LIVERPOOL -NAPOLI( ciampionsa 27.11.19) 1 A 1 ‘A VEDETTE ACCUSSÍ

LIVERPOOL -NAPOLI( ciampionsa 27.11.19) 1 A 1

‘A VEDETTE ACCUSSÍ

Eccuce a nnuje guagliú! Ei’ mo che vv’aggi’’a dicere? Ve dico ca ancòra nun  m’è cchiaro si cu cchillu russimmo(pareggio) p’uno a uno ajeressera a Lliverpul(lo) contr’ê chianchiere  lucale guaragnajemo ‘nu punto  o ne perdettemo  dduje. Quase certamente se trattaje ‘e duje punte perze visto ca quanno accumminciaje ‘o sibbacco (match) ‘ntribbuna-divana cchiú d’uno diceva ca ce fósse juta bbona si nun n’êssemo pigliate sette cumme êva fatto ‘a primmavera, mentre quanno fenette tutte a ddicere: “Che ppeccato!” E i’ pure ce rummanette male quanno ô 65’ Lovren(no),senza ca nisciuno ‘o cuntrastasse,  cu ‘na tacatarrassa (colpo di testa) russimaje (pareggiò) ll’addaffa (rete) ca Ciruzzo êva miso dinto ô 21’. Però cumplessivamente tutte fovemo cuntente ‘e vedé ‘o Napule d’’a Ciampionsa asasa (soprattutto) durante ô primmo ajone (primo tempo), mentre a ll’arrancua (ripresa) ‘a scuatra napulitana nun fove cchiú essa e ddètte ‘a ‘mpressiona ‘e cuntentarese d’’o russimmo (pareggio). Peccato!

Passammo ê ppaggelle:

 MERET[‘O Lungagnone] 5,5  Tanto se mmereta pecché doppo ê primme quarantacinche minute ca êtte spurarese ‘e guante sulo ‘na vota ‘ncopp’a ‘nu tiro  ‘e Milner(ro) a ll’arrancua  (nella ripresa) apprimma arresecaje ‘e fà ‘a frittata ascenno malamente e pperdenno palla e mmenu male ca ‘o Ggialante nce mettette ‘na granna pezza e ppo ô 65’ ‘ncopp’â tacatarrassa (colpo di testa) ‘e Lovren(no) nun tenaje ‘e fà niente e sse facette fottere!

MAKSIMOVIC[‘O Ntontero] 6 ‘o Jancone ‘o mettette a ffà ll’udí (terzino) ‘e dritta e dâ parta soja jette  spisso ‘int’ê chiavette ‘nfra   Firmino e Mmanè. Sinamparco (comunque) migliuraje a ll’arrancua (nella ripresa) quanno ìo jucatore ‘e culore nun truvaje cchiú spazzio.

MANOLAS[Chitelassa] 7  ‘E capa ‘e ppigliaje tutte isso e cumplessivamente facette ‘na granna atalossa  (prestazione) fatta ‘e tacatamme (anticipi) e ttrasute a sciuliamazzo, pronto a rafaddà (respinge) senza paura ‘e tentative d’’o  Liverpul(lo).

 KOULIBALY[‘O Ggialante] 9 Atalossa (prestazione)’e spessore d’’o sinigalese ca se facette valé pe ccumme truvaje sempe ‘a pusizziona justa; p’’o riesto ce mettette forza e ammanna (sicurezza) e ssi fove nicessario mannaje ‘a palla ‘mmuntada (in tribuna). Istinajo (straordinario) ll’afazzo  (salvataggio) ‘ncopp’â linia doppo ‘o tiro ‘e  Firmino pe mmettere ‘na pezza â papera d’’o Lungagnone.

Mario RUI 6 Primmo ajone (tempo) aunesto facennose zumpà sulo ‘na vota Salah; arrancua (ripresa) cchiú ddificultosa, ma tutto summato atalossa (prestazione) senza grossi mmacchie i ‘o seje s’’o mmereta tutto.

 DI LORENZO 6,5 ‘O Jancone ‘o spustaje cchiú annante ‘ncopp’â linia ’e ll’arvasatte  (centrocampisti)  e ffove ‘na mossa azzeccata; ‘na pennellata d’artista ‘o missiddo (assist) pe Cciruzzo ‘nnaccasione ‘e ll’addaffa (rete); dètte puyre ‘na mana arreto e ssulo a ll’arrancua lle mancaje ‘nu poco ‘o sciato.

ALLAN[‘O ‘Ncrifato] 7,5  Che granna atalossa (prestazione)! Primmo ajone (tempo), scianío  (mostruoso) facenno ‘o cane ‘e presa pe ttutt’’o campo, ricuperanno ‘na cifra ‘e pallunne e cumbattenno cumme a ‘nu lione; doppo n’ora ‘e juoco êtte’a stregnere ‘e diente, ma truvaje nsi’ a ll’urdemo ‘a forza ‘e fà ‘o spezziale i ‘e correre cu ‘o sanco a ll’uocchie!

 ZIELINSKI 5,5 -Ll’attocca miezu zifo (voto) mancante pecché pure si   tatticamente facette ‘a faracca (differenza) cu armusaille (strappi) e ccatíe (tagli) mettenno ‘ndifficultà a Ggomez(zo), nun cuntrastaje a Llovren(no) ô 65’, ‘nnoccasione ‘e ll’addaffa (rete) ‘ngrese. Peccato!

[da ll'85'  YOUNES [‘O Mmerecato] 6  ‘E stima, ma jucaje troppo poco p’essere cchiú priciso.e pparlarne ‘e cchiú.]

RUIZ[Anema Longa] 6,5 Se nutaje poco dinto a ll’urdemi vinte metre, ma se facette apprezzà pe ccumme se mettette a sservizzio d’’a scuatra  cunquistanno tanti pallune pure cumplicate ascenno e ggestiunannole a mmestiere.

 LOZANO 5  ‘Nu zifo (voto) mancante pecche dètte ‘a sensazziona ‘e nunn’avé ancòra  capite qua’ songo ‘e meccaniseme d’’a scuatra: durante ô primmo ajone cu ttanti spazzie a ddispusizzione nunn’ ‘e riuscette a sfruttà  e all’arrancua (nella ripresa) êsse avut’’a pruvà a ttené auta ‘a scuatra e nnun ‘’o ffacette e ppirciò ‘o Jancone ll’êtte ‘a levà.

[dô 72'  LLORENTE 5  Facette troppo poco, trasuto cercaje quacche vvota ’e rènnerse  utile ‘mpressiona (in pressing)’ncopp’a cchi purtava palla, però dint’â muntaca  (area di rigore)‘ngrese nun se facette vedé.

 MERTENS 8  Nassio istinajo (attaccante straordinario) signaje ‘o quarta addaffa (rete ‘nCiampionsa) e ffove ‘nu stuco   (gol) overo bbello e ‘mpurtante: ‘nu cuncentrato ‘e pricisione, bburruda (freddezza) e ffaiaja (classe), mettenno ‘a palla addó Allisson(no) maje se fósse aspettato.

[da ll'81'  ELMAS 6 ‘e stima ma jucaje troppo poco pe pputé parlarne ‘e cchiú].

all. ANCELOTTI[‘O Jancone] 7   ‘Ncarraje tutto mettenno Di Lorenzo ô posto ‘e Peppe ‘a ‘nguenta;se guardaje ‘a castagna cuntentannose d’’o russimmo (pareggio), però finalmente ce ce facette vedé ‘int’ô mumento cchiú  dellicato d’’a caracuddamma (stagione) ‘o Napule ca ce piace: ‘na scuadra tosta, quadrata e ccuraggiosa ca ‘ncopp’a uno d’’e campe cchiú scamuse d’Aiuropa mettette ‘nnazzemma (in crisi) ê chianchiere ‘e Klopp(e) e ddoppo d’’o sibbacco (match) d’ajeressera, pare ca ‘a qualificazziona a ll’uttave ‘e Ciampionsa è cchiú vvicina. Sperammo ca p’’o Napule cagnasse coccosa pure ‘ncampiunato.  

arb.: Del Cerro Grande 5 Fove troppo largo ‘e maneca cu ‘e ‘ngrese e lle sparagnaje troppi cartelline jalizze (gialli), ma p’’o riesto fetenzie nun ce ne facette.

E ffermammoce cca; ajeressera ce fósse pututa pure jí meglio, ma pacienza, cuntentammoce e gghiammo ‘nnante. Turnammo a ppenzà ô campiunato: dummeneca ca trase ô san Paolo arrivano ‘e mmurtadelle bulugnese e ssi ‘o Cielo ‘o vvo’ llunnerí doje spero ca ve pozzo cuntà ca s’è affuzzato (vinto). Staveti bbe’. R.Bracale Brak