SAMPDORIA – NAPOLI ( 1/12/14) 1 A 1 ‘A VEDETTE ACCUSSÍ

SAMPDORIA – NAPOLI ( 1/12/14) 1 A 1 ‘A VEDETTE ACCUSSÍ Mannaggia a cchello ca nun se po’ ddicere, guagliú! Che v’aggi’ ‘a dicere? Speravo ‘e puterve raccuntà ‘ca ajeressera, a ttard’ora, ‘o Napule scennenno ‘ncampo a mMarassi contr’â Sampedoria êsse purtato ‘mpuorto ô prazzo (alla fine) ‘na bbella nichessa (vittoria) esterna ca ll’êsse permiso ‘e tené ‘o passo ‘e juve e de rroma... e ‘mmece m’attocca ‘e parlarve d’’o terzo pareggio cunzecutivo (‘nfra campiunato e E.L.), pareggio chillo d’ajere afferrato p’’e capille a ll’urdemu mumento, pareggio sufferto ma ‘mpurtante assaje pecché nce cunzentette d’ agguantà ‘o ggenoa ripigliannòce ‘o terzo posto ncrassifica, sia pure ‘ncumprupietà! Mannaggia a cchello ca nun se po’ ddicere, guagliú! Ajere nce attuccaje ‘nu punticiello sulo addó avesseno pututo essere tre si Rocchi, po ve dico, avesse fatto ll’ommo e nno ‘o nnacchennella.... Passammo ê ppaggelle: RAFAEL 6- Nun fove quase maje chiammato ‘ncausa e capitulaje a ll’arrancua (nella ripresa) ô 58° ‘ncopp’ a ll’unicu tiro serio, chillo d’Edèrro ca però fove ‘mpruvviso e nun cuntrastato: ce fósse vuluto ‘nu miraculo pe fermarlo, ma Rafiluccio nun è attrezzato pe ffarle o forze battezzaje fora ‘o tiro. MAGGIO 6- N’atalossa (prestazione) ca nun m’aspettavo:jette bbuono a ll’epata (fase) difenziva,’a fora ‘e quanno nun chiudette ‘ncopp’a Edèrro cunzentennole ‘o tiro d’’o vantaggio duriano. ‘Ncumpenso a ll’epata (fase) enercetica (propositiva) pruvaje cuntinuamente a ffà ll’ommo-ajuda (l’uomo assist) sfurnanno cruzze (cross) e llanze. ‘Na surpresa, finalmente! ALBIOL 5,5 Pur’ isso ‘ncopp’ô stuco (gol) duriano se facette cartià e zzumpà.P’’o riesto me parette stranamente ‘nu poco ‘mbarazzato (impacciato).Però quanno se facette vedé annante, dint’â camma duriuana, se prucuraje ‘nu ricore ca sulo Rocchi nun vulette vedé. KOULIBALY 5 Serata no d’’o francese custretto â falta sistematica (al fallo sistematico);perdette ‘a brica (duello) cu Okaka e s’abbuscaje apprimma ‘o cartellino jalizzo (giallo) e ppo chillu russo cadenno dint’ô mastrillo appruntato da Edèrro. Peccato! BRITOS 5 – Spaisato e puntato ‘a Rocchi, s’abbuscaje súbbeto ‘nu cartellino jalizzo (giallo) e scanzaje pe ppoco chillu russo. (dô 59° MERTENS 5,5 Nun riuscette a ttrasí ‘nfullè [in partita]; tentaje ‘e fà quacche cusarella ma fove acqua ca nun levaje sete; ‘o vero Mertènso è ttutta n’ata cosa. Aspettammo ca torna!). INLER 5,5 Partette bbunariello, ma po se perdette p’’a via cu rRizzo e sSoriano ca ‘ o mannanjeo ô manicomio e nun festeggiaje a dduvere ‘a duicientocinquantesima presenza ‘nserie A. (dô 63° JORGINHO 6- Cchiú urdinato d’’o turco-napulitano , se pigliaje ‘o spavo ‘ncerato ‘e diriggere cu pricisione ‘o traffico soprattutto quanno ‘a scuatra rummanette ‘ndiece). DAVID LOPEZ 5,5 Braduso (lento), troppo braduso! Tenette ‘na parta soja ‘e sfarma (colpa) ‘ncopp’ô stuco (gol) d’Edèrro, quanno quase se scanzaje, ‘mmece ‘e chiudere. CALLEJON 4,5 Ancòra ‘nu fullé no d’’o spagnuolo a vvocca asciutta ‘a ‘nu mese; pure ajeressera aizaje porvera e nun trasette maje dint’ô vvivo ‘e ll’azziona.Dispiace d’’o ddicere ma me parette ca ‘o guaglione spagnuolo sta attraversanno ‘nu bbruttu mumento ‘e descienzo (involuzione).Forze don Rafele ll’êsse tené fora ‘nu poco. HAMSIK 4,5 Piezzo e ppejo ‘e Cagliecònno;pe ttutto ‘o primmo ajone (primo tempo) nun se vedette e nun se sentette; a ll’arrancua (ripresa) s’affacciaje pe ‘nu poco e ppo turnaje a rrunfà lassanno sulo ô Pipita.Sustituito troppo tarde! (dô 79° ZAPATA 7 Dicisivo.Facette ‘nu stuco (gol) pulitelico (prezioso) ‘a vero attaccante. )Cu ll’Empoli, si fósse don Rafele, ‘o facesse jucà dô primmo minuto ô posto ‘e Cagliecònno cu De Guzmànno ô posto ‘e Marekiaro. GHOULAM 6,5 – ‘O francese naturalizzato algerino jucaje comm’ esterno auto ‘e mancina dimustranno ‘e saperce fà; scavallaje ‘ncopp’â curzia cu autorità e ccu ssustanza e mmettette ‘mmiezo ‘o cruzzo (cross) pe zZapata ca fove ‘nu zuccaro! HIGUAIN 5,5 Serata appannata p’’o Pipita, ca scunzulatamente sulo,pure pruvannoce, nun crabbaje (incise). Tenimmo presente però ca ‘o Pipita à purtato nsi’ a mmo diece punte ô Napule ( riusultanno comme a Icardi ‘o cchiú ddicisivo d’’o turneo).’Na pausa ce po’ stà. All. Rafael BENITEZ 5,5 Nsi’ a mmo nun à perduto cu ‘a Sampedoria (ddoje nichesse [vittorie] e dduje paregge). Ajere dètte ancòra spazzio a Cagliecònno e a mMarekiaro, rinuncianno a Mertènso e a dDe Guzmànno,e secondo me sbagliaje..., ma ‘a mossa ‘e Ghoulàmmo avanzato,fove ‘nduvinata, comme fove azzeccata chella ‘e fà trasí a zZapata ca lle levaje ‘e vverole dô ffuoco. arbitroROCCHI 3,5 E ll’aggiu trattato!‘Sta mezacazetta, cummerciante (ma nun se sape ‘e che...) fiurentino ca ati vvote [tengo ‘nu bbrutto ricordo ‘e ‘nu san Zziro, cu ‘o Milan(no)]aveva ggià spezzato ‘e passe luvarde, ajere aumentaje ‘a ddosa d’ ‘o ‘o debbeto ca tene cu nnuje nun siscanno no uno, ma dduje sacrusante ricure a ffavore d’ ‘e cuane e cunzentenno, senza sanziunarlo a dduvere, ê duriane [ca se penzajeno ‘e stà jucanno a rugby] ‘nu juoco viulento e ccarogno, caputianno ‘e falte e sventaglianno sotto ô naso d’ ‘e cuane cartelline jalizze (gialli) e rrusse pigliannosela soprattutto cu ‘e difenzure nuoste e lassanno correre quase tutte ‘e fetenzie d’ ‘e padrune ‘e case,ca foveno overo ‘na bbanda ‘e delinquente applaudite ‘a chella macchietta d’’o presidente Ferrero ! Rocchi ‘nzomma ajere facette paricchi fullune sempe ‘ndanno d’ ‘e cuane, dimustrannose arbitro senza attenziona e nnun me meravigliasse ‘e saperlo ‘ncopp’ô stato paca d’Agnelli.Ma cu cchi t’ ‘a piglie?Cu cchi? Ce ll’âmm’’a piglià sulo cu DeLa ca s’êsse ‘a mettere a ffaticà p’addiventà quaccuno dint’ô Palazzo (addó nsi’ a mmo conta quanto ‘o doje ‘e coppe a bbriscula [quanno però ‘o triunfo è a mmazze]) ca si no ‘o Napule nun po’ ffà maje niente e vvene trattato sempe comm’ ô figlio d’’a criata (serva)! E ffermammoce cca. Si ‘o Signore ce ‘o ffa vedé ce sentimmo lunnerí ca vène, speranno ‘e puterve dicere ca‘o Napule, cu ll’Empoli fósse tturnato a vvencere! Bbona salute! R.Bracale Brak