NAPOLI – CESENA (18/05/15) 3 A 2 ‘A VEDETTE ACCUSSÍ

NAPOLI – CESENA (18/05/15) 3 A 2 ‘A VEDETTE ACCUSSÍ E cche saciccio, guagliú! Chiste oramaje me fanno parlà sulo. Votta a fferní ‘sta tempurata fràcasa (stagione fallimentare)! I’ ancòra nun ce pozzo credere ca ajeressera ô san Paolo [‘nnante a ‘nu pubblico diciso a ffarese ‘e fatte suoje e a ffarese sentí sulo pe siscà ô Pipita quanno trasette ‘ncampo...] ‘o Napule primma ‘e riuscí a avé raggiona d’ ‘o Cesena e rriuscí a ccunquistà tre ppunte ‘mpurtante pe ttallunà ancòra ‘a scuatra d’’o pappavallo ‘e lotito, avette sufferí ‘mmece ‘e fà unu muorzo ‘e ‘na scuatra ggià retrocessa. E cche saciccio, guagliú! Chiste oramaje me fanno parlà sulo. Cumminfatte ‘e cuane sufferetteno cchiú d’’o previsto jenno primma ‘nsotto e ppo venenno ripigliate doppo d’avé fatto ‘o surpasso e a ll’urdemo ce avette ‘a penzà santu Mertenso ca riuscette a llevà ‘e vverole dô ffuoco a Ppecchia ca steva ‘mpanca a sustituí don Rafele, ca – squalificato – se guardava ll’antraffa (partita) arret’ê llastre d’’o diriggibbile.’Nzomma, comme ‘o Cielo vulette, fenette tre a ddoje p’’o Napule ca cuntinuaje a ssufferí pure ô finale aizanno porvera pe ttutt’ ‘o campo mentre ‘o Cesena nun mullava ‘e ‘nu metro! E cche saciccio, guagliú! Chiste oramaje me fanno parlà sulo. Passammo ê ppaggelle: ANDUJAR 5,5: Nun tanto pecché avette particulare sfarme (colpe) ‘ncopp’ê dduje stuche (gol) pigliate [arrivate cu ttire ‘a fora] quanto pecché dimustraje ‘e nun essere attrezzatto pe ffà miracule... e ‘nu purtiere[quacche vvote] à dda essere capace ‘e farle! MESTO 6: Tutto summato dint’ê ddoje epate (fasi) facette ll’aunesta atalossa (prestazione) soja. ALBIOL 5,5: Defrèllo lle facette ggirà ‘a capa. Meglio a ll’epata ‘e màdera (fase costruttiva). KOULIBALY 5.5: Poco ajutato dô cumpagno ‘e sezziona (reparto) jette dint’ê cchiavette contr’ â chietta avanzata rumagnola GHOULAM 6: Se prupunette spisso e decendemente a ll’epata ‘e màdera (fase costruttiva). JORGINHO 5: jucaje a ‘nticielle (sprazzi),e cquanno pareva ca stesse p’appiccià ‘a luce, sparette; ‘nnaccasione d’ ‘e dduje stuche rumagnuole, nè isso, nè ‘o cumpagno ‘e sezziona (reparto) jetteno a nchiudere ‘ncuollo a cchillo ca tiraje ‘a fora. DAVID LOPEZ 5,5: tanta sustanza, e cchiú d’ ‘o cumpagno ‘e sezziona (reparto) tenette ‘mpiere ‘o centrocampo cuano (azzurro), ma manch’isso jette a nchiudere ‘ncuollo a cchillo ca tiraje ‘a fora e cce futtette pe ddoje vote! HAMSIK 5,5: Êsse avuto ‘a fà assaje ‘e cchiú! Êttem’ ‘aspettà ‘o 58° primmo ‘e vedé ll’arbardiglia (cresta) fà ‘na cosa bbona, accuncianno ‘a palla p’’o tre a ddoje ‘e Mertenso. (da ll’83° INSIGNE sv) CALLEJON 5,5: Facette poco e nniente e sse vedette! MERTENS 8: Fove forze ll’unico ca ce credette e ppe detasciamiento (per distacco) risultaje‘o meglio ‘ncampo: dduje stuche (gol) e n’ajuda (assist) pe ddà latte ê ppochi speranze d’’o Napule. (da ll’89° GARGANO sv) GABBIADINI 6.5: Miso ‘ncampo dô pprincipio comme primmo artigliero (punta centrale), ll’ècchese sampedoriano nun deludette i ‘o stuco(gol) suojo ‘o facette adderezzanno ‘a varca ‘ncopp’ô doje a ddoje. (dô 66° HIGUAIN 5.5: subbintraje (subentrò) scugliunato, acciaccato [male ‘e rine] e ssenza ggenio, nun lassaje signo e ffove addirittura siscato da cchiú dd’ uno!) all. PECCHIA 6 Purtaje bbuono. ll’arbitro IRRATI 5,5 M’aspettavo peggio ‘a ‘st’avvocato ‘e Pistoia, tifoso fiorentino e mme mettevo paura ca se fósse levato quacche preta ‘a dint’â scarpa..., ma pe furtuna nun ‘o facette, limitannose a ‘nu paro, ma ‘mpurtante cartelline jalizze (gialli)! E ccu chesto ve saluto e si dDi’ vo’ ce sentimmo doppo d’’a trasferta ‘mpiamonto contr’â juve, ca mo comme a mmo i’ mm’addimanno ch’ ‘a facimmo a ffà! Staveti be’. R.Bracale Brak