NAPOLI – PALERMO 3 A 3 (24.09.2014) ‘A VEDETTE ACCUSSÍ

NAPOLI – PALERMO 3 A 3 (24.09.2014) ‘A VEDETTE ACCUSSÍ I’ nun ce pozzo credere, guagliú!Ajeressera ô san Paolo, ‘nnante a ppoca ggente, ‘o Napule upposto ô Palermo addizziunaje ‘nu scartellato pareggio e mmanco se decidette a mmettere mano ô campiunato vincenno largo pe ffà vedé chi è giacché doppo ll’arresecata nichessa (vittoria) contr’ô Genoa â primma jurnata aveva cullezziunato ddoje sfurtunate paccheriate contro Chievo e Udinese e fósse stato proprio nicessario vencere e vvencere largo soprattutto pe dà ‘na mana a ddon Rafele a vvení fora dâ cuntestazzione ‘e cierti tifuse. Ma chi t’’o dà?! Accussí nun ffove, nun se vincette e se perdette ‘na granna accasione visto ca tre vvote ‘nvantaggio, ‘e cuane se facetteno arrivà pe ttre vvote! Ll’ànn’ âccidere e nun ll’ànn’ ‘a pavà! Passammo ê ppaggelle: RAFAEL: 5 Me dispiace d’’o ddicere, ma Reina era n’ata cosa! Quaccuno ll’êss’’a spiecà ca, gruosso comm’è, ‘ncopp’ê tire ‘e squina (corner) à dda essere ‘o padrone d’’a camma (area) cuana e à dda ascí isso a ppigliarese ‘o pallone visto ca ‘e cumpagne nun so’ cca...nna d’’o ffà. Pressempio ajere, ‘mmece ‘e ascí rummanette ‘mmiez’ê pale e Belotti ‘o casticaje.Pure ‘ncopp’ô tiro ‘e Vazquèzzo êsse pututo tentà coccosa ‘e cchiú,mentre nun ce putette fà niente ‘ncopp’ô siconno stuco (gol) ‘e Belotti. HENRIQUE: 5 Serata no d’’o brasiliano ca facenno ‘o controfijura ‘e Maggio nun appressuraje (spinse) cu ‘a nicessaria cuntinuità, nè strignette a ccentro pe ttentà d’anticipà a Vazquèzzo ca se pigliaje ‘o lusso pure ‘e farle dduje tunnèlle;lle mancaje ‘o passo e ffove troppo facile pe Dybala superarlo ‘nvelocità. ALBIOL: 5.5 Quacche ‘ncertezza ‘e troppo,sufferenno assaje quanno nun liggette ‘a pusizziona ‘e chi arrivava pe ddereto. Sbagliaje pure nun sulo quanno lassaje ca Gargano [ch’è ‘nu ze’ pochiello] cuntrastasse ‘e capa a bBelotti, ma pure ‘ncopp’ô terzo stuco (gol) d’’o Palermo, quanno sempe Belotti se ‘nfilaje tra isso e Koulibaly. KOULIBALY: 5,5 (media ‘nfra ‘o 7 [p’’a cabbesera (colpo di testa) ca ce dette ‘a ggioja ‘e ll’uno a zzero ] e ‘o 4 p’’e ffessarie fatte ‘nmarcatura.’Stu guaglione à dda crescere! GHOULAM: 5 ‘O peggio lla ddereto, cummettette tanti fessarie cunnite ‘a troppi sfregazze (sbavature)cumincianno dô spazzio cuncesso a mMorganella e cuntinuanno cu ‘e tante rinvie fatte a cap’’e saciccio; p’’o riesto appressuraje (spinse) poco e malamente. INLER: 5 Serata cu ‘o sibbemolle p’’o turco-napulitano ca nun ce stette né cu ‘o penziero, nè cu ‘e père...Nun dètte cupertura â tràsera (difesa)e ‘a manovra prupusitiva fove sempe bradosa (lenta) cuncedenno accussí a ll'avverzario ‘e chiuderse. GARGANO: 6.5 ‘A surpresa d’’a serata; ce mettette ‘a solita cegna (impegno) a prutezziona d’’a tràsera (difesa) senza fà mancà ‘a mana soja a ll’epata (fase) attiva; ‘nu capolavoro ll’ajuda (l'assit) pe Cagliecònno e assaje bbella ‘na palla misa dinto pe zZapata, ca nun ‘a sfruttaje. CALLEJON: 6 . bBuoni segnale dô spagnolo: migliurata ‘a ‘ntesa cu ‘e cumpagne e ‘o muvimento senza palla; assaje bbello ‘o diacunale ca ce dètte ‘o terzo stuco (gol); peccato ca a ll’arrancua (ripresa), stracquo p’’a fatica fatta ‘ncupertura,facette poco fermannose pe risciatà! HAMSIK: 5.5 Nun ce simmo, nun ce simmo: fovetroppo braduso (lento) e ssenza cegna(grinta) nicessaria; ajere pareva spaisato e ffove sempe fermato dint’ô mmeglio,addirittura annante a sSorrentino, perdenno ddoje bboni accasione. (Dô 65° DE GUZMAN: 5 Liggiero dint’ê cuntraste nun dètte chello ch’uno se fósse aspettato). MERTENS: 5,5 Partennno a razzo, criaje superiorità nummereca, ma nun le riuscette ‘e truvà ‘a porta. Peccato ca fove fuoco ‘e paglia e dduraje assaje poco stutannose cu ‘o ppassà d’’e minute. (Da ll’ 83° INSIGNE: s.v. Cu ssulo pochi minute a disposizzione, facette chello ca puteva fà: ‘nu bellu pallunetto pe Higuaínno e un buonu cruzzo (cross).Nient’ato. Zapata: 6.5 Surprennente, fove prutacunista ‘e ‘na cratista atalossa (ottima prestazione): tanti scatti p’attaccà ‘e spazzie, ‘nu bbellu tiro spettaculare a ggiro justo dint’ô sette; se jette a cunquistà ‘na falta (un fallo) dint’â camma ‘e ricore palermitana, ma Doveri nun vulette vedé e nun le dette ‘o ricore ca forze êsse cagnata faccia ô fullè (match) . (Dô70° HIGUAIN: 6 Pochissimi pallune p’’o Pipita e pparicchie ca nun se putevano guvernà; isso però pruvaje a ffarese spazzio ‘nfra ‘e mmaglie avverzarie). BENITEZ: 5 Me dispiace d’’o ddicere,ma avette ‘a ‘mpressione ca se ne vo’ jíe aspetta d’essere licenziato; pure ajere don Rafele avette ‘e sfarme (colpe) soje; avette ‘a sciorta ca Zapata facette ‘na bbella atalossa (prestazione) e ca Gargano facette cchiú ‘e chello ca sape fà; ‘ncumpenso Marekiaro fove troppo spaisato e mme parette ca nun truvaje maje ‘a pusizziona, ‘o centrocampo [addó se venceno ‘e fullè] cu ssule Gargano e Inlerro nun me cunvincette; pe nun parlà po d’’e solite prane (errori)difesenzive ‘ncopp’ê ppalle fremme e ‘a mancanza ‘e cupertura d’’e centrocampiste e de ll’esterne. E s’êsse ‘a decidere a spiecà ô purtiere ca p’ascí nun à dda aspettà ‘e avé ‘o sfratto! l’arbitro DOVERI 3 ‘E poca stima, trattannose ‘e carta canusciuta abbituato ‘ncampiunato o ‘ncoppa itaglia a trattà ‘na chiaveca ‘a scuatra cuana. Cumminfatte ajere ‘nfromme ‘o vedette m’êtte ‘a rattà a ssanco... e facette bbuono, visto ca nun ce salvajemo dê ddicisioni strampalate ‘e ‘stu guaglione, ‘mpiacato ( ma nun se sape ‘e che) vulterrano ‘e trentaseje anne, ca nun c’êsse pututo trattà peggio ‘e chello ca facette nun siscanno ‘o sacrusanto ricore ‘ncuollo a zZapata e facennoce ati fetenzielle assurtite! ‘Nzomma, chello ca fove e cchello ca nun fove manco ajere arrivaje ‘a nichessa (vittoria) ca ce fósse servuta e ‘o fatto s’è ffatto ‘nzipeto: quatto fullè, quatto punte: media retrocessione â bbellezza ‘e quatto punte dô terzo posto! Mannaggia a cchello ca nun se po’ ddicere! E cu chesto ve saluto e ce sentimmo, si dDi’ vo’ dummeneca ca véne doppo d’’o fullé ‘e dummeneca contr’ ô Sassuolo ‘e culo’echiummo. E abbiammo a ffà corne! R.Bracale Brak