INTER – NAPOLI (26/04/14) 0 A 0 ‘A VEDETTE ACCUSSÍ

INTER – NAPOLI (26/04/14) 0 A 0 ‘A VEDETTE ACCUSSÍ N’atu bbuco dint’a ll’acqua guagliú! N’atu scunzulato zzero a zzero ajeressera a mMilano contro a ll’Intèrre ‘e wallerettino erode mazzarri. N’atu bbuco dint’a ll’acqua addó cu ‘nu poco ‘e bbona sciorta e nu poco cchiú ‘e pricisione e ccuncentrazzione mentale sotto porta s’êsse pututo vencere... E ‘mmece ‘o Napule nun ne fove capace e s’êtt’’a accuntentà ‘e ‘nu punto sulo, perdenno n’ata accasione.... Votta a ffení ‘sta tempurata (stagione) addó âmm’avuto sí, quacche suddisfazziona, ma se so’ pperze troppi punte p’’a via. Mo sperammo ca sàpato ca vene ‘a chiudessemo ‘ngrolia purtannoce â casa ‘a coppa itaglia ca pure si è ppoco è ssempe meglio ‘e ‘nu caucio ‘nculo! Passammo ê ppaggelle: REINA: 6,5 sempe attiento e pprisente ògne vvota ca fove chiammato ‘ncausa. HENRIQUE: 6 Pigliaje pussesso d’’a fascia accumpagnanno spisso ll’azziona e ffove prutacunista ‘e ‘na bbella sfita cu Nagatomo. ALBIOL:6,5 Fove ‘o meglio d’’a tràsera (difesa)cuana,cullante e urdema trancara (baluardo). BRITOS:5,5 Troppo scamuso (ruvido) e scumposto dint’ê cuntraste,arresecaje assaje quanno fremmaje a pPalacio ô lemmeto d’’a camma abbuscannose ‘nu cartellino jalizzo (giallo). GHOULAM:5,5 Spisso zumpaje fora tiempo mettenno ‘ndifficultà ê cumpagne e arresecanno cchiú ‘e ‘na vota ‘e fà ‘a frittata. INLER:7 Pruvaje a mmettere ordine a mmità campo e ccercaje cchiú ‘e ‘na vota ‘o tiro ‘a fora; sempe cumbattivo fove ‘nu lione; cu classe e ccegna (grinta) se prupunette annante, cuglienno ‘nu retissante (clamoroso) palo ch’êsse pututo cagnà faccia ô fullé (match) ‘nfavore d’’e cuane.Peccato! JORGINHO:5 ‘Nu punto mancante pe quacche pprano (errore) ‘e cuncentrazziona ‘mmiezo ô campo, comme dimustraje chillu pasiglio (passaggio) urizzuntale rijalato periculosamente a pPalacio. MERTENS:5 Jucaje a ccentro d’’e tre d'attacco e ffaticaje a ttruvà ‘na pusizziona; custretto a gghiucà spisso spalle â porta murtificaje ‘o juoco suojo nurmalmente fatto ‘e corze ‘ncopp’â curzia. (dô 69° HAMSIK:6- Quacche signale ‘ncuraggiante dint’ê vinti minuti jucate,cu bboni repartite (ripartenze) e cupuliamiente (dialoghi) cu ‘e cumpagne.Êsse avuto cercà ‘a porta e nun ‘o ffacette. CALLEJÒN:5,5 Meno lucente (lucido) d’’o ssolito (comme dimustraje ‘nnaccasione d’’a rredda ca se magnaje doppo ‘nu granne bbassurero (suggerimento) d’’o Pipita), nun riuscette a mmettere a ffrutto tutt’’a fatica fatta ‘e corza cuntinua. INSIGNE:6 Miezu punto ‘e cchiú p’’e tanti cupuliamiente (dialoghi) cu ‘e cumpagne e p’’a tanta corza ‘ncopp’a ttutto ‘o fronte uffenzivo. Peccato però ca quanno cercaje ‘a porta, truvaje sulo ‘a curva! HIGUAIN:5,5 Jucaje p’’e cumpagne, ma nun riuscette a ppesà ‘ncopp’ô fullé (match) e cquase se ‘ncazzaje vedenno ca ‘e suoje nun foveno cacchie ‘e sfunnà ‘a tràsera ‘nterista;ascette ô finale pe ‘na bbrutta bbotta a ll’astràcalo (caviglia) ca s’abbuscaje dint’ a ‘nu cuntrasto malegno cu Andreolli.Pare, pe ffurtuna, ca se trattaje sulo ‘e ‘na cuntusione. (da ll’85° Pandev:s.v.) All. Benitez:6 Doppo ‘nu primmo ajone cumplicato, riuscette a adderezzà ‘a varca e ppe ttutta ll’arrancua (ripresa) ‘o Napule criscette cercanno ‘e vencere ‘o fullé (match) e s’’o ffósse mmeretato. L’arbitro RIZZOLI 5 e l’aggiu trattato bbuono! Vulette a fforza fà ‘o prutagunista cu cchella aria ‘e rre cummannascoppole!; comme ‘a vecchia abbitudine soja d’arbitro casalingo e ca s’ ‘a tira cu ‘e squatre nurdistiche, fuje apertamente ‘nsuggezzione murale rispetto â scuatra ‘e mazzarri e trasette ‘ncampo deciso a non vedé ’o modo ‘e fà pruvucatorio e viulento ‘e ll’interiste, siscanno sistematicamente e pe partito pigliato contro ê cuane e spisso pe nun vedé s’avutaje ‘a chell’ata parte,facenno signo ‘e continuà e dispenzanno cartelline jalizze ê cuane pure si quaccuno guardaje stuorto n’interista... cose ‘e pazze! Comunque comme è gghiuta e ccomme è vvenuta pure ‘sta prattica è stata purtata ‘mpuorto e, a cquanto pare ‘stu campionato ‘o Napule ‘o fenesce piazzannose ô terzo posto; sperammo ca jesse meglio â prossima vòta! E soprattutto, ripeto, sperammo ca sàpato ca vene chiudessemo ‘a tempurata (stagione) purtannoce â casa ‘a coppa itaglia ca pure si è ppoco è ssempe meglio ‘e ‘nu caucio ‘nculo! E bbasta accussí. A ddummeneca ca vène, si dDi’ vo’! Staveti be’! R.Bracale Brak