‘O SCIOPERO D’ ‘E JUCATURE

‘O SCIOPERO D’ ‘E JUCATURE
Cheste so’ ccose ‘e ll’atu munno, ca se ponno vedé sulo cca dinto a ‘stu paese ‘e operetta! Se fottono ‘ngagge ‘e meliune d’evere..., e chiste vonno fà ‘o sciopero, p’ ‘e diritte lloro!?.... Ma stammo overo danno ‘e nummere!?... E nun me venessero a ddicere ca ‘nserie B ce stanno jucature ca pigliano 1100 evere ô mese e ànno mantenerse: ’a maggiuranza ‘e chille lla tene (si ‘a tene) ‘a terza elementare e ‘mprupurzione piglia cchiú assaje ‘e uno ca cu ‘na laurea tosta se porta â casa sí e nno 1500 evere! Lloro fanno ‘o sciopero? e i’ mo proclamo ‘o mio: chillo ‘e nun gghí cchiú ô stadio e accussí vedimmo comme ll’ abbrucia ‘o culo!..
E penzà ca ce stanno tanti povere penziunate ca p’ arrivà â fino d’ ‘o mese ànno ‘a jí a scavà dint’ê puoste d’ ‘e mercatine, ‘mmiez’ê scarte d’’a frutta e vverdura e ‘a carne o ‘o pesce ‘e vvedono ‘na vota ô mese! ......Pòvere a nnuje!!!! Si pure ‘e jucature ‘e pallone fanno sciopero significa ca pe ‘stu paese è overamente ‘a fine! Nisciuno è cuntento; tutte prutestano: operaje cummirciante, precarie, pennarule etc. S’’a ridono sulo chilli quatte magnafranche ‘e deputate e senature d’ ‘o cuverno e de ll’opposizzione... Finalmente tutte ànnu capito ca p’ avé coccosa s’à dda sciuperà ma, secondo me no ô 25 e ô 26 settembre ma fino a ferragosto ‘e ll’anno ca vene, accussí po’ doppo se ne ponno jí ‘nferie senza rompere ‘e ppa**e.... a chi fatica( o spera ‘e faticà o accumminciarlo a ffà o ê penziunate ca tutte ‘e juorne ànno fà ‘e cunte cu ‘a miseria d’ ‘a penzione, cu ‘e mmedicine ca s’ànn’ ‘a pavà pecché miedece e farmaciste stanno sciuperanno pure lloro)! Ssciú p’ ‘a faccia lloro! Se ne mettessero scuorno! E ‘a ggente continua a vederle, a vatterse, a spennere sorde pe trasferte e abbunamente! E tutto pe ‘sti quatte buffune! Ma jessero a arrubbà dint’ê cchiesie, accumincianno ‘a Sergio Campana!
Brak