MEZEMANECHE MMENGIUNGGHIATE

MEZEMANECHE MMENGIUNGGHIATE (mezzemaniche pasticciate) chello ca serve pe 6 perzone: 600 gramme ‘e mezemaneche, ‘nu bicchiere d’uoglio ‘aulive dunciglio, ‘na cepolla ndurata ‘e Muntoro ammunnata e ntretata, 300 gramme ‘e passata ‘e pummarola, 200 gramme ‘e pancetta affummecata tagliata a vvarriglie (cm.5 x 2 x1) 300 gramme ‘e ricotta ‘e pecura, ‘nu bicchiere ‘e latte retunno caudo, 50 gramme ‘e funge sicche, ammullate e spremmute, 2 cucchiare ‘e pesielle frische o surgelate, 100 gramme ‘e caso pecurino rattato finu fino, sale fino e pepe janco macenato a ffrisco q.n.s., sale duppio ‘na vrancata, ‘nu tuppeto ‘e prutusino lavato, asciuttato e ntretato finu fino. comme se fa: Dinto a ‘na prupurziunata tiella a sponne aute ricà ll’uoglio e a ffuoco allero fà piglià culore ô ttrigliato ‘e cepolla; agnadirve ‘e varriglie ‘e pancetta affummecata e farle suassà pe cinche minute. Agnadirve ‘e 50 gramme ‘e funge sicche, ammullate e spremmute,e ‘e duje cucchiare ‘e pesielle frische o surgelate;auní ‘a passata ‘e pummarola, accuncià ‘e sale fino e ppepe, allungà cu mmiezu bicchiere d’acqua vullente e ffà cocere pe n’ ati ddiece minute. Àrvere teniente teniente ‘e meze maneche dinto a ‘na caurara cu abbunnante acqua vullente salata (vrancata ‘e sale duppio) e, ‘na vota sculate, revacarle dint’â tiella ammiscannole a mmestiere pe farle ‘nzapurí a ffuoco miccio; e ssempe a ffuoco miccio agnadí ‘a ricotta dellajata cu ‘o bicchiere ‘e latte retunno caudo; ammiscà e sempe a ffuoco miccio fà ‘nzapurí pe tre minute. Fora dô ffuoco derrammarve ‘a coppa ‘o tuppeto ‘e prutusino lavato, asciuttato e ntretato finu fino, ammiscà n’urdema vota e ‘mpiattà cumpletanno ‘e piatte cu ‘o ccaso rattato e abbunnante pepe janco mmacenato a ffrisco.Serví súbbeto. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà. Mangia Napoli, bbona salute! Scialàteve e cunzulàteve ‘o vernecale! Raffaele Bracale