CRAPETTO AMMULLECATO

CRAPETTO AMMULLECATO Chello ca ce vo’ pe sseje perzone 2 kilò ‘e coscia ‘e crapetto a ppiezze ‘e tre centimetre ‘e squina, 100 gramme ‘e ‘nzogna, 500 gramme ‘e cepolle janche ammunnate e ntretate suttile suttile, ‘nu bicchiere ‘e vino janco asciutto, ‘nu bicchiere d’ uoglio ‘auliva dunciglio, 100 gramme ‘e caso pecurino rattato finu fino, 100 gramme ‘e mullica ‘e pane casareccio arruscata ô tiesto e mmacenata cu ‘nu mmiscradore ‘nu tuppeto ‘e prutusino lavato, asciuttato e ntretato finu fino, sale fino e ppepe niro mmacenato a ffrisco q.n.s. Comme se fa Mettere ‘a nzogna dinto a ‘na cummedità bbona p’ ‘o tiesto, farla accumplià a ffuoco allero,agnadí ‘o ttrigliato ‘e cepolle janche e farle piglià culore sempe a ffuoco allero; fraditanto lavà e asciuttà ‘e piezze ‘e crapetto e sistimarle ‘ncopp’ê cepolle; avascià ‘o ffuoco e lassarle cocere pe ‘nu quarto d’ ora; ‘nfonnerle cu ‘o vino e farlo svapurà; ammiscà ‘a mullica ‘e pane casareccio arruscata ô tiesto e mmacenata cu ‘nu mmiscradore ‘nzieme cu ‘o ccaso pecurino rattato finu fino e derrammarle ‘ncopp’â carne; ricà tutto ll’uoglio e accuncià ‘e sale fino e ppepe niro mmacenato a ffrisco e mannà dint’ô tiesto ggià caudo a 180° e tenerle pe vinte minute;a ll’urdemo derramma cu ‘o tuppeto ‘e prutusino lavato, asciuttato e ntretato finu fino; ammiscà e serví caudo ‘e furno ‘stu sfezziuso crapetto ammullecato accumpagnate cu patane fritte o verdura arvata e cunnita cu sale duppio, uoglio ‘auliva dunciglio, limone e aglio ammunnato e ntretato finu fino. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà. Mangia Napoli, bbona salute! Scialàteve e cunzulàteve ‘o vernecale! Raffaele Bracale .