Napoli-Sampdoria 1-2 LL’AGGIU VISTE ACCUSSÍ

Napoli-Sampdoria 1-2 LL’AGGIU VISTE ACCUSSÍ
DE SANCTIS- 5,5 Âmm’ ‘a aspettarlo: nun è ancòra isso: sbagliaje spisso ‘e rimesse; ‘na bbella chiusura ‘ncopp’a Cassano, ma si nunn ce fosse stato Grava... erano ca**e!
‘Ncopp’ â bbotta ‘e Guberti (o comme ca**o se chiamma...) ‘a fora area m’à fatto tremmà!
GRAVA– 6+ Certamente ‘o meglio d’ ‘a difesa... Ll’ attuccaje Cassano e p’ ‘o nnacchennello barese pe bbuone sittantacinche minute fuje notte; una vota ‘o lassaje ‘e pede e‘o nnacchennello barese riuscette a ddà ‘na palla a Pozzi(?)
CANNAVARO-4—Inutile, fesso e pericoloso .’Ncopp’ ô zzero a zzero, diece minute primma ca fernesse culo'echiummocannavaro s'era menato comme a ‘na crapa a ssacco 'e patane 'ncuollo a Pozzi(?) (ca però steva 'nfuorigioco) e ll’aveva jettato ‘nterra in area ‘e ricore! Si avessemo perzo, doppo ‘nu primmo tempo fantastico, ma senza zuco, pecché nun s’era riuscito a signà manco ‘nu gollo..., si avessemo perzo pe bbia 'e Culo'echiummocannavaro,dich’io ca 'e cumpagne avessero tenuto tutt' 'o diritto 'e ll'accidere a bbotte 'e cauce 'nculo, appicciarlo a centrocampo e menà 'e ccennere dint'ô primmo cesso 'e Marassi!

CAMPAGNARO – 6,5-Turnaje a essere ‘o bbellu jucatore ca sapimmo: Difennette cu granna autorità. Belle cierti procressione annante...
MAGGIO- 5- Doppo Cannavaro, ‘o peggio! Aizaje parecchia póvera. Nun è ancóra isso e se vedette; nun azzardaje maje n’uno contro a uno o ‘nu crosso decente! DOSSENA- 6,5- Ô primmo tempo guvernaje ‘a fascia soja cu granne autorità e azzardaje pure ‘na concrusione pericolosa. Però po ô siconno tempo risultaje assente nun giustificato!
HAMSIK- 7,5 Chianu chiano sta turnanno ‘o Marekiaro ca me piace; assaje meglio ‘e ll’uccasione precedente: calmo, sicuro, senza pause e soprattutto spietato sott’â porta ô mumento ca servette!Se decidette a ffà ‘o mestiere ca sape fà e a gghiucà cu ‘a capa aizata. Bentornato Marekià! GARGANO-7+ Che gudimento a vederlo correre, pressà pe nuvantatré minuti e ripartí ‘ntromba! ‘Nzomma fuje ‘o meglio Gargano.’Ncarraje ‘na granna bbotta cu ‘na punizziona ca jette a sbattere ‘nfacci’ â traverza pariggianno ‘o cunto cu ‘a traverza d’ ‘a Samp. E che dicere d’ ‘a palla ‘ntelliggente passata a Marekiaro p’ ‘o gollo d’ ‘o uno a uno?Sarrà stato pure studiata a ttavulino, ma ‘a freddezza mantenuta fuje splennente!
PAZIENZA-7- Comme se fa a ffarne a mmeno? Currette, se sacrificaje e quanno servette facette ‘o figlio ‘e ‘ndrocchia... Che ato se po’ vulé?
LAVEZZI- 8- ‘O meglio Pocho d’ ‘a staggiona: quase ‘nnarrestabbile quanno partette a capa ’a sotto; centraje pure ‘o specchio d’ ‘a porta cu ‘na bbotta a vvolo e Curci facette ‘o miraculo! ‘A palla data a Cavanip ‘ ‘o doje a uno finale s’ammereta d’essere ‘ncurnicita o misa ‘mbacheca!
CAVANI-7,5 Tre golle dinto a ttre partite e scusate se è ppoco! È stato però spisso troppo luntano dâ porta.E ‘mmece avesse stà sempe dinto a ll’area ‘e ricore, pecché è isso ca à dda menarla dinto; cumminfatte doppo ca era stato ‘nu poco appannato pe uttantacinque minuti.ô mumento culminante d’ ‘o finale travulgente ‘mmiezo a ttutta chella ggente ce facette addecrià cu ‘na zampata ‘e attaccante ‘e razza!
SOSA- s.v.Era trasuto pe mantené palla, ma nun ‘a tuccaje ‘na vota!
MAZZARRI- 7,5 Ajeressera finalmente aggiu visto ‘o Napule ca me piace: chillo ca corre e raggiona, pure si finalizza poco! Comunque s’ànn’ ‘a sbattere ‘e mmane a ll’allenatore pecché è mmerito sujo quanno ‘a squatra soja riesce a dimustrà ca tène qualità ‘e juoco!Ajere ‘a squatra fuje tanto sicura ‘e sé ca jucaje pe vencere pure quanno a pochi minute dâ fine steva ‘ngiustamente sotto ‘e ‘nu gollo; ‘nzomma ‘na squatra cu carettere e ppa**e; merito ‘e Mazzarri ca evidentemente dinto a dduje juorne era riuscito a ddà ê singule ‘as mutivazzione nicessaria; a parte po ‘o fatto ca à ‘ncarrato ‘a formazzione cu Grava e Campagnaro ‘ndifesa (i’ però dô primmo minuto avesse levato Cannavaro e miso Cribari) e cu Pazienza e Gargano a centrocampo annullanno ‘a costruzzione d’ ‘o juoco d’ ‘a Samp. Si riesce a quadrà ‘a difesa stammo a ccavallo!
Ll’arbitro VALERI 4,5 ‘Stu trentunenne sischetto rumano avette pochi situazzione difficili ‘a frunteggià durante â partita, ma cierte scelte soje facettero discutere,riuscenno a scuntentà a tutte, ma soprattutto ê napulitane ca se vedettero assignà contro ‘nu ricore all’urdimi minute ‘ncopp’ ô zzero a zzero pe ‘nu fallo (ca ce steva sí), ma fatto ‘ncopp’ a ‘nu jucatore ca steva ‘a mez’ora in fiuorigioco! Eppure leggo ca chisto êsse ‘a essere uno d’ ‘e cchiú prumettente arbitre italiane… Cose ‘e pazze!
Conchiudenno i’ faccio ‘e ccorne e ddico: Â faccia ‘e tutte ‘e ssecce! Grannissimo Napule ca facette ‘nu juoco cuntinuo e asfissiante e p’ ‘a Samp non ce fuje partita.Peccato ca ô primmo tempo ‘o Napule nun riuscette a cuncretizzà; ‘nu regalo ‘e ll'arbitro e stévamo sotto e steva pe succedere ‘o ‘mpiccio; ma pe furtuna ‘e guagliune napulitane sprunate ‘a Mazzarri ànnu tirato fora ‘e ppa**e âmmo agguantato ‘na vittoria ‘mpurtantissima e meritata ca p ‘’o mumento ce mettette a cinche punte, ‘a coppa a cchella vecchia zoccola d’ ‘a juventússa ca aiutata ‘a ll’arbitro Bergonzi jette a vvencere a Udine!
Nun songo d'accordo cu chi dice ca ‘e golle d’ ‘o Napule so’ state episodi isolati o merito d’ ‘a bravura d’ ‘e singule ,pecché pe mme s’ è trattato d’ ‘o frutto ‘e n’organico ca , a cierti mumente, mettenno ‘a parte Maggio (ca nun fuje e nun è ancòra isso) dètte emozzione bbellissime, soprattutto ricurdanno ‘a prestazione scadente d’ ‘a partita ‘e Europa League.
Granne Lavezzi cu ‘na partita jucata veramente a cciento 100 all'ora pe tutte ‘e novantatrè minuti ( era ora!!) e p’ ‘o passaggio ca fuje ‘nu zuccaro( era ora!!) , ma ‘nu bravo quase a tutte (‘a fora ‘e Cannavaro, Maggio e De Sanctis).
E mmo, me dispiace pe Bogliacino, ma miercurí âmm’ ‘a paccarià ‘o Chievo e ppo doppo....... Europa League â granne!! FORZA NAPOLI!
Brak