MEZZANELLE D’ ‘O VERDUMMARO

MEZZANELLE D’ ‘O VERDUMMARO

Chello ca ce vo’ pe sseje perzone
600 gramme ‘e mezzanielle spezzate a ppiezze ‘e cinche cm.,
‘nu spiculo d’aglio ammuinnato e ntretato finu fino,
‘na cepolla ndurata ‘e Muntoro ammunnata e ntretata fina fina,
3 mazziette ‘e rucula pirciante lavate asciuttate e ntretate,
4 cucuzzielle vierde napulitane lavate, spuntate e tagliate a ffarinule,
ddoje pastenache.
‘na llomma d’accio
100 gramme ‘e caso pecurino rattato finu fino,
‘nu bicchiere d’ uoglio ‘auliva dunciglio,
‘nu cucchiaro ‘e ‘nzogna,
sale duppio ‘na vrancata,
sale fino e ppepe janco mmacenato a ffrisco q.n.s.
‘nu tuppeto ‘e prutusino lavato asciuttato e ntretato.





Appruntà ‘e cucuzzielle e ‘a rucula; spruscià (pelare) ‘e ppastenache e ‘a llomma d’accio,lavarle tagliarle a varriglie e farle arvere pe cinche minute dinto a otto litre d’acqua vullente salata (vrancata e sale duppio) scularle, astipanno ll’acqua e tenerle ‘ncaudo. Fraditanto dinto a ‘na prupurziunata tiella ricà ll’uoglio e ‘a ‘nzogna e a ffuoco miccio farle piglià calore;agnadí ll’aglio e ‘a cepolla ntretata e farle suassà e appena pigliano culore agnadirve ‘e mazziette ‘e rucula pirciante lavate asciuttate e ntretate,’e varriglie d’accio e ppastenache arvate e ‘e ffarinule ‘e cucuzzielle a ccruro.Cummiglià ‘a tiella e lassà còcere pe diece minute scarze; accuncià ‘e sale e ppepe. A ‘stu punto fà ascí a vollere n’ata vota ll’acqua addó s’erano arvate pastenache e accio e fà arverve ‘e mezzanelle; scularle teniente teniente e revacarle dint’â tiella cu ‘e vverdure; ammiscà e ffà ‘nzapurí pe cinche minute a ffuoco allero.A ffuoco stutato derrammà cu ‘o tuppeto ‘e prutusino lavato asciuttato e ntretato; ‘mpiattà e mannà súbbeto ‘ntavula ‘sti mezzanelle d’ ‘o verdummaro. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
Raffaele Bracale