NAPOLI-SLOVAN BRATISLAVA[E.L.] (11/12/14) 3 A 0 ‘A VEDETTE ACCUSSÍ

NAPOLI-SLOVAN BRATISLAVA[E.L.] (11/12/14) 3 A 0 ‘A VEDETTE ACCUSSÍ Ajeressera ‘o Napule scennette a gghiucà ô san Paolo contro ‘o Slovànno Bratislava, ‘nnante a ssulamente quatto gatte ,cosa ca se spiecaje facilmente tenenno presente ca nun se trattaje ‘e ‘nu fullè ‘e cartiello, dàtosi ca ‘o Slovànno Bratislava venette ô san Paolo cu ll’etichetta ‘e urdema d’’a classe e ddàtosi ca ‘o mumento cuano nun fove esattamente pusitivo; pe gghionta ‘e ruotolo ce fove ‘a cuncomitante diretta televisiva ‘nchiaro. Pe ccuje la quale si tanto me dà tanto fove nurmale ca nun s’arrivaje a cinchemila spettature ‘ncopp’ê bbemate (spalti) d’’o san Paolo. A ll’uommene ‘e don Rafele sinamparco (comunque) servette ‘na nichessa (vittoria) pe se garantí ‘o primo posto dint’ô ggirone, speranno accussí ‘e avé ‘nu surteggio cchiú ceniero (morbido) lunnerì. E, comme ‘o Cielo vulette, accussí ffove: ‘o Napule vincette e vincette bbuono. cunzignanno tre purpette ê sluvacchiane ca se ne jetteno carreche ‘e maraviglia! E ce ll’aspettavemo tutte quante ca ‘e cuane facesseno cchiú d’’o duvere lloro pe ffarece scurdà ll’urdema delusiona ‘ncampiunato, chella cu ll’Empoli e ppe ppigliarese ‘nu bbuonu efudío (viatico) p’’a trasferta ‘e dummeneca a ssera contr’ô Milanno a ssan Siro. E, comme ‘o Cielo vulette, accussí ffove! Passammo ê ppaggelle: ANDUJAR s.v. A ll' estreía (esordio) cu ‘a maglia luvarda (azzurra) facette praticamente ‘o spettatore pe ttutt’’a serata ‘a fora ‘e n’asciuta inutile e spericulata quanno jette a sbattere ‘nfaccia a cchilli dduje cummò cu ‘o specchio [Koulibalý e bBritòsso] e nun tenette ‘o cuorio d’’e mmenà ‘nterra pe respingere ‘o pallone, ca – comminfatte – nun riuscette a ccogliere! ‘Sti ccose nun s’ànn’’a fà; ‘e bbuono ‘o fatto ca parlaje cchiú d’’o calannario distribbuenno ê cumpagne cazziatune e gghiastemme assurtite, proprio ô ccuntrario ‘e chillu prevatariello ‘e Rafiluccio ca s’astipa ‘o sciato e nun parla maje. MAGGIO 5,5: Appressuraje (Spinse) bastantamente, ma – ô ssolito – nun ‘ncarraje ‘nu cruzzo (cross); forze êsse pututo attreví (osare) ‘nu poco ‘e cchiú dàtosi che dê pparte soje nun succedette niente ‘e periculuso. KOULIBALY 5,5: Quacche pprano (errore) ‘e troppo a ll’epata ‘e plantamiento (in fase di impostazione),cosa ca nun sta e ca s’à dda migliurà visto ca don Rafele è ‘a isso ca vo’ ‘a vermutta quanno s’accumencia ll’azziona. BRITOS 6: Certo ca a ppietto cu ll’Empoli ‘o Slovànno nun po’ ffà testo, ma miso ‘mpusizziona centrale pe rimpiazzà a uno d’’e titulare ll’ècchese bbulugnese s’ ‘a sbrugliaje assaje meglio d’ Henrique ca – pe mme – joca meglio comme terzino esterno. GHOULAM 6: Se facette vedé spisso dint’â trecquarte avverzaria ‘mmentànnose quacche idea ‘nteressante p’’e cumpagne, comme chillu cruzzo (cross) ca fruttaje ‘o tre a zzero ‘e Zapata. INLER 6,5: Tuccaje tanti pallune sbaglianno poco o niente. Sfresaje (sfiorò) pure ‘nu stuco (gol) cu ‘nu bbellu tiro ‘a luntano. GARGANO 6: Pe ‘na serata, padrone d’’a mediana, currette tanto ricuperanno pallune e cercanno ‘o bbassurero (suggerimento) pure si cu ppoca pricisione. MERTENS 7: ‘Ncriscenza doppo d’’o bbruttu ‘mpiccio ca lle capitaje cu ‘a nazziunala soja, ajeressera ce facette diverití pe ccomme se costruette ‘o tiro, assaje bbello e ‘nteliggente ca ggià ô sesto minuto d’’o primmo ajone principaje ‘a tarantella ô san Paolo. Participaje pure a ll’azziona d’ ‘o dubblato (raddoppio)cu ‘na timmuría (punizione) a ccucchiaro ‘ncopp’ô pere ‘e Marekiaro.( Dô 62° DE GUZMAN 6: Don Rafele ‘o piazzaje a mmancina ca nun è ‘a pusizziona soja, ma ll'ulandese sinamparco (comunque) nun sfiguraje). HAMSIK 7,5: Jucaje pe ttutte ‘e nuvantatré mminute, muvennose bbuono, signaje pure ritruvanno ‘a vivacezza (verve) d’’e tiempe bbelle ‘e ‘na vota. Forze, pe ggrazzia ‘e dDio, sta riturnanno a essere isso! CALLEJON 5,5: Miso ‘ncampo a ssurpresa sciupaje ‘nu paro ‘e bboni accasione cuntinuanno cu ‘o mumento scuro ca ggià dura ‘a paricchio. (Dô 74° MESTO sv). ZAPATA 6,5: Ajeressera durante ô primmo ajone, quanno sciupaje troppi accasioni, cchiú ca ‘nu jucatore me pareva ‘nu cavallo ‘e Bellomunno. Jette assaje meglio a ll’arrancua ( nella ripresa) quanno cercaje spisso ‘o stuco truvannolo ô 75° doppo n’azziona perzunale ‘nzistita e preputente. Accummencia a essere difficile tenerlo fora! (Dô 78°HIGUAIN sv). ALL. BENITEZ 6: Nun voglio dicere ca ‘o Napule facette ‘o vallo ‘ncopp’â mmunnezza, ma fove troppa ‘a differenza tecnica ‘nfra‘o Slovanno e ‘a scuatra ‘e don Rafele ca mannaje ‘ncampo ‘na furmazziona andivinata ca purtaje ‘mpuorto, senza nisciuno prubblema,ll’àstaga (missione) ‘e cunquistà ‘ primmo posto d’’o ggirone. Arbitro: STAVREVAD (Macedonia) 5 ‘Na bbanda ‘e scieme isso i ‘e cullabburature ‘e linia. E mettimmo punto cca. Si dDi’ vo’ ce sentimmo llunnerí ca vène, doppo d’’a trasferta ‘e dummeneca a ssera a ssan Siro contr’â scuatra ‘e chillu nnacchennella d’Inzaghi. Staveti bbe’! R. Bracale Brak