NAPOLI - YOUNG BOYS [E.L.] (06/11/14) 3 A 0 ‘A VEDETTE ACCUSSÍ

NAPOLI - YOUNG BOYS [E.L.] (06/11/14) 3 A 0 ‘A VEDETTE ACCUSSÍ Ajeressera ô San Paolo ce stevano quatto gatte. Peggio pe cchille ca nun ce jetteno pecché se perdetteno ‘o sfizzio ‘e vedé ‘a vicino comme ‘o Napule se levaje ‘e pacchere ‘a faccia, dimustranno carattere ma pure qualità. E doppo d’ ‘o bbruttu sciuliamazzo pigliato ô vintitré uttombre contr’ô Youngbboys(o) tutte stevemo aspettanno ca ‘o Napule ce avesse dato cunferma d’’e nnichesse (vittorie) cunvincente cu rRoma e ccu vVerona e ppure d’’o sfurtunato pareggio a bBergamo. E ce ‘a dètte, ce ‘a dètta ‘sta cunferma dimustrannoce ca chillo d’ajeressera fove assaje ‘e cchiú ca ‘nu fullè (partita) d’’o ggirone d’ E. L.; fove cioè ‘o fullè (partita) ca ce pruvaje ca finalmente ‘a scuatra ‘e don Rafele s’era scetata, pronta a cancellà ‘e passe faveze d’’o pprincipio ‘e tempurata (stagione).E ce ‘o ddimustraje cu n’atalossa (prova) ‘e forza ca vedette tutt’’e cuane (azzurri),tirà fora cegna(grinta) e sfarzetto (orgoglio) nchiudenno ‘a pratica ‘ncopp’ô tre a zzero, pure si avettemo aspettà ll’arrancua (ripresa) pe vvedé ‘a scuatra fà chello ca vuleva don Rafele doppo ‘nu primmo ajone (tempo) troppo braduso (lento) e ccu pocu zuco [‘nu gramo stuco (gol) signato cchiú dô viento ca da De Guzman(no)] ! Passammo ê ppaggelle: RAFAEL 6,5 Serata tranquilla p’’o bbrasiliano ca pe bbuoni uttantotto minute nun êtt’’a fà ‘o straurdinario; raramente ‘mpignato, s’’a cavaje cu ‘nu paro ‘e parate facile e cu ll’urdinaria amministraziona primma d’essere chiammato a ll’89°a ffà ‘nu granne ‘ntervento s’ncopp’a nNikci, blindanno ‘o tre a zzero finale. MESTO 6,5 Nuvanta minute pulitieliche (preziosi) ‘ncopp’â dritta addò appressuraje (spinse), cupulianno (duettando) cu mMertens(o); ppure quanno difennette nun sbagliaje niente. Benturnato! HENRIQUE 6,5 Attiento, lucente (lucido) e ppusitivo, dètte ‘na bbona mana a Koulibalý e arresecaje poco o niente. KOULIBALY 7 N’ata atalossa (prova)sicura, pricisa e sustanziosa,chella ‘e ‘nu vero pantanguanguero (leader) d’’a tràsera (difesa), tuosto e ppacuso (roccioso). BRITOS 6 Miso a mmancina s’’a sbrugliaje a mmestiere senza nisciunu sfregazzo (sbavatura); doppo ‘nu quarto d’ora s’abbuscaje ‘nu caucione [forze acusiuso (involontario)] ‘ncapa ‘a Nuzzolo; resistette, ma po fove custretto a ascí. (Dô 38° GHOULAM 6,5 Si signalaje quanno appressuraje (spinse) trasenno dint’a ll’azziona d’’o terzo stuco (gol); a ll’epata difenziva (in fase difensiva) jette tranquillo, nun sufferette e cuntrullaje a situazziona. INLER 7 Riggia vivace e prupositiva. Me parette trasuto ‘ncundizziona dettanno ‘e tiempe d’’o Napule e cuntrastanno a dduvere. Forze ‘o fatto ‘e purtà ‘a fascia ‘e capitano ll’encumiazzaje (lo esaltò). GARGANO 6,5 Teneva ggenio ‘e rientrà e sse vedette: currette appriesso a cchi capitaje, macenanno chilometre e facenno sentí ‘e diente si nicessario. MERTENS 6,5 Nun partette bbuono, ma po migliuraje crianno sempe ‘a famosa superiorità numerica; puntaje sempe ll’ommo e assaje spisso ‘o zumpaje; nun truvaje ‘o stuco (gol) ma ll’ atalossa (prova) fove pusitiva. DE GUZMAN 8 Miso ‘ncampo finalmente ô pizzo suojo naturale fove ‘o meglio ‘ncampo e nun sultanto p’’e tre stuche(gol) mise dinto:’o primmo fove quistione ‘e bbona sciorta cu ‘o viento ca accumpagnaje ‘o pallone dint’ô sette d’’a porta sguizzera, ‘o siconno ‘nu rijalo ‘e Zapata e ‘o terzo ll’êsse signato pur’i’, ma ll’ atalossa (prova) soja fove diaferosa (eccellente) pe ccomme cercaje ‘o tiro,pe ccomme se ‘nzerette (inserí), appuggianno ll’artigliero (punta) e ll’ esterne, quase comme a mMarekiaro ‘e quacche ttiempo fa... INSIGNE 7 C’êsse miso pure cchiú assaje si sulamente fósse stato cchiú ppriciso cu ‘o tiro, pecché p’’o riesto niente ‘a dicere: facette vedé d’essere ‘nforma, pruvaje sempe ‘a jucata ‘e classe; ‘ncrescita custante se facette apprezzà dimustranno ca ‘o rinnovo ‘e cuntratto lle ggiuvaje.Lle mancaje sulo ‘o stuco (gol), ma fove ll’ommo ‘e cchiú d’’o Napule. (Dô 73° CALLEJON 6 Jucatore scafato, nun tenette prubbleme a ttrasí súbbeto ‘nfullè (in partita) e doppo pochi mnute ggià ‘mpignaje a Mvogo. Tenuto ‘ncaudo p’’a traferta ‘e Firenze.) Duvan ZAPATA 6,5 ‘Stu matarazzo ‘e sbreglie pure ajeressera fove ‘mbarazzante, cu ‘nu primmo ajone ‘a paccariarlo, apàtico e addurmuto; po chianu chianu criscette e a ll’arrancua (ripresa) se facette vedé cu quacche azziona puderosa, cignosa (grintosa) e putente comme chella ca ce purtaje ‘o siconno stuco ca pe trecquarte fove ‘o suojo. (Dô 79° HIGUAIN sv) ALL. Rafa BENITEZ 7,5 ‘Nu tre a zzero ca nun facette ‘na chieja: pulito, lisso (netto) e mmeretato’A scuatra soprattutto a ll’arrancua jucaje, appressuraje (spinse), duminaje e recugliette, bbella a vvederse e cunvincente E don Rafele s’arrecriaje. E nnuje cu isso! Arbitro HANSEN 6 - Niente ‘a dicere ‘ncopp’a st’arbitro danese, ca nun se facette nutà e cunzideraje bbuono quacche úrzo ‘e cóse (fuorigioco). E mettimmo punto cca. Ce sentimmo llunnerí, a dDio piacenno doppo d’ ‘a trasferta ‘e Firenza speranno ‘e jí a ‘ntussecà a mMontella e a cCecchi Gori. Staveti bbe’! R. Bracale Brak