RICCE ‘E FURETANA ALLÍCCATE ‘E MUSTACCE

RICCE ‘E FURETANA ALLÍCCATE ‘E MUSTACCE

Chello ca ce vo’ pe sseje perzone
600 gramme ‘e ricce ‘e furetana,
400 gramme ‘e patane vecchie tagliate a ffarinule ‘e ½ cm. ‘e squina,
200 gramme d’aulive nere desciussate,
100 gramme ‘e sulumiglie d’alice salate sott’uoglio,
½ bicchiere d’ uoglio ‘auliva dunciglio,
50 gramme ‘e ‘nzogna,
½ cepolla ndurata ‘e Muntoro ammunnata e ntretata,
‘nu spiculo d’aglio ammunnato e ntretato finu fino,
‘na fraschetella ‘e peperna spullecata,
sale duppio ‘na vrancata,
sale fino e ppepe janco mmacenato a ffrisco q.n.p.

Comme se fa
Ricà dinto a ‘na prupurziunata tiella ll’uoglio e ‘a ‘nzogna, agnadí ‘o ttrigliato d’aglio e cepolla e a ffuoco allero farle piglià culore; appruntà a ffarinule ‘e ppatane e agnadirle ô zzuffritto, avascià ‘o ffuoco e lassà cocere pe vinte minute;ntretà ‘e sulumiglie d’alicesalata ‘nzieme a ll’aulive e agnadí tutto ê ppatane cu ‘na fraschetella ‘e peperna spullecata; accuncià ‘e sale fino e ppepe janco mmacenato a ffrisco e e tené sempe a ffuoco miccio pe cinche minute ammiscanno spisso. Fraditanto fà àrvere pronte pronte ‘e ricce ‘e furetana dinto a otto litre d’acqua vullente salata (vrancata ‘e sale duppio); scularle e revacarle dint’â tiella e tuïglià pe tre minute a fuoco miccio; ‘mpiattà e serví caude ‘e fuculare ‘sti ricce ‘e furetane, alliccate ‘e mustacce!
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
Raffaele Bracale
mantené ‘ncaudo