ARSENAL- NAPOLI 2 A 0 ( 1/10/2013) ‘A VEDETTE ACCUSSÍ

ARSENAL- NAPOLI 2 A 0 ( 1/10/2013) ‘A VEDETTE ACCUSSÍ Che nervatura, guagliú e cche delusione! Nun tanto p’’a scunfitta ca contro a ‘na scuatra tosta comme a ll’Arsenàllo d’ajeressera ce po’ ppure stà, ma p’’a manera ca mme e cce lassaje ll’amaro ‘mmocca! E cche saciccio!I’ nun dico accedíteve ll’uno cu ll’ato, sparàteve, curtelliàteve..., no nun dico chesto..., ma ô mmacare dàteve ‘nu paccaro, ‘na carocchia, ‘na sputazzata ‘nfaccia! Niente! Chi t’’o ddà?! D’accordo ce mancaje Higuain, e ll’assenza soja se sentette pe ttutt’’o fullé, ma chesto nun po’ spicà ‘a brutta atalossa d’’a scuatra cuana ca contro a ‘na scuatra sempe ‘mpalla, cunvinta, tassosa (veloce) e ca jucaje a mmemoria, facette ‘a fijura d’’o marvizzo, senza cegna, senza curaggio e venette a mmancà dint’ê mmecce e ddint’ a ll’uommene cchiú ‘mpurtante da Marekiaro a bBehrami da Caglièconno a pPandèvvo miso a ffà chello ca nun po’ ffà, ciovè ‘a primma ponta. ‘Ncunchiusione ê cannune cu ‘a maglia rossa avastaje ‘a primma scarza straurdinaria mez’ora pe vvencere ‘o fullé e mmiraculo fove si d’’o Napule nun ne facetteno carne pe purpette! E cche saciccio!Passammo ê ppaggelle: REINA 6 Nun fóveno (furono) sfarme (colpe) soje ‘e ddoje rredde d’’e cannune cu ‘a maglia rossa, anze pe ttutto ‘o fullé cercaje ‘e ajutà ‘a varca cu asciute ‘mpurtante soprattutto dint’ê mumente cchiú ttuoste d’’o fullé e a ll’arrancua salvaje ‘a porta soja dâ terza rredda. MESTO 5 Pe tutt’’o fullé rummanette a difennere ‘a camma soja, ma lassaje sulo, libbero e ffranco a Ozìllo ‘ncopp’â primma rredda ‘e ll’Arsenàllo e ‘nfase uffenziva dimustraje ‘e nun essere a ll’ardezza, d’essere ‘nzomma ‘nu jucaturiello ‘e serie B sbaglianno malamente cruzze (cross) e bbassurere(suggerimenti). ALBIOL 6 Cchiú ‘e ‘na vota pruvaje a mmetterce ‘na pezza salvanno ‘o Napule dô cullasso (tracollo), ma nun putette fà niente ‘ncopp’ê ddoje rredde‘e ll’Arsenàllo.Ascette pe precauzziona visto ca era sciso ‘ncampo tiéneme ca me tengo(da ll'82° FERNANDEZ sv) BRITOS 4 Serata no d’’o lungagnone ècchese Bologna. Cundizziunato ‘a ll’arbitro [ca, si sulo ‘o giuvinatto penzava ‘e ‘ntervení, lle siscaje contro troppi punizzioni] smarrunaje cchiú ‘e na vota!Pe gghionta ‘e ruotolo, mentre Marekiaro sbagliaje ‘o stoppo ‘ncopp’a ‘nu paro ‘e pugge (rilanci) favurenno ll’avverzarie, Zuniga nun lle dètte ‘na mana ‘nfasa difenziva e ‘o puverielle se truvaje a ffà ‘e cunte cu avverzarie troppo tassuse (veloci), ggente (scusate si è ppoco) comme a sSagna, a rRamsey e a Ozíllo.Juto ‘ncunfusione spisso sbagliaje a ppuggià (rilanciare) e fallette còmmete pasiglie (passaggi) che facetteno scattà ll'aziona d’’e cannune cu ‘a maglia rossa, comme ô mumento d’’a rredda d’’o doje a zzero. Zuniga 4,5 Brutta atalossa d’’o culumbiano spicialmente ‘nfasa difenziva quanno sistematicamente fove zumpato da Sagna, mentre ‘nfase uffenziva aizaje porvera senza zuco e ccunnimma. Poche ore primma êva firmato ‘o rinnovo d’’o cuntratto, ma forze teneva ancòra ‘ncapo ‘a juventússa e a pparrucchino-conte! INLER 5 ‘A chiena e ‘a vacante; anze primma ‘a vacante e ppo ‘a chiena. Pe mmità d’’o primmo ajone sufferette ‘a zzérusità (il dinamismo) furiuso ‘e ll'Arsenàllo.Criscette a ll’arrancua, ma rummanette troppo attaccato â difesa. BEHRAMI 5 Atalossa poco suddisfacente; nfi’ a ll’urdemo pruvaje a farese sèntere ‘mpressione (in pressing), ma cu n'avverzario ca mustraje granna sicurezza dint’ô pussesso ‘e palla ne cacciaje poco o niente e facette acqua dâ pippa. Peccato. CALLEJÓN 5 Aiutaje assaje ‘nfasa difenziva e dê pparte soje ‘o Napule sufferette poco, ma ‘nfase uffenziva nun fove maje periculuso.(dô 76° ZAPATA sv) HAMSIK 4,5 Jette a lLondra a ffà ‘o turista. Serata no ‘e Marekiaro ca nun riuscette maje a farse valé; p’’a verità a ll’arrancua ‘nu paro ‘e vote pruvaje a trasí dint’â camma, ma nun fove cosa e ‘o guaglione, sacrificannose nun ne cacciaje niente e fernette pe ccorrere a vvacante nfi’ ô prazzo (termine) d’’o fullé. INSIGNE 5,5 Miezu voto ‘e cchiú p’avé fatto ‘a mossa ‘e nun menà mmunnezza ‘nterra, ma ‘a soja fove cumplessivamente ‘na brutta atalossa; Lorenzigno spisso lassaje sulo a zZuniga a vvedersela cu cchiú ‘e n’azzerzario...Ajeressera ‘a catena ‘e mancina proprio nun funziunaje e ppure quanno don Rafele spustaje a lLorenzigno ‘ncopp’ a ll’atu lato se ne cacciaje niente! PANDEV 5 Miso a ffà ‘nu mestiere ca nun è ‘o suĵo, ciovè miso a ffà ‘a primma ponta nun putette ripetere l’atalossa fatta cu ‘o Genoa soprattutto durante ô primmo ajone quanno nun avette pallune ‘a jucà; isso però niente facette pe gghirsele a cercà. (dô 60° MERTENS 6 Trasette súbbeto ‘nfullé e ffove ll'unico ca riuscette a zzumpà ll’ommo e a ccrià quacche situazziona periculosa, ma fove acqua ca nun levaje sete, pure pecché ‘o giuvinotto fove poco accumpagnato dê cumpagne e ccierti vvote se dimustraje troppo cazzemie (egoista). BENITEZ 5 Me dispiace pe don Rafele, ma ajeressera ‘a scuatra dimustraje ‘e nun essere ancòra pronta e all’aldezza pe cierti manifestazzioni. E ppure overo ca ajeressera pesaje assaje ll’assenza d’ Higuaínno soprattutto ‘nfase uffenziva o quanno s’êss’ avuto’a mantené palla pe ffà saglí ‘a scuatra; è overo ca a ‘stu mumento ll'Arsenàllo joca ‘o cchiú mmeglio juoco d’Airopa, ca ‘a cumanna dint’ô campiunato ‘ngrese, ma allimmeno ce s’aspettava ca ‘o Napule êsse fatto quaccosa ‘e cchiú p’alleggerí ‘a pressura (pressing) ‘e ll'Arsenàllo ‘mmece[comme fove] ‘e rummané a guardà senza fà niente! E ppo, don Rafè – cunzentiteme d’’o dicerve – Pandèvvo à dda jucà arreto a ‘nu stipo a mmuro ca lle fa spazzio; nun po ffà isso ‘a primma ponta: nun tene ‘o fisico. Sperammo ca ‘o Napule se repiglia ‘ncampiunato ca pe mme è cchiú ‘mpurtante d’’a Ciampionsa! LL’ARBITRO (nun saccio ‘e qua’ paese fósse nè ccomme se chiammasse)4,5 Le mecco poco pecché siscaje poco e cquanno ‘o ffacette, ‘o facette contro ô Napule e pigliannosela,spisso, (nun se sape ‘o pecché) cu cchillu poveru guaglione ‘e Britòsso! E cu cchesto ve saluto e si dDi’ vo’ ce sentimmo â prossima vota, p’’o fullé ‘e campiunato! Staveti be’! R.Bracale Brak