FIORENTINA – NAPOLI (20/01/13) 1 A 1‘A VEDETTE ACCUSSÍ

FIORENTINA – NAPOLI (20/01/13) 1 A 1 ‘A VEDETTE ACCUSSÍ No, guagliú accussí nun po’ gghí! All’ora d’ ‘a tiella ajere ‘o Napule nun riuscette a purtarese â casa tre ppunte tenenno ‘o passo d’ ‘a rubbentussa ca pe pparta soja, ‘mmece, sapato passato êva fatto unu muorzo ‘e ll’Udinese! Ajere ‘o Napule s’êtte accuntentà ‘e ‘nu punto sulo purtannose ‘ncrassifica a 43 punte (tante quante ne conta ‘o pappavallo ‘e Lotito ca sempe sàpato ‘o punto suojo se ll’era juto a arrubbarlo a pPalermo adderezzanno ‘nu fullé ca steva perdenno pe ddoje a uno e ll’êva adderezzato cu ‘nu ricore favezo ca chillu figlio ‘e coperativa favezo e ‘mbruglione ‘e Floccari(scola atalanta ciovè scola travante d’ ‘a juventussa) s’era prucurato menannose ‘nterra senza ca nisciuno ll’êsse fatto niente!...) E ‘o Napule? Niente! ‘O Napule me sta facenno ancòra magnà ‘o franfellicco penzanno â strunzata ca ajere facette De Sanctis rijalanno ‘na rredda â Fiorentina. Pe furtuna ca ‘o zengariello nuosto adderezzaje ‘a varca signanno ‘a rredda d’ ‘o pareggio ca po fuje ‘a diciassettesima ‘e ‘stu campiunato e ‘a nummero ciento ‘a che sta jucanno ‘nserie A. Ma accussí, guagliú, accussí nun po’ gghí! Quanno se po’ vvencere s’à dda vencere e nun s’ànn’ ‘a rijalà punte a ll’avverzarie. E ‘mmece proprio chesto succedette’nu poco pecché De Sanctis oramaje fa paura (e i’ ggià sto’ tremmanno a ppenzà ca ce ll’âmm’ ‘a tené pe n’atu paro ‘e tempurate...) e ‘nu poco pecché avastaje ca chillu jettatore ‘e culo’echiummo-cannavaro turnasse ‘mpanca, ca ‘o Napule pigliasse ‘na rredda! E che saciccio! Chisto fa danno pure quanno nun scenne ‘ncampo! Passammo ê ppaggelle va’: DE SANCTIS Ø Zero spaccato!‘A puttanata ca facette [sbaglianno aione e mmanera d’ascí]fuje esaggerata! Chisto è ‘nu purtiere ca oramaje nun dà cchiú nisciuna cunfianza... E ll’ànnu pure pruluncato ‘o cuntratto... Cose ‘e pazze! Cca ce serve súbbeto ‘nu purtiero overo(Bardi o Pegolo)! CAMPAGNARO 6,5 Joveticcio spisso s’ ‘a facette dê pparte soje, ma praticamente nun cunchiudette niente: ‘o Toro ll’annullaje... BRITOS 7. Bella sfita vincente soprattutto ‘ncopp’ê ppalle avete cu chillu figlio ‘e coperativa ‘e Luca Toni, ca spisso ricurrette â falta carogna sotto a ll’uocchie ‘e chillu sicchio ‘e lota ‘e Bergonzoni ca se facette ‘e cacchie suoje senza ammunirlo. GAMBERINI 6. ‘Nu poco nervuso,facette cumunque ‘na bbella atalossa pure sentenno troppo ‘o fatto d’essere n’ècchese... ( dô 70°INSIGNE sv. Quacche cusarella, ma poco pe cchello ca po’ ffà: cercaje sempe a cCavani senza mai puntà ll’ommo. Ntrupallo (timido)). MAGGIO 5,5. M’aspettaje quaccosa ‘e cchiú, ma Pasquàl riuscette a nzerrarle ‘e spazzie e ‘o stuppaje ‘ncopp’â curzia. ‘Nsiconna battutta se ll’êtte ‘a vedé suffrenno cu Saviccio.’Nu poco meglio quanno, passate a cquatto arreto, facette ‘o terzino. INLER 6,5. Se sganciaje ‘na sola vota pecché ‘a scuatra viola teneva n’ommo ‘e cchiú a ccentrocampo e nun se putette piglià ‘o lusso ‘e lassà campo a rRomulo; êtt’ ‘a cummiglià ll’avanzate ‘e Marekiaro cercanno sempe ‘a jucata ‘ntelliggente senza maje jettà ‘o pallone. BEHRAMI 7. Cratista atalossa d’ ‘o cane ‘e presa soprattutto ‘nsiconna battuta.Fuje forze ‘o meglio d’ ‘e cuane e ghiucanno cu fforza e ccegna ‘ncrujabbile (incredibili) ‘o recugliste addó nun ll’îve semmenato!Ammunito troppo ampressa e ‘ngiustamente è custretto a zumpà ‘o prossimo fullé. Sbagliaje ‘na sola vota quanno ‘nritardo ‘ncullo a cCuadrado arresecaje d’essere jettato fora! (Dô 55°DZEMAILI 6. Facette chello c’êv’ ‘a fà: rompere ‘a manovra viola). ZUNIGA 6,5. Secutaje, senza sbaglià quase niente, a ommo a cCuadrado, pure quanno chillo s’accentraje. S’abbuscaje pure ‘a punizziona ca purtaje ô pareggio; ô finale tiraje ‘o sciato facenno ‘o terzino e lassanno ‘a curzia a Insigne. HAMSIK 5,5Accumminciaje a gghiucà troppo tarde e se sparagnaje troppo; pe gghiucà palla spisso êtt’ ‘a arretrà nfi’ â mità ccampo soja visto ca ‘a folla d’ ‘o centrocampo viola nun lle dètte ‘a pussibbilità ‘e ‘na jucata ‘nprufunnità. PANDEV 6- Appena tuccaje ‘o pallone ‘o dubblajeno (lo raddoppiarono) spisso cu ‘e ttriste . Nun avette spazzio e ffuje quase affucato (soffocato) da Aquilani ca comme ‘o vedette ‘mpussesso ‘e palla jette subbeto ‘mpressione ‘mpedennolo ‘e serví ê cumpagne e soprattutto a cCavani. Peccato pe ll'accasione sciupata ô finale,quanno fósse servuta cchiú forza, frubbizzia e ccegna. CAVANI 7 ‘A rredda e tantu muvimento. ‘Int’ê primme vinte minute se vedette poco o niente, po criscette quanno ‘o tase (ritmo) d’ ‘o fullé sagliette e isso putette divertirese mo turnanno, mo jenno annante. Puntuale a ll’appuntamento cu ‘o pallone cu ‘na scicca ‘ncurnata apparaje ‘a facenna futtenno a nNeto e cassanno ‘a puttanata ‘e De Sanctis!Ma nun se po’ mettere sempe speranza ‘ncuollo ô zengariello nuosto! MAZZARRI 6. ‘O Napule jucaje a pparo cu ‘a scuatra ca nfi’ a mmo à mustrato ‘o meglio juoco ttaliano e ô finale tentaje pure ‘e vencere ‘o fullé jucanno curaggiusamente cu ttutte ll’attaccante a disposizziona. Menu male ca, asciuto Gamberini, nun facette trasí a cannavaro! Arbitro BERGONZI 4 – ‘Sta meza cazetta comme ô riesto ‘e tutte ll’arbitre italiane e se porta ancòra appriesso ‘o pisemo d’ ‘e critiche ca avette p’’e duje rigure date ô Napule (tempurata 2007/2008) contro â juventússa; ‘a tanno, quanno arbitra ‘o Napule, pe fa vedé ca nun stà abbaccato cu ‘e cuane sisca sempe contro e ‘nzerra tutte ‘e dduje ll’uocchie cunzentenno(senza piglià pruvvedimente) all’avverzarie d’ ‘o Napule (comme succedette ajere,ca primma ‘e tirà fora ‘nu cartellino giallo ‘nfaccia a ‘nu viola, ce penzaje diece vote e ppo nun ‘o cacciaje…) cunzentenno ‘nu juoco viulento e carugnesco (nun m’arricordo ‘e nomme... ), favezo e ammagagnato (Tony, Aquilani etc.). Purtroppo tutte ll’arbitre italiane so’ meze-cazette e ce avimmo ‘a accuntentà; sventagliaje tanti cartelline jalizze sott’ô naso d’ ‘e cuane spisso senza nisciuno mutivo, ma ce sparagnaje ‘o cartellino russo a bBehrami forze pe farse perdunà ca ll’aveva ammunito ‘ngiustamente ‘a primma vota. E cu cchesto ve saluto e si dDi’ vo’ ce sentimmo ‘a prossima vota , speranno ca ve pozzo cuntà bbelli ccose! Staveti be’. R.Bracale Brak