PASTOTTO CU ‘E FRIJARIELLE.

PASTOTTO CU ‘E FRIJARIELLE.
Chello ca ce vo’ pe sseje perzone
600 gramme ‘e tubbettielle (avemmarie) m rigate,
50 gramme ‘e pancetta tesa tagliata a ffarinule piccerenelle,
‘nu bicchiere e miezo d’uoglio ‘auliva dunciglio,
500 gramme (piso lisso) ‘e frijarielle ammunnate, lavate e arvate vierde vierde
‘na cepolla ndurata ‘e Muntoro ammunnata e ntretata suttile,
‘nu spiculo d’aglio ammunnato e scamazzato
‘ddoje farinule pe bbroro veggetale,

ddoje bustine ‘e safrone,
sale duppio ‘na vrancata,
sale fino e pepe janco mmacenato a ffrisco q.n.s.,

‘nu cerasiello percante (piccante)lavato, asciuttato e grabbato (inciso) p’ ‘o lluongo,
100 gramme ‘e pecurino rattato finu fino.
Comme se fa

Appruntà pe primma cosa ‘o broro veggetale cu tre litri d’acqua fredda e ‘e ddoje farinule pe bbroro; súbbeto doppo ammunnà, lavà e spezzettà ‘e frijarielle e metterle a arvere dinto a ‘nu paro ‘e litre d’acqua fredda salata (vrancata e sale duppio)e scularle vierde vierde. Ricà ‘e duje tierze- ‘e ll’uoglio dinto a ‘na prupurziunata tiella a ffuoco allero e fà piglià culore a ll’aglio ‘nzieme ô cerasiello percante; appena so’ ppronte agnadí ‘e frijarielle arvate ; ‘ncuperchià e lassarle abburrí pe ‘nu quarto d’ora; â fine accuncià ‘e sale e ppepe e passà tutto dinto a ‘nu mmiscaturo nfi’ a uttené a velocità miccia ‘na dellicata crema. Fraditanto àrvere a mmeza cuttura dint’ô bbroro veggetalevullente ‘e tubbettielle.
Ricà ‘o riesto ‘e ll’uoglio dint’â tiella, farlo piglià calimma e agnadí ‘o ttrigliato ‘e cepolla facennola appassulià a ffuoco allero, po avascià ‘o ffuoco e agnadí ‘a pancetta e farla suassà pe cinche minute; a chistu punto ricà dint’â tiella ‘e tubbettielle arvate a mmeza cuttura agnadenno uno o dduje cuppine ‘e bbroro vullente e cumpletà ‘a cuttura d’ ‘a pasta, agnadenno ‘e bustine ‘e safrone; ammiscà e súbbeto doppo agnadí ‘ crema ‘e frjarielle; aumentà ‘o ffuoco e dderrammà cu ‘o ccaso pecurino, cumpletanno ‘o pastotto cu n’atu filo d’uoglio a ccruro e derrammanno abbunnantemente ‘e pepe janco mmacenato a ffrisco. ‘Mpiattà, e serví caudo ‘e fuculare ‘stu pastotto gurmante.
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
Raffaele Bracale