MACCARUNCIELLE CU ZZAMPUGLIATA ‘E NOCE.

MACCARUNCIELLE CU ZZAMPUGLIATA ‘E NOCE. Chello ca serve pe 6 perzone: 600 gramme ‘e maccaruncielle murcellate a ppiezze ‘e 4 cm., 250 gramme (piso lisso) ‘e cosce ‘e quaglia ‘e noce, 50 gramme ‘e pignuole, sale fino q.c.n.v., ‘na vrancata ‘e sale duppio, 50 gramme ‘e mullica ‘e pane casareccio, ‘nu spiculo d’aglio ammunnato, ‘nu bicchiere d’ uoglio ‘auliva dunciglio, pepe niro mmacenato a ffrisco q.c.n.v. ‘nu tuppeto ‘e prutusino lavato, asciuttato ntretato finu fino. comme se fa Scuttà‘e ccosce ‘e quaglia ‘e noce dinto a ‘na tianella cu poca acqua vullente, scularle e spellarle e metterle dinto a ‘nu murtaro.Dinto a ‘na ciotala cu poca acqua fredda ammullà ‘a mullica, spremmerla e spullecarla dint’ô murtaro. Agnadí ‘e pignuole‘nu spiculo d’aglio ammunnato e poco â vota ‘o bicchiere d’ uoglio ‘auliva dunciglio; accuncià ‘e sale ppepe e scamazzà tutto cu ‘nu pesaturo(pestello) nfi’ a ffà ‘na zampugliata criceta e malacosa. A ‘stu punto àrvere ‘e mezzanelle murcellate dinto a abbunnante acqua salata (vrancata ‘e sale duppio), scularle e revacarle dinto a ‘na zuppiera cauda, cunnirla súbbeto cu ‘a zampugliata e derramarle cu ‘o tuppeto ‘e prutusino ntretato. Ammiscà, ‘mpiattà e serví. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà. Mangia Napoli, bbona salute! Scialàteve e cunzulàteve ‘o vernecale! Raffaele Bracale