NAPOLI – CHIEVO (25.01.14) 1 A 1 ‘A VEDETTE ACCUSSÍ

NAPOLI – CHIEVO (25.01.14) 1 A 1 ‘A VEDETTE ACCUSSÍ E cche saciccio, guagliú! N’atu pareggio scartellato! E cche saciccio! Doppo d’’e duje punte perze a bBulogna, n’ati dduje perdute... e ‘sta vota ‘ncasa!No cca ce sta quaccuno ca ce mena ‘a favetta e mm’immaggino chi è... Nun ce vo’ ‘a zingara p’andivinà ca o s’’o venneno, o ‘o rijalano,o ‘o jettano súbbeto oppure ‘sta jastemma ‘a cuollo nun ce ‘a levammo maje e nun putimmo cumbattere cu ggiggino-uocchie stuorte ‘ntribbuna e ccu cchi sapite vuje [nun ‘o voglio manco annummenà!] assettato ‘mpanca! Nun se po’ ccumpetere cu cierte uocchie sicche. Chella d’ajere ‘mmerz’ê sseje êva ‘a essere ‘na prova veramente ‘mpurtante p ‘ ‘e guagliune cuane e ppe don Rafele ca doppo d’’e duje punte perze a bBulogna avesseno avuto ’a dimustrà ca ‘o pareggio ‘nterra emigliana era stato n’incidente ‘e viaggio e avesseno avuto ’a dà ‘na n’assicurazziona ê tifuse turnanno a vvencere e ‘mmece chi t’’o ddà! ‘E guagliune cuane nun ce riuscetteno tenenno ‘e faccia ‘a siconna scuatra verunese scesa ‘ncampo cu ‘nu tre, cinche e ddoje tuosto, ‘na scuatra ca dinto a ll’urdeme dduje, tre anne ce aveva dato cchiú ‘e ‘nu panesiglio. Ajere poco mancaje ca nun succedesse ‘o llutto e ‘e cuane adderezzajeno ‘a varca ‘ncopp’ a ll’uno a uno sulo a ll’87°. Troppo tarde e ttroppo poco! Passammo ê ppaggelle va’: RAFAEL 6 ‘A cunchiusione ‘e Sardo, sbucato antrasatta dint’â camma, fove ‘mpruvvisa, putente e ‘ndirizzata justo dint’ô sette e ‘o pourtiere ‘a putette sulo sfresà (sfiorare). P’’o riesto nun fove maje ‘mpignato. MAGGIO 5 ‘Nu passo arreto a ppietto ‘e ll’urdemi vvote, fove ‘ndifficultà soprattutto ô primmo ajone quanno faticaje a ttené ‘a pusizziona e appressuraje (spinse) raramente e cquanno ‘o ffacette nun fove priciso cu ‘e cruzze (cross). (dô 78° INSIGNE 6 Dette ‘na mana a ttutta ‘a rezza ‘e pasiglie (passaggi) attuorno â camma ‘e ricore verunese; lle capitajeno ‘nu paro ‘e palle bbone p’’a nichessa (vittoria), ma apprimma scardaje ‘o travesagno (traversa) e ppo jette a ttuzzà ‘nfacci’ô muro avverzario ‘nnante a pPuggioni.) ALBIOL 6,5 Nun facette fessarie nè lle pozzo mettere ‘ncunto sfregazze (sbavature), anzi fove isso ca mmettette ‘a firma sott’â rredda ca rijalaje ‘o pareggio ô Napule! BRITOS 6- Arresecaje coccosa e fforze êsse pututo correre a ddà ‘na mana a rReveiglié ca s’era fatto surpassà ‘a Sardo e nun riusceva a mmetterle ‘o ssale ‘ncopp’â coda; p’’o riesto s’accuntentaje ‘e fà arremarrà (ripartire) ll’azziona. REVEILLERE 5 ‘Nu passo arreto, anze dduje a ppietto ‘e ll’urdemi vvote. Dê pparte soje Sardo s’’a scialaje e spisso ‘o francese jette dint’ê chiavette liggenno malamente ‘e suvrappusizzione e facennose superà ‘ntromma comme dint’âccasione d’’a rredda verunese! INLER 5,5 Sbagliaje cchiú poco d’ati vvote vincenno quacche brica (duello) a ccentrocampo,ma venette meno dint’ê mmecce comme trancara (muraglione) ‘nnante â difesa,nè se pigliaje grossi respunzabbilità ‘nfase ‘e plantamiento (impostazione) e ppo fove troppo, troppo braduso (lento) e ttutto summato fove deludente! DZEMAILI 5 Nun fove ‘nghiurnata e s’accuntentaje ‘e fà ggirà ‘o pallone sufferenno ll’abbunnanza d’ ‘o centrocampo avverzario e llassanno ‘a difesa senza cupertura. (dô 56° JORGINHO 6,5 Buonu debbutto d’’o brasiliano ca trasette súbbeto ‘nfullé accumpagnanno cu cqualità ‘a manovra quanno ‘o Chievo se ne scennette ‘e posa.) MERTENS 6,5 Sfurtunato e ppoco priciso, ma fove isso ll’ommo cchiú periculuso: puntaje ll’avverzario diretto mettenno ‘mmiezo pallune ‘nteressante, ca nun foveno sfruttate. Fove ll’unico a sfunnà centralmente; cugliette ‘o palo ‘a ‘na bbona pusizziona e cuncedette ‘o bbisso a ll’arrancua cu ‘nu tiro ‘e punizziona ‘a vinte metre. HAMSIK 5 Ancòra nun ce simmo! Nun è cchillo visto ajere, Marekiaro! Accumminciaje bunariello po chianu chiano se ne scennette ‘e posa e ô prazzo (al finale) fove troppo ‘mpriciso e casinista. CALLEJÒN 6 Nun ce parette, ma jucaje pe tutt’’o fullé senza scennersene ‘e posa. Da ‘nu tiro suĵo nascette ‘na palla ‘mmitante p’Higuaínno ca nun n’apprufittaje.Asciuto Maggio êtt’’a fà ‘o terzino e ppennellaje cchiú ‘e ‘nu pallone a ccentro. HIGUAIN 5 Appannato, se ll’êtt’’a vedé cu ttre centrale appustate dint’â camma ‘e ricore e ‘o fullé suĵo nun fove facile; sbagliaje però ‘na rredda commeta a pporta vacante mannanno ‘o pallone fora, ‘mpattannolo cu ‘o tallone ‘e dritta, ‘mmece ca cu ll’esterno ‘e mancina. P’’o rieste nun riuscette maje a ttruvà ‘a suluzziona esatta, nè a ddà preoccupazzione a pPuggioni. BENITEZ 5,5 Me dispiace, ma ‘e cchiú nun pozzo metterlo. ‘A rredda ‘e Sardo lle cumplicaje ‘e piane, ma ‘a â scuatra luvarda macajeno ritmo e ttassezza (velocità); è overo ca ‘e cuane avetteno poca furtuna, ma annante â porta verunese lle mancajeno cegna(grinta)e ccapacità ‘e sfruttà ll’accasione avute. A ll’arrancua quanno ‘o Chievo se dette ‘na calmata e arapette quacche senga, ‘o Napule facette ggirà ‘o pallone cu cchiú pacienza, ma ‘a rredda d’ Albiòllo arrivaje troppo tarde pe ppenzà ‘e cumpletà ‘a rimonta e vvencere.Pe ccomme mettette ‘a scuatra ‘ncampo niente ‘a dicere ‘ncopp’ê cagne, ma ‘a cundizziona ‘e Marekiaro, crullato a ll’urdemu quarto d’ora, nun me parette suddisfacente,comme pure – secondo me – mettenno ô pprincipio a gGiorgigno ô posto ‘e Dzemailí s’êsse pututo guadagnà ‘nu cagno sfruttanno, forze, pure a zZapata p’avé cchiú ppresenza dint’â camma ‘e ricore. ll’arbitro IRRATI 5,5 Miezu punto mancante pe nun avé ammunito ‘o purtiere d’’o Chievo ca perdette sistematicamente tiempo. M’aspettavo peggio ‘a ‘st’avvocato ‘e Pistoia, tifuso fiorentino e mme mettevo paura ca se fósse levato quacche preta ‘a dint’â scarpa..., ma pe furtuna nun ‘o ffacette! Sperammo ca nun se guasta p’’a via! E ccu chesto ve saluto e si dDi’ vo’ ce sentimmo ggiovedí doppo d’’o fullé ‘e Coppa Itaglia contr’â Lazzio ca ce ‘a fatto ‘o favore ‘e fermà ‘ncopp’a ll’uno a uno ‘a juventússa, ma ‘a nuje s’à dda fà vattere! Staveti be’. R.Bracale Brak