STEAUA-NAPOLI 3 A 3 ‘E PPAGGELLE MEJE

STEAUA-NAPOLI 3 A 3 ‘E PPAGGELLE MEJE
De Sanctis 4--:Cu ‘a capa dint’ê nnuvole, nun capisco a che cca**o penzave ajere a Bucaresto; tenette ‘ncopp’â cuscienza ‘o siconno e ‘o terzo gollo: ‘o siconno pecché restaje troppo fora dê pale, e bbattezzaje fora ‘o tiro dâ trecquarte...; ‘o terzo nun ascette e se facette fottere ‘a duje passe; p’ ‘o riesto d’ ‘a partita po sbagliaje ati ‘ntervente e gghiette ô sbando cu tutta ‘a difesa.
Santacroce 4,5:Sfunnacato (indeciso) e senza perzonalità,finché rummanette ‘ncampo fuje sempe ‘mbalia ‘e ll’ attaccante avversarie!Una cosa bbona facette a ffarse paccarià dô rumeno po cacciato fora!
Cribari 5: Sfurtunato e ghiellato causaje ‘o vantaggio rumeno cu n’autogollo ‘mbarazzante. Chianu chiano po se repigliaje, e nun facette ati gravi errori difenzivi. Sarrà ‘na jastemma menata ca nun riuscimmo a ttruvà ‘nu centrale cu sette parme ‘e ca**o!
Grava 5: ‘O surdatiello ajere nun fuje isso e suffrette terribilmente comme a ttutta ‘a difesa.Chi sa’ pecché!?
Maggio 4,5: Inesistente, comme del resto dô principio ‘e campiunato. S’à dda repiglià, specie ‘ncampiunato; senza determinazzione, muscio e senza forze, sbagliaje pure sotto porta; sperammo ca se repiglia ampressa!

Gargano 6--:Pe luttà, luttaje ‘mmiez’ ô campo, ma – specie ô primmo tempo – sbagliaje assaje, forze pecché sentette ‘a mancanza d’ ‘o cumpagnello sujo: Pazienza! Â ripresa jette ‘nu poco meglio...
Yebda 4:Fuje ‘o solito oggetto misteriuso: completamente fora dô juoco, ajzaje póvera e nient’ ato! Ma chi ce ll’à mannato a cchisto?Nun po’ sostituí a Pazienza!
Vitale 6: Parteyye ‘na chiaveca, ma po’ sfruttaje a dduvere ‘a bbotta ‘e Sosa respinta dô palo e signaje ‘o gollo d’ ‘a speranza, ca ‘o facette ripiglià. Â ripresa jette assaje meglio e nun facette puttanate! Seconno me s’ammereta quacch’ata accasione.
Zuniga 5--: Nun è ‘nu trequartista e se vedette: sulo fummo e niente arrusto!
Sosa 5,5: Nun è n’attaccante, ma tène ‘a bbotta ‘a luntano e è ‘nu fatto ‘mpurtante; poco ce mancaje ca nun facesse gollo, ma p’ ‘o riesto nun accucchiaje niente...dimustrannose parente stritto ‘eYebdà. Forze ll’âmm’ ‘a aspettà ‘nu poco...
Lavezzi 7: Mazzarri êsse vuluto farlo arrepusà, ma ll’ êtte fà trasí pe fforza e isso ajutaje ‘a varca ‘nzino â rimonta cu tante azzione pugnente e periculose; nun vedette bbuono ‘a porta ma ‘o guaglione tene carattere e cclasse ‘a vennere.
Hamsik 7,5:Pure ‘e isso Mazzarri nn’êsse vuluto fà a mmeno, ma, visto ca ‘e siconne linne napulitane nun so’ bbone, ll’ êtte fà trasí pe fforza e isso firmaje ‘o tre a ddoje cu ‘nu sinistro maggico e a seguí trasette dinto a ttutte ll’azzione periculose d’ ‘o siconno tempo; è ‘nu grande campione e pe furtuna, se vedette pure ajere ssera!
Cavani 8: Pure ‘sta vota salvaje ‘o Napule cu ‘nu gollo ‘a vero centrattacco rascagnatore(predatore)’e ll’area ‘e ricore. È ll’autentica fijura d’ ‘o core azzurro ca nun s’arrenne maje!
Mazzarri 5,5 À dda frijere ‘o pesce cu ll’acqua, pure pe colpa soja (à fatto vennere troppa ggente e à pigliato troppi meze cazette...) , ma cierti vvote è furtunato! E pure chesto serve!
L’arbitro 6 Niente ‘a dicere!
Brak