SLOVAN – NAPOLI [E.L.] (02/10/14) 0 A 2 ‘A VEDETTE ACCUSSÍ

SLOVAN – NAPOLI [E.L.] (02/10/14) 0 A 2 ‘A VEDETTE ACCUSSÍ Ajeressera a Bbratislavia chello s’êv’ ‘a fà e cchello se facette guagliú! S’êv’ ‘a vencere e sse vincette ! E cu ‘a nichessa d’ajere ‘o Napule se piazzaje ô primmo posto d’’o ggirone suĵo dint’ô turneo airopeo ‘e cunsulazziona.E ffove bbello jí a vvencere ‘ncasa d’’e pariente ‘e Marekiaro dànno cunferma d’’o mumento pusitivo d’’o Napule ca, repigliatose ‘ncampiunato, s’êv’’a cunfermà ‘nnAiropa e ‘o ffacette dònnoce pure ‘a suddisfazziona ‘e vedé a mMarekiaro turnà a ffà ‘o Marekiaro e lassà ‘o signo, comme avettemo ‘a suddisfazziona ca ‘o Pipita doppo manco ‘nu minuto ch’era trasuto ‘ncampo jette a mmettere ‘a firma sotto ô stuco(gol) d’’a sicurezza ca nchiudette ‘o fullè! ‘Nzomma,nun se po’ ca essere suddisfatte d’’a siconna nichessa (vittoria) cunzecutiva d’’e cuane (partenopei) ca vincetteno pure dumneneca passata contro ô Sassuolo, nichessa, chella d’ajere, ca permette a ddon Rafele i ê suoje ‘e rispirà ‘nu poco ritruvanno chella tranquillità perza doppo quacche risultato necativo. Mo âmm’’a aspettà sulo cunferme,forze pure attraverzo scontre cu avverzarie cchiú cunzistente. Accussí sperammo. Passammo ê ppaggelle: RAFAEL 6: Pe n’ora facette ‘o spettatore purtuchese (non pagante) po rispunnette bbuono ‘ncopp’a ‘nu tiro ‘e Milinkovic(cio); peccato pe ‘na meza fessaria fatta ascenno sempe’ncopp’ô solito Milinkovic(cio); pe mme quacche fessaria ca ‘stu purtiere fa quanno jesce dipenne dô fatto ca è gghiuto ‘mpaura ‘e farese male; ce vulesse ‘nu bbuonu miedeco psicoloco ca ‘o cummincesse d’’o ccuntrario; nun se tratta d’allenarse meglio! MAGGIO 5,5: Sempe attiento ‘nchiusura spicialmente ô primmo ajone; ma appressuraje (spinse) poco e ô ssolito tutte ‘e cruzze (cross) foveno sballate. KOULIBALY 6.5: ‘O meglio d’’a ‘pistofulaca (retroguardia) cuana (partenopea); sulo ‘nu sfregazzo (sbavatura) senza cunsequenzie quase a chiusura ‘e fullè (partita) nun rovinaje n’atalossa (prestazione) attienta e ppusitiva cunnita ‘a ‘nu cratisto (ottimo) lanzo ‘e quaranta metre justo ‘ncapa a mMarekiaro ca, favurito ‘a ‘na meza papera d’’o purtiere slovacchio, facette uno a zzero. Me parette ‘e vedé a kKroll(o)! BRITOS 6 Turnato a ffà ‘o mestiere suĵo ‘e centrale, avette ‘na serata bastantamente tranquilla; jucaje tanti pallune facenno partí ll'azziona ‘a reto cu granna calma, confermanno ca ‘o mestiere suĵo ‘è cchillo ‘e centrale e nno chillo ‘e terzino mancino. GHOULAM 4,5 Periculo custante, ma p’ ‘e suoje, soprattutto quanno s’êtt’ ‘a difennere cu Milinkoviccio ca sistematicamente ‘o zumpaje comme e cquanno vulette, cosa ca addirittura facette ‘ncazzà a ddon Rafele. INLER 6 Trancatura (interdizione) e ffosforo a centrocampo,cu ‘nu prano (errore) sulo pe ttroppa sicurezza. LOPEZ 6 Nun facette cose ‘e ll’atu munno ma se dimustraje utile e urdinato comme à dda essere ‘nu bbuonu centrocampista. DE GUZMAN 4,5 Ascette doppo n’ora ‘e juoco e nun fove ‘nu caso; nun ce scurdammo ca lle capitajeno tre bboni ppalle commete dint’â camma (area) slovacchia i ‘e sciupaje tutt’ ‘e ttre dimustranno poca cattiveria e cumminziona. (dô 64° CALLEJON 6 Trasette súbbeto e bbuono ‘int’ô fullè (partita) cuntribbuenno ô bbuono finale d’’o Napule) HAMSIK 7,5 Finalmente! Benturnato Marekiaro! Nun è mmaje facile lassà ‘o signo quanno tutte te stanno aspettanno e uno torna addó à muoppeto ‘e primme passe.’Mmece Marekiaro annante ê pariente suĵe sfuderaje n’atalossa diaprésa (prestazione sontuosa): signaje ‘o stuco (gol) e ll’uno a zzero, appaciucaje (propiziò) ‘o doje a zzero 2-0 e confezziunaje dicine ‘e ati bbelli ghiucate. Finalmente! Benturnato Marekiaro! (dal 81’ MESTO sv) MERTENS 5.5 Sfuttuto e ssenza ggenio, si nun cunziderammo ‘o travesagno sfresato (la traversa scheggiata) ô 63° se vedette poco, soprattutto ô primmo ajone;aizaje porvera nun riuscenno maje a essere catastrofico (devastante) comme ll’era succieso contro ô Sparta Praga. Avette ‘accasione ‘e cunvincere a don Rafele ‘e farlo jucà sempe dô primmo minuto, ma ‘a sprecaje!Peccato! ZAPATA 6- ‘O matarazzo ‘e sbreglie se facette nutà cumbattenno cu ‘e difenzure e mettennoce cegna (grinta) e sacrifiggio ma lle mancaje ‘o nnicessario: ‘o stuco (gol). (dô 73° HIGUAIN 7+ ‘E granni jucature so’ cchille capace ‘e lassà ‘o signo â primma accasione; accussí ffove p’’o Pipita ca comme lle capitaje ‘a primma palla bbona, ‘a mannaje ê spalle d’’o purtiere slovacchio signanno ‘o stuco (gol) ca nchiudette ‘o fullè (match) e siggillaje ‘a nichessa (vittoria) d’ ‘e cuane). All. BENITEZ 6 ‘O mmassimo cu ‘o mminimo. E chiàmmalo fesso! ‘A scuatra s’accuntentaje ‘e ‘nu juoco tranquillo e rraggiunato viaggianno cuoncio cuoncio pe paricchiu tiempo, ma purtaje â casa tutt’’a posta e mettette ‘na seria bbéllana (ipoteca) ‘ncopp’â cualificazziona ô prossimo turno. Nun me piacette però ‘o fatto ‘e fà a mmeno cuntemporaneamente ‘e Cagliecònno e d’’o Pipita. Arbitro: Strahonja 5 (Croazia, me pare...) Siscaje a bbienetenne. I’ ca spisso m’allamento ‘e ll’arbitre tagliane ajere avette ‘a cunferma ca chille ca circolano ‘nnAiropa nun so’ po tanto meglio! E ccu cchesto ve saluto e si dDi’ vo’ ce sentimmo lunnerí ca vène. Staveti bbe’. R.Bracale Brak