MEZZANIELLE SFEZZIUSE

MEZZANIELLE SFEZZIUSE


chello ca serve pe seje perzone
600 gramme ‘e mezzanielle spezzate a ppiezze ‘e cinche cm.,
‘na cepolla ndurata ‘e Muntoro ammunnata e ntretata fina fina,
150 gramme ‘e prusutto cruro tagliato a varriglie (cm. 5 pe 1 pe 1),
3 mazziette ‘e rucula pirciante lavate asciuttate e ntretate,
100 gramme ‘e caso pecurino rattato finu fino,
100 gramme ‘e ricotta ‘e pecura,
dduje cucchiare ‘e ‘nzogna,
sale duppio ‘na vrancata,
sale fino e ppepe janco mmacenato a ffrisco q.n.s.
pane rattato q.n.s,
‘nu tuppeto ‘e prutusino lavato asciuttato e ntretato.

comme se fa:

Mettere a arvere dinto a ‘na caurara cu paricchia acqua salata(vrancata ‘e sale duppio) ‘e mmezzanelle e cuntemporaneamente dinto a ‘na prupurziunata tiella fà sciogliere a ffuoco miccio ‘a ‘nzogna;farve suassà ‘a cepolla ndurata ‘e Muntoro ammunnata e ntretata fina finae appena piglia culore agnadirve ‘e mazziette ‘e rucula pirciante lavate asciuttate e ntretate,’e varriglie ‘e prusutto e ‘a ricotta dellajata cu ‘nu cuppeniello d’acqua d’ ‘a pasta, lassà ‘nzapurí pe cinche minute e agnadí all’urdemo ‘o ccaso pecurino, ‘nu suspiro ‘e sale fino e paricchiu ppepe janco mmacenato a ffrisco; lassà ‘nzapurí pe n’ati cinche minute; a chistu punto sculà ‘e mmezzanielle vierde vierde e revacarle dint’â tiella. ammiscà, derrammarve(spargervi) ‘ncoppa ‘o ppane rattato e fà ‘nzapurí pe ‘nu paro ‘e minute .Fora d’ ‘o ffuoco derrammarve(spargervi) ‘ncoppa ‘o pprutusino ntretato, purziunà e serví caudecaude ‘sti sfezziuse mezzanielle. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
Raffaele Bracale