘na fessaria ca c’êsse pututo custà caro, ma po se repigliaje furnenno n ‘atalossa (prestazione) ‘e qualità e cquantità, rincurrenno ll'avverzario ‘ncopp’a ttutta ‘a curzia. (dô 71° ZUNIGA 4 Miso ‘a don Rafele a ffà ll’esterno auto ‘e dritta fallette ‘a prova dimustranno ‘e nun essere a ll’aldezza e soprattutto d’essere ancòra fora cundizziona. Sperammo ca ‘o truvasseno a vvennere pecché nun m’’o fido ‘e vedé cchiú, manco ‘ntribbuna a ‘stu delinquente ca, doppo chello ca facette a Neymarro ‘mBrasile, po’ gghí a gghiucà sulo cu ‘a juve,chianchiero, ‘mmiez’ê chianchiere! ) HAMSIK 6,5 - Bbona ll’atalossa (prestazione) d’’o capitano ca fove sempe presente dint’ô juoco,dànno ‘na mano ê duje mediane Gargano e gGiorgignoe ssuperannose quanno se trattaje ‘e mannà ‘mporta ‘e cumpagne; p’’o riesto fove isso l’aniello ‘nfra centrocampo e attacco. Cercaje pure ‘a porta cu ‘na granna cabbesera (testata), ma ‘o purtiere Bravo lle dicette ‘e no cu ‘na granna parata.Ancora quacche gghiuorno e ppo penzo ca Marekiaro se fa truvà pronto ô nuvanta pe cciento! (dô 71° VARGAS 4 Miso ‘ncampo largo risultaje inutile e aizaje porvere e ffummo.) INSIGNE 5,5 Se facette vedé cu quacche bbona jucata durant’ô primmo ajone, ma po a ll’arrancua (ripresa) se ne scennette ‘e posa malamente. (dô 60° MERTENS 5,5 Ancòra lunto da ll’arriba [top] d’’a cundizziona, pruvaje quacche surtita, ma senza cunvinziona; ll’âmm’’a aspettà!) DUVAN 5 Se facette ‘ntrappulià dint’â morza ‘e Piqué e bBartra. Sempe cchiú matarazzo ‘e sbreglie facette fatica a cumbinà cu Insigne e ccu cCagliecònno. Avette ll’accasiona bbona pe ssignà ‘ncopp’a ‘nu bbellu cruzzo d’ Insigne, ma rummanette nchiummato ‘nterra e nnun ce arrivaje. (dô 46° MICHU 5.5 Me spiace ‘e me ripetere, ma ll’aggi’’a fà: ‘o giuvinotto cupuliaje (dialogò)bbuono cu ‘e cumpagne favurenno ‘o sviluppo d’’a manovra e attaccanno pure ‘mprufunno;’a tennica ce sta..., chella ca manca ancòra è ‘a cundizziona fisica. ‘O guaglione però s’ à dda dà ‘na mossa; à dda faticà ‘e cchiú: nun ‘o putimmo aspettà n’eternità!) BENITEZ 6+ ‘E stima e ppo pure pecché ce à dato ‘a suddisfazziona ‘e vencere n’atu fullé (partita) e ffarlo contr’ô Barça, fa piacere assaje. Ajere don Rafele dimustraje ca si è overo ca oramaje ‘e jucature cuane teneno n’anno ‘e cchiú è ppure overo ca se cunosceno meglio e cunuscenno meglio ‘o campiunato, ponno overamente dà ‘o mmassimo; a ‘stu punto so’ quase certo ca don Rafele mette a pposto a mmestiere ‘o mumento difenzivo, visto ca cca ‘nnitaglia nun se vence niente senza ‘na tràsera (difesa) forte. Don Rafele cunosce bbuono ‘e meccaniseme difenzive e ppo’ organizzarce, pure si ‘a mentalità soja ‘o porta a custruí ‘o juoco senza penzà troppo a ll’avverzarie. Me so’ cunvinto ca chesta è ‘a tempurata (stagione) bbona pe ffà granni ccose. Accussí sperammo! E cu cchesto ve saluto e ve dongo appuntamento, si dDi’ vo’, â prossima vota ca, si nun sbaglio, è mmarterí ca vene! R.Bracale Brak