NAPOLI - LEGIA VARAVIA (E.L.10.12.15 E.L.) 5 - 2

NAPOLI - LEGIA VARAVIA (E.L.10.12.15 E.L.) 5 - 2 ‘A VEDETTE ACCUSSÍ Canta Napoli guagliú, canta! Ajeressera ‘o Napule scennette ‘ncampo ô san Paolo, ‘mprimmose pe levarese ‘a faccia ‘e pacchere pigliate cu ‘a scunfitta ‘e bBulogna,’ncampiunato rascettannose (riscattandosi) contro ô Legia Varsavia e arrivanno accussí â sfita cu ‘a Roma credennoce ancòra.E accussí fove!Ė overo ca ‘a scuatra cuana (azzurra)êva ggià miso ô pizzo da ‘nu turno ‘o passaggio ê siricesime i ‘o primmo posto ‘int’ô ggirone, ma cu ttutto ll’abbunante rutizzio (turnover)presentato Sarri i ‘e suoje se vuletteno levà ‘o sfizzio ‘e nchiudere a punteggio chino, addirittura migliuranno ’a straurdinaria addizziona d’’e stuche (gol) fatte, passanno da diciassette a vvintiduje.E ce riuscette sbarazzannose ‘e n’avverzario ca tentaje ‘o tutto pe ttutto tenenno ancòra, ‘ncapo a isso!..., ‘a pussibbilità ‘e qualificarese comme sicunno ‘e ggirone. Ma facette palla corta i ‘e ppigliaje malamente ‘ncopp’ê rrecchie, ascenno scunfitto dô san Paolo pe ccinche a ddoje!E si ‘a sbrasata nun fove cchiú sustanziosa fove ‘nu poco pecché ll’arbitro annullaje ‘nu reculare stuco(gol) ‘e Chirichesso pe ccoccosa ca vedette sul’isso, mentre ‘e duje stuche pigliate dô Napule dipennetteno nun sulo ‘a doje mumentanee distrazzione d’’a trasera (difesa), ma soprattutto dô fatto ca ajeressere ‘mporta ô Napule nun ghiucaje ‘o titulare Reina, ma ‘o guaglione d’’e servizzie: Gabriello, ca nun mm’è mmaje piaciuto e ca nun me piacette ajere e ppirciò ve ‘mmito a ttutte a ffà nuvene, messe cantate e scale sante â Madonna e a cchi tenite cchiú ccaro pe ffà sì ca a rReina nun lle venesse maje ‘nu catarro,’na cacarella o ‘nu male ‘e diente ca si ‘ncampiunato Sarri facesse juca a gGabriello e nno a rRafaello, ‘o prevetariello, fosseno sacicce male arravugliate! Sperammo can un succede e ppassammo ê ppaggelle: GABRIEL 4,5 S’allamenta ca nun tene maje accasione pe gghiucà! I’ nun ll’êsse fatto jucà manco ajeressera: fove ‘o peggio d’’o mazzo;’a tuccaje overo assaje poco e ffove meglio accussí o êsse fatte ati nquacchie comme quanno nun se tuffaje, nè se muvette o ascette ‘ncopp’ê stuche (gol) ‘e Vranjesse e de Prijoviccio signato addirittura ‘a dint’ â camma ‘e porta! E che saciccio! MAGGIO 6 - Fascia ‘e capitano e n’ avverzario, Kucharczykco,cuntrullato a dduvere. Mantenette ‘a pusizione e sse facette vedé pure a appressurà(spingere), ma ô ssolito sbaglianno cruzze (cross). CHIRICHES 6 – Dint’ô penurdemu fullè (match) airupeo êva signato ‘o primmo stuco _(gol)cu ‘a maglia luvarda (azzurra), ajeressera se ripetette, ma ll’arbitro ce ll’annullaje e nun se capette pecché. P’’o riesto ‘a fora ‘e quacche sfregazzo (sbavatura) ll’atalossa (prestazione) soja fove cunvincente. (Dô 79' LUPERTO 6- Ma sulo pecché, sbucanno ê spalle soje, Prijoviccio signaje ‘o siconno stuco d’’o Liegia, ca si no fȯsse stato seje chino.) KOULIBALY 6 Urdinaria amministrazzione p’’o ggialante (gigante) cuano, ca ô ssolito facette valé ‘o fisico suojo specie ‘int’ô juoco tairro (aereo) e ssulo ‘na vota se perdette a Vranjesse ca futtette a gGabriello. Spisso po se menaje annante specie ‘ncopp’ê tire ‘e squine (corner), spaventanno ‘a trasera (difesa) pulacca. (Dô 68' ALBIOL s.v.’Na ventina ‘e minute justo pe scarfarese.) STRINIC 6 Prumosso pur’isso; mantenette bbuono ‘a pusizziona e ssulo ‘na vota ô pprincipio d’arrancua (ripresa) se facette scappà, senza cunzequenzie, a bBereszynsk. DAVID LÓPEZ 6 – Isso, ca quase maje tenta ‘o tiro, ajeressera ‘o ffacette ‘na vota e – favurito ‘a ‘na deviazziona – cugliette ‘o travesagno (traversa). Se facette vedé pure ‘mpruizziona uffenziva cu ‘o pasiglio (passaggio) pe Cialobbà; tutto summato bbella atalossa (prestazione) pure si ll’avverzarie foveno quatto profuche! VALDIFIORI 6- Asiffo (discreto), ma niente ‘e cchiú; forze ‘e vvoce ‘e pasiglio(passaggio) â Fiorentina’o detteno izzeja (fastidio). Peccato. CHALOBAH 7 – Debbuttaje ô san Paolo e fove súbbeto prutacunista cu ‘nu lanzo overo ‘nteressante p’Insigne; mustraje’e sapé stà ‘mmiez’ ô campo e ttruvaje ‘o primmo stuco (gol) luvardo cu ‘na jucata ‘a campione. EL KADDOURI 6 Nun fove tanto prutacunista, pure pecché miso a ‘nu pizzo nun è ‘o suojo, ma se facette apprezzà p’’a pulezzia i ‘a pricisione d’’o juoco. INSIGNE 6,5 Prutacunista cu ttutto ca fove miso, isso ca è ttantillo, a ffà ll’artigliero (punta) centrale, cercaje súbbeto ‘o tiro; â mez’ora sfresaje (sfiorò) ‘o palo a mmancina ‘e Kuciakco, ma êtte aspettà ‘e ringrazià a jJodlowieccio ca ll’umaggiaje cu ll’ajuda (assist) d’’o dubblato (raddoppio). (Dô 55' CALLEJON 6,5 – Cercaje ‘o quinto stuco (gol) ‘nnE.L.e ‘o truvaje ‘ncapo ‘e ‘nu minuto e mmiezo. Cugliette pure ‘nu palo doppo ‘na magaria ‘e Mertenso ch’êva mannato ô manicomio meza trasera (difesa) pulacca.) MERTENS 7,5 Nacabbo (guastatore) ‘e ‘na difesa pulacca spaventata, mettette ‘a cerasella cu ‘o stuco (gol) d’’a cinquina, ca lle vale miezu zifo (voto) ‘e cchiú; miso ‘ncampo dô pprincipio, se facette valé pe ttutta ll’antraffa (partita)facenno cuntento a sSarri: cu ‘na timmurria(punizione) dètte penziere a cKuciakco, dimustraje ‘nu bbuon alliamajo(affiatamento) cu Lorenzigno cupulianno (duettando) comme e cquanno vulette; se dimustraje sempe assaje ‘mpalla nfi’ a ttruvà ‘o stuco (gol) cu ‘nu bbellu tiro ‘e dritta. Da ‘ncurnicià chello ca cumbinaje ô sittantesimo pazziannose meza trasera (difesa)pulacca.) SARRI 5,5 Quanno se vence, comme se vincette ajere, ô trainerro nun lle se po’ ddicere niente tranne forze ch’êsse avuto e ppututo sfruttà e cchiú quacche guaglione ca ancòra ce à dda fa vedé e ca avette tuorto a scegliere a gGabriello ‘mmece ca a rRafaello e cchesto lle costa miezu zifo (voto). Sinamparco (comunque)cunchiudenno dicimmo ca ô Napule riuscette a ffà filotto cunquistanno ‘a sesta nichemata (vittoria) dinto a sseje antraffe (partite) d’E. L. fatte. ‘E cuane (azzurri)se ponno accussí avantà d’essere ‘a sola scuatra aiurupea (Ciampionsa cumpresa) a avé nchiuso a punteggio chino ll’epata (fase) a ggiruni; nichemata (vittoria) cchiú ca meritata dê guagliune ‘e Sarri, ca pe cchiú d’’o sittanta pe cciento d’’o tiempo nun facetteno tuccà palla ô Liegia; ‘nzomma ‘a meglia manera pe scurdarese d’’a collera ‘e bBulogna e mmenarese cu ‘o murale justo verz’â sfita ‘e dummeneca ê sseje contro ‘a bbanda ‘e monzù Garsià, ca si ‘e ccose vanno comme ànn’ ‘a jí, se nn’ànn’’a turnà sott’ ô cupolone carreche ‘e maraviglie e bbuone mazziate. Accussí speranno, si dDi’ vo’, ve dongo appuntamento a llunnerí ca vene! Staveti. Bbe’! R.Bracale Brak