BENFICA – NAPOLI (C.L. 06/12/16) 1 A 2 ‘A VEDETTE ACCUSSÍ

BENFICA – NAPOLI (C.L. 06/12/16) 1 A 2 ‘A VEDETTE ACCUSSÍ Sí,sí e ssí guagliú putimm’essere cuntente. Ajeressera ‘o Napule jette a vvencere a lLisbona mettennose dint’â sacca ‘o passaggio a ll’uttave ‘ncimm’ô ggirone suojo, â faccia ‘e chi ce vo’ male accummincianno da chill’uocchie sicche ‘e Ciro Ferrara mannato ‘mPurtuvallo pe rromperce ‘o pasticciotto..., ma s’êtte ‘a fà dint’ê diente datose ca n’ati Ciro, ‘o Ciruzzo nuosto appena trasuto ‘ncampo ce penzaje isso a ccunzignarce ‘a nichemata (vittoria) apprimma cu ‘nu granne bbassurero urtizzante (suggerimento verticalizzante) pe Ppeppe ‘a ‘nguenta ca nun perdette ‘accasione e ppo mettenno iiso ‘e perzona ‘a firma sotto a ll’addaffa d’’a sicuranza (sicurezza) chella d’’o doje a zzero. ‘Nzomma nichemata (vittoria) ‘mpurtante ch’êsse pututa essere pure cchiú ttonna si arrivate a ll’87’, ‘ncopp’ô doje a zzero, Albiollo (5) truvannose ggià cu ‘a capa sott’â doccia, nun avesse fatto ‘na puttanata grossa comme a ‘nu palazzo ‘e casa, rijalanno palla e addaffa (rete) ô messicano d’’o Benfica ca nun se facette prijà e ssignaje custringennoce a fferní ‘a mubbara (partita) cu ‘o ppoco ‘e vespunaria (preoccupazione) pe ‘nu pareggio ca si pure fósse arrivato nun c’êsse fatto nè ccavero, nè ffriddo! Ma mo lassammo perdere ‘e mmalincunie; cu ttutto ca ‘mmece ‘e metterce ‘a muntazzimma (divisa) d’’a Madonna ‘e ll’Arco, scennettemo ‘ncapo aparate a llutto stritto, se vincette, se passaje ‘o turno e ringrazziammo ô Cielo! Passammo ê ppaggelle: REINA 6,5: Sempe prisente quanno fove chiammato ‘ncausa; durante ô primmo ajone (tempo) miraculuso ‘na primma vota ‘ncopp’a Jimenèzzo, nun ce putette fa niente ‘a siconna vota a ll’87’ quanno s’’o vedette arrivà annante libbero e ffranco! HYSAJ 6: Cchiù vvespone (preoccupato) ‘e difennere ca d’affennere,s’accuntentaje ‘e mantené ‘a pusizziona. ALBIOL 5 - Che peccato chella fessaria fatta a ll’ 87’, pecché nsi’ a cchillu mumento êva fatto ‘nu sibbacca matàlo (match perfetto) nun sulo arreto, ma pure a ll’epata ‘e reclaggía (fase d'impostazione) KOULIBALY 7 S’abbuscaje quase súbbeto ‘nu cartellino jalizzo (giallo)e cce penzajemo, ‘ntribbuna divano ca se fósse lassato cundizziunà, mmece ‘o ggialante nuosto furnette n’ata atalossa ailla (prestazione monumentale). GHOULAM 6,5 – Faticaje a ccuntené n’arillo comme a sSalvio e ppoco ce mancaje ca cu ‘na fessaria nun arresecaje ‘e rijalà ‘o vantaggio ô bBenfica; po però passanno ‘e minute se repigliaje bbuono soprattutto appressuranno (spingendo) comm’ô ssolito suojo. ALLAN 6,5 ‘O solito lIone ‘mmiezo ô campo: safaje (pressò) auto e se dannaje ll’anema p’azzannà ê feliette ‘e chille d’’o Benfica ca purtajeno palla. Se facette apprezzà pure pe ccomme participaje â munàvara (manovra). DIAWARA 5,5 - Priciso quanno jucaje ‘o pallone urtizzanno (verticalizzando),tenette ‘ncopp’â cuscienza coccosa, quanno se ‘ntalliaje a rricamà o comme a cquanno, durante ôprimmo ajone (tempo),sbagliaje quacche ppurzo (tocco )urizzuntale mettenno ‘ndifficurtà ê cumpagne. Perdunammolo però, tene sulo diciannov’anne; dàmmelo ‘o tiempo ‘e crescere! HAMSIK 6 Meno ‘mpurtante d’’o ssolito dètte sinamparco ‘na bbona mana â munàvara (manovra) e sfresaje (sfiorò) pure ll’addaffa (rete); a ‘nu certo punto arresecaje ‘nzieme a gGhoulamme ‘e fà ‘a frittata, ma – pe ffurtuna - Guedes nunn’ apprufittaje. [Dô 72' ZIELINSKI 6 – Trasuto dint’ô mumento bbuono nun s’avette dannà ll’anema, ma se facette apprezzà ‘mmiez’ô campo e sfresaje (sfiorò) pure ‘nu stuco (gol)]. CALLEJON(Peppe ‘a ‘nguenta) 7,5 Bbella serata d’’o spagnuolo ca durante ô primmo ajone (tempo),arretraje a ddà ‘na mana ma quanno truvaje spazzio addivintaje dicisivo scattanno e iabbranno (crossando) cuntinuamente. Doppo d’avé sfresato (sfiorato ) ‘nu stuco (gol) ‘na primma vota, finalmente ‘o truvaje ô 60’, sfruttanno a mmestiere ‘na granna palla ‘e Ciruzzo e sbluccanno ‘a sibbacca (match). Manolo GABBIADINI 5 ‘E ‘ncuraggiamento, pecché l’atalossa (prestazione)( soja fove necativa visto ca nun fove capace maje ‘e rennerse periculuso e vvisto ca gghiucaje sempe senza cazzimma e ssenza chella trestízzia (cattiveria) ca ‘nu nassía (attaccante)êss’’a tené! [Dô 57' MERTENS (Ciruzzo) 8 Justo trentaseje minute pe ll’arillo berga, ca assummaje n’jusaida (un assist) cu ssette parme ‘e cacchio e n’addaffa (rete) dicisiva tanto pe ddimustrà quanto fove nicessario, p’’a nichemata (vittoria) luvarda (azzurra) Ciruzzo ‘o strummulillo!] INSIGNE 6 – Niente ‘e spettaculare,ma bboni ccose venetteno pure ‘a Lorenzigno soprattutto durante ô primmo ajone (tempo). [Da ll'80' ROG s.v.] SARRI 7 Quanno se vence vence pure ‘o mutarribbo (allenatore) e ajere vincette pure isso ca però nun se ‘nventaje niente mannanno ‘ncampo ‘na furmazziona p’apprimma guardarse ‘e ssacche mettenno Allanno a ll’armidanno (centrocampo) ô posto ‘e Zielinski cchiú ppurtato a attaccà; cunfermaje a gGabbiadini a ccentro d’’a primma linia, però po pe ffurtuna se decidette a ffà scennere ‘ncampo a cCiruzzo ca lle levaje e ccastagne dô ffuoco e cce dètte ‘a cualificazziona!. arbitro LAHOZ (Spagna) 5 Niente ‘e particulare, ma sparagnaje troppi cartelline jalizze ê purtuchese, mentre a Koulibalý ‘o nutizziaje (ammoní) ô primmo carí (fallo) manco ggiddo (grave) E cche saciccio! E fermammoce cca. ‘O Napule torna a gghiucà ‘ncampiunato dummeneca ca vene ê mezza e ppirciò si dDi’ vo’ ce sentimmo lunnerí ca vene e spero ca ve pozzo cuntà ca nun ce simmo ‘ntussecato ll’apritivo, ma ca anze ‘o Napule à vinciuto n’ ata vota cu ttutto ca dummeneca jammo ô sant’Elia e ce ‘a vidimmo cu ‘o Cagliari ca nunn’è ‘e certo ‘nu bbello accunto (cliente)! Staveti bbe’. R.Bracale Brak