NAPOLI - LAZIO (31.05.15) 2 A 4 ‘A VEDETTE ACCUSSí

NAPOLI - LAZIO (31.05.15) 2 A 4 ‘A VEDETTE ACCUSSí E cche saciccio, guagliú! Pure ajeressera fernette a llutto i ‘o Napule perdette ll’urdema accasiona ‘mpurtante pe ccercà d’adderezzà ‘na tempurata nata storta e fenuta peggio cu ‘na scunfitta murtificante ca ‘ncampiunato assignaje â Lazzio ‘o terzo posto visto ca ‘a scuatra ‘e Pioli doppo n’antraffa (partita) ‘a nun credere ce asfaldaje pe cquatto a ddoje nchiudenno ‘o primmo ajone ‘ncopp’ô doje a zzero cu pParolo e cCandreva; a ll’arrancua po ‘o Pipita neutralizzaje ‘o vantaggio lazziale cu dduje stuche (gol) e ppareva ca vulesse adderezzà tutta ‘a facenna; ‘mmece però quanno lle capitaje ll’accasione bbona sciupaje tutto cosa sbaglianno ‘nu ricore e mmannanno ‘o pallonne ‘mmiez’ô rione d’ ‘a Luggetta e nno ê spalle ‘e Marchetti. E ghiette a ffení ca ô finale primma cu Onazi e ppo cu cKlose ‘a Lazzio ce cunzignaje ddoje purpette e cew facette nchiudere ‘sta tempurata (stagione) cu ‘o ffele ‘mpont’ô musso. Embè i’ ll’avevo ditto ‘e nun permettere a cchillu cestariello ‘e ggiggino-uocchie stuorte ‘e facce vedé chella faccia soja ‘e cestunia ‘ncopp’ê bbemate (spalti) d’’o san Paolo..., ma nisciuno m’ è stato a sèntere! Paggelle nun ne vulesse fà, ma ‘e ffaccio pecché aggi’ ‘a sfucà! ANDUJAR 3 – Serata no e ttroppi prane (errori) d’’o guardiano argentino ca tenette ‘ncopp’â cuscienza allimmeno tre d’’e quatto stuche (gol) pigliate, accumincianno dô primmo [quanno nun fove capace ‘e metterce ‘e ddoje mane ‘ncopp’â cunchiusiona ‘a fora ‘e Parolo] e fenenno cu ll’urdemo ‘e Klose quanno rummanette dint’â terra ‘e miezo e nun ascette a ffermà ‘o tedesco.E nun parlammo ‘e ll’ati dduje stuche ca pure ce mettette d’’o ssuojo. ‘Nzomma quatto tire avette e ffoveno quatte stuche! E cche saciccio! Ll’êvo ditto i’ ‘e fà jucà a rRafael(lo)! MAGGIO 6,5 – Tutto summato ‘o meglio d’’o mazzo: currette e sse sacrificaje appressuranno (spingendo) e difennenno comme a ‘nu guagliuncello e cce mettette core e ccegna (grinta). S’abbuscaje pure ‘nu ricore [ca puteva essere chillo d’’o terzo posto] ca però [comme v’aggiu ditto] ‘o Pipita sciupaje malamente! ALBIOL 4,5 - Pigliato ‘mmiezo ‘ncopp’ô stuco (gol) ‘e Candreva, assaje respunzabbile ncopp’ô stuco (gol) ‘e Onazi, ca se ‘nfilaje tra isso e Koulibalý, e addirittura ‘mbarazzante ‘ncopp’ô doje a cquatto ‘e Klose.Si quaccuno v’’o spia, stammo parlanno ‘e ‘nu campione d’’o munno! Figuràteve ‘o riesto che so’! KOULIBALY 4,5 – Cchiú ‘e ‘na fessaria a ll’epata ‘e disaccuplamiento (fase di disimpegno), po ll'assurdità tutale ncopp’ô stuco (gol) ‘e Candreva quanno se fermaje a ccentrocampo lassanno cumpletamente scuperta ‘a tràsera (difesa); cca nun se tratta ‘e descienzo (involuzione); no, se tratta proprio ‘e pazzaria! Rrobba ‘e clinica Colucci! GHOULAM 4 - Nun lle pozzo perdunà d’esserse fatto piglià ‘ncastagna ‘ngenuamente cu dduje cartelline jalizze (gialli) ‘int’a ddiece minute pure si ‘o siconno cartellino fove n’esaggerazziona ‘e ll’arbitro. A ll’epata ‘e màdera (in fase propositiva) sinamparco (comunque) nun è ca facette assaje! DAVID LOPEZ 4,5 È overo ca fove lassato quase sulo a ffà sezziona (reparto), ma ‘e centrocampiste lazziale se ‘nfilajeno dint’â mediana napulitana come ô fierrofilato dint’â ricotta e cchesto pecché ‘o spagnuolo nun facette culaturo (filtro) e llassaje passà a ttutte quante! INLER 4,5 Pure ‘a soja fove ‘na serata no: lassaje quase sulo a Llopezzo, nchiudette tarde ‘ncopp’ô tiro ‘e Parolo,’nun lle riuscette ‘e secutà a cCandreva ‘ncopp’ô doje a zzero e pp’ ‘o riesto aizaje porvera![Dô 52° GABBIADINI 6 Trasette isso i ‘o Napule cacciaje ‘a capa ‘a fora d’ ‘o sacco e mmettette paura â Lazzio.Peccato ca ‘o Pipita se ‘ncapunette a vvulé tirà isso ‘o ricore, ca po sbagliaje; ll’êsse fatto tirà a mManolo, forze mo stessemo parlanno d’ato! ] CALLEJÒN 5 - Doppo ‘na dicina ‘e minuti ‘a tràsera (difesa) lazziale decidette ‘e farle ‘nu cresemisso (regalo), saglienno malamente e llassannolo libbero e ffranco ‘nnante a mMarchetti. ma isso nun ne apprufittaje cu ‘na cunchiusiona debbula e ‘mpricisa, ca sfresaje (sfiorò) ‘o palo cu ttutto ‘o specchio d’’a porta a ddispusizziona. Cose ‘e pazze!’E bbuono ‘o pallone ‘e ll’uno a ddoje dato ô Pipita Troppo poco! HAMSIK 6 Quanno se mettette a ffà ‘o riggista dimustraje ‘e saperce fà; peccato ca avettemo aspettà ll’arrancua (ripresa) pe vvederlo ggiustrà a mmestiere! MERTENS 6 + Pochi ppalle ‘a jucà, ma quanno ll’avette sapette fà male cu ddelàntere (attacchi) furmidabbile, comme chella ca fruttaje o doje a ddoje: azziona a mmancina e ajuda (assist) a zzuco ‘e caramelle p’’o Pipita ca nun sbagliaje. [Dô 75° INSIGNE 6 Trasette bbuono cu ttanta cegna (rabbia) ‘ncuorpo, e ccercaje súbbeto ‘a porta truvanno però a mMarchetti! Pocu tiempo pe ffà ‘a differenza.] HIGUAÌN 4 – Cchiù ccroce ca delizzia: nun se vedette allimmeno nfi’ a cche nun avette ‘ncopp’ô pere ‘o pallone ca accurciaje ‘e ddistanze, ‘nu pallone ca Cagliecònno lle mmettette ‘’nnant’ â linia ‘e porta e ca fósse stato cchiú ddifficile ‘a sbaglià ca ‘a mettere dinto; gruosso ‘nnaccasione d’ ‘o pareggio mementaneo, sprecaje però tutto cosa ‘ncapunennose a vvulé tirà a fforza isso e sbaglianno ‘o ricore ch’êsse pututo mannà ‘o Napule ‘mparaviso e ‘mmece ‘o mannaje ‘int’ê prufunne ‘e casa ‘diavulo! ‘Nzomma facette e sgarrupaje comme à fatto pe ttutt’ ‘a tempurata (stagione)!Mo va a ssapé si è mmeglio ca resta o ca se ne va! [Da ll'89° ZAPATA S.V.] ALL. BENÌTEZ 4 - Pe ttutto ‘o primmo ajone ‘o Napule nun se putette guardà; po a ll’arrancua (ripresa) parette quase ca, ripigliannose, putesse succedere ‘o miraculo; ma fove sulo ‘na ‘mpressiona pecché ‘nu calo ‘e cuncentrazziona risultaje disastruso e cundannaje ‘o Napule a ‘na scunfitta murtificante, fotocrafia ‘e ll’intera tempurata (stagione) scellerata,quanno se mancajeno a uno a uno tutte ll’ubbiettive e ‘ncampiunato se fenette addirittura ô quinto posto, superate pure dâ Fiorentina! E cche saciccio! Mo, punto e da capo, DeLa se mettesse ‘ncapo ca p’’a tempurata ca vene à dda rifundà tutt’ ‘a scuatra; ce servono uommene overe, cu ‘e ppalle, liune e nno pecure, campiune overe e nno bbleffe e ca nun ce abbuffasse ‘e zifere ‘e viento! Arbitro ROCCHI 4,5 - ‘Sta meza cazetta fiurentina ca p’’o ppassato ce facette cchiú ‘e ‘na fetenzia...,nun se credesse ca cu ‘o ricore dàtoce ajere se fósse levato ‘e diebbete ca tene cu nnuje, pecché ‘mmece pure ajeressera ne aumentaje ‘a ddose nun cuncedenno durante ‘o primmo ajone ‘nu ricore a mMertenso strignuto ‘mmiezo ‘nfra Mauricio e bBasta, e addirittura siscanno timmuría (punizione) a ffavore d’’a Lazzio! P’ ‘o riesto po lassaje correre troppi falte (falli) lazziale e ttroppi perdite ‘e tiempo d’’a scuatra d’ ‘o conte Merda ‘a Puceriale [Lotito] pe nun ddicere po d’’o siconno cartellino jalizzo a gGhoulammo ca s’êsse pututo sparagnà! Ma era scritto ca â Lazzio ‘e Lotito, pe ‘sta tempurata, lle fósse attuccato ‘e jí a gghiucà ‘e prèvie (preliminari) ‘e Ciampionsa... e isso ll’ccumpagnaje! E ccu cchesto ve saluto. E cce sentimmo, si dDio vo’, ‘a prossima vota ca nun saccio quanno po’ essere. Staveti bbe’! R Bracale Brak