PALERMO – NAPOLI (26/08/12) 0 A 3!LL’AGGIU VISTA ACCUSSÍ

PALERMO – NAPOLI (26/08/12) 0 A 3! LL’AGGIU VISTA ACCUSSÍ Che putimmo dicere guagliú? Ca meglio ‘e comme jette ajeressera nun puteva jí e ca meglio ‘e accussí nun se puteva accummincià ‘sta tempurata nova! Ajere ‘a scuatra luvarda cunzignaje a cchella ‘e Sannino tre sfugliatelle ricce e nun se purtajeno â casa manco ‘nu cannuolo (accussí comm’ avevo prunusticato) e dimustraje pure ‘e sapé suffrí e quindi ‘o campiunato e ‘a tempurata se songo arapute cu bboni pruspettive!Vargas(e) trasette dimustranno d’essere ‘nu buonu jucatore e me facette piacere soprattutto ll’altruisemo suĵo. A ‘stu punto forze nun serve accattà n’ata ponta: facimmo ‘e scungiure, speranno ca Erode Mazzarri lassa crescere a ‘sti guagliune (Insigne e Vargas(e), senza strafucarle dint’â connola e ve faccio avvedé ca nun restammo deluse.Cu ‘o rientro ‘e Pandèv(vo) e zZuniga ‘a qualità nun manca pe nniente!Superlativo Marekiaro e chino ‘e salute Behrami ca a cquanto pare nun ce fa allamentà p’ ‘a partenza d’ ‘o Mota! Ciuccio fa’ tu!È accumminciata ‘a caza (caccia) a ll'udiata rubentús(sa).....Passammo ê ppaggelle: DE SANCTIS 5,5 Poco ‘mpignato; ô ssolito ascette ddoje otre vvote a vvacante. Ma quanno se ‘mpara, quanno? CAMPAGNARO 7,5 Atalossa (prestazione)gagliarda e ttosta: cchiú ‘e ‘na vota se facette ‘a fascia comme a n'ala. CANNAVARO 5 Nuvanta minute senza fa danno, ma me facette magnà ‘o fecato quanno facette cirti rilance a capa ‘e saciccio, luonghe e scunclusiunate; ‘o fatt’ è ca se penza d’essere Krol, ma ‘e l’ulandese nun tène nè ‘e piere, nè ll’inteliggenza. Ma ch’ aspetta Mazzarri a ffà jucà Fernandèz(zo) o Gamberini ô posto ‘e st’inutile culo’echiummo? BRITOS 7 Finalmente n’atalossa senza ‘na sbavatura:muntaje ‘a guardia a Hernandez(zo) e vincette sempe! MAGGIO 6,5 ‘A chiena e ‘a vacante; meglio ‘a vacante,ô primmo tempo e ‘a chiena, a ll’arranqua(la ripresa) cu paricchi sgummate ‘ncopp’â curzia quanno avette a disposizzione n’ autostrada; Marekiaro lle furnette ‘na suggerenzia (suggerimento) spiciale e isso nun sbagliaje ‘nchiudenno ‘a rencontra ‘ncontropiede. BEHRAMI 6,5 Quacche bagunzo(pasticcio),ma paricchi ricuperazzione (recuperi), bbuoni dialochi e pasiglie (passaggi) sistimate; cumplessivamente atalossa sustanziosa. INLER 6,5 Regia puntuale e urdinata (dô 77° VARGAS 6,5 Finalmente ‘na bbella cosa : ll’ajúda a zzuco ‘e caramella p’ ‘a terza sfugliatella riccia! HAMSIK 8 (‘o meglio) ‘Na rredda ‘a levà ‘o pilo ‘a cuollo, cu ‘nu missile dint’ô sette,n’ajúda cu rica e cumpasso e subberanía(dominio) d’ ‘a trecquarte:chisto nun s’à dda vennere manco ll’anno ca véne.È mmeglio ca De Pezzentiis e Biguncino s’ ‘o mmettono ‘ncapo! ARONICA 6 Chello êva ‘a fà e cchello facette: sustentazzione cuntinua (appoggio costante) a mancina. INSIGNE 5,5 Se muvette cuntinuamente a servizzio d’ ‘a scuatra, ma ce fóssemo aspettato ‘e cchiú, pe ccuje le dongo miezu voto mancante. Ma ‘o guaglione ce sta e ‘o ttène! Abbandunaje pe calambre (crampi). (dô 61° DZEMAILI 6 Furtilizzaje (irrobustí) ‘a cerniera e mità campo e avviaje ll’azziona d’ ‘a terza sfugliatella! CAVANI 7 A tutto campo, se magnaje, pe precipitazziona,’na rredda fatta, ma ricuperaje ‘o voto pe tutto chello fatto tampunanno ‘ndifesa e grazzie a ll'ajúda d’Edu ca sfruttaje a dduvere. All.MAZZARRI 6,5 Vincette tre a zzero, ‘ntrasferta,’ncopp’ a ‘nu campo scamuso, cu ‘nu guaglione titulare e senza dduje jucature ‘mpurtante squalificate.Mo però nun me pare ‘o caso ‘e fà castielle nn’aria; cca s’ à dda jí cu ‘e piere ‘e chiummo jurnata pe gghiurnata accummincianno ggià ‘a dummeneca ca vène cunfermmannose cu ‘na scuatra tosta comme â Fiorentina! E ppo nun ce scurdammo ca ‘e cunte se fanno sott’ô lampione. arbitro: ORSATO 4,5 Chesta meza cazetta teneva cchiú ‘e debbeto cu ‘o Napule e ajeressera credette ‘e s’ ‘e llevà scuntentanno ê palermitane pecché si ‘e tanti cartelline jalizze ca ce affibbiaje ce putetteno stà ‘a fessaria grossa ‘a facette nun facenno capí a cCetto ca,comme dice ‘o recolamento, nun ll’aveva dato ‘o ricore, ch’êsse pututo fà cagnà faccia â partita pecché ‘o palermitano, facenno ‘na strunzata,doppo ca Maggio ll’aveva arrunzato, êva tirato ô stesso ‘mporta facennose parà ‘o tiro... E nchiudimmola cca gudennoce ‘sta vittoria nfi’ a dummeneca ca vène quanno - si dDi’ vo’ - ce sentimmo n’ata vota! Staveti be’! R.Bracale Brak