NAPOLI – SASSUOLO ( 23/02/15) 2 A 0 ‘A VEDETTE ACCUSSÍ

NAPOLI – SASSUOLO ( 23/02/15) 2 A 0 ‘A VEDETTE ACCUSSÍ Tutto a cciammiello, guagliú! Tutto a cciammiello! Ajeressera, a ll’ora d’’o spasso, doppo d’’a sbrasata cu ‘o Trabzonspòr(ro) dint’ô fullè d’E.L., ‘o Napule turnaje ‘ncampo ô San Paolo contro ô Sassuolo diciso a llevarese ‘ncampiunato ‘e pacchere ‘a faccia pigliate cu ‘a scunfitta ‘ncopp’ô campo d’’o Palermo e soprattutto diciso, mettennose dint’â sacca ‘e tre ppunte, a ccogliere ll’accasione, nun sulo ‘e cusulidà ‘o terzo posto ‘ncrassifica, ma ‘e rusecà duje punte â Roma fermata pure a vVerona e accurcià ‘e distanze. E ajeressera, a ll’ora d’’o spasso ce riuscette, cunzignaje ddoje sfugliatelle [una riccia (Zapata), ll’ata frolla(Marekiaro)] â scuatra ‘e culo’echiummo (ca pe nun dareme ‘o sfizzio ‘e fà n’utubbutto [autogol]jucaje ‘na ventina ‘e minute e ppo se chiammaje fora) e riusulvette ‘a pratica festiggianno ‘nnante a quarantamila perzone..., ma quanta fatica s’êtt’’a fà soprattutto durante ô primmo ajone (tempo) quanno – a ccunte fatte – sulo ô trentesimo se riuscette a ttirà ‘mporta e ccumplessivamente se facette poco e êttem’ ‘aspettà ll’arrancua pe rriuscí a ttirà ‘o capo ‘nterra! Passammo ê ppaggelle: ANDUJAR 7 – Sicuro’nfra ê pale e cquanno ascette, se facette apprezzà dê cumpagne,dànno cunfianza (fiducia) a ttutte quante e appalesanno (dimostrando) qualità pure cu ‘e piere quanno durante ô primmo ajone puggiaje (rilanciò) ô millimitro. Ma ‘o capolavoro ‘o facette a ll’arrancua (ripresa) quanno a ll’ 80° stennennose pe cquanto è lluogo levaje ‘a dint’ô sette ‘nu tiro maligno ‘e Magnanelli, tiro ca si fósse trasuto êsse pututo fà turnà ‘nfullè (in partita) ‘o Sassuolo. Ma nun succedette! MAGGIO 4,5 Me facette magnà ‘a rezza d’’o core pe ttutt’ ‘o fullé. Nun è cchiú isso! Eppure soprattutto durante ô primmo ajone Floro Flores nun ‘o ‘mpicciaje e lle dètte ‘a pussibbilità d’appressurà (spingere),ma isso nun ne ‘ncarraje una! ALBIOL 7 Atalossa (Prestazione) sustanziosa d’’o spagnuolo, ca mettette ‘a musarola a zZaza cassannalo, aiutaje a cKoulibalý, scalaje, radduppiaje, dimustranno d’essere ‘o masto d’’a tràsera (difesa). KOULIBALY 6,5 Miezu punto mancante a ppietto ‘e chillo d’ Albiòllo, ma sulo pecché durante ô primmo ajone se facette cartià ‘a Berardi ca ‘o zumpaje e sfresaje (sfiorò) ‘o stuco (gol) cu ‘nu tiro a ggiro. Peccato, pecché p’’o riesto ‘o francese nun sbagliaje niente e sse facette apprezzà. GHOULAM 5,5 Serata ‘e sufferenzia ‘e ll’algerino ca arreto abballaje p’’e muvimente ‘e Berardi ca ‘o custringette a gguardarese ‘a castagna e anna nte se vedette poco e nniente bluccato ‘a Gazzola. GARGANO 7 Tutto ‘o centrocampo ‘ncopp’ê spalle soje! ‘Nu cane ‘e presa cu ssette purmune currette pe cquanto è llargo e lluongo ‘o campo e soprattutto durante ô primmo ajone pressaje a cchiunque purtasse palla. ‘Ncarraje pure cchiú ‘e ‘nu pasiglio (passaggio). Po rallentaje ‘nu poco, s’abbuscaje ‘nu cartellino jalizzo (giallo),ca nun se mmeretava, ma nun facette ‘na chieja e ccuntinuaje a ggjiucà a ccapa sotto chiammannose ll’applavuso d’ ‘o san Paolo. LOPEZ 6,5 Se vedette meno d’’o cumpagno ‘e sezziona (reparto), ma facette sempe ‘a cosa justa ô mumento justo; pratico e valiuso (prezioso). GABBIADINI 5,5 ‘Stu guaglione ave nicessità ‘e carne ‘e cavallo, fecato arrusto e ffelle ‘e lentuorno:nun tène sanco dint’ê vvene; ajeressera ‘o vedette stanco e ppoco scetato; facette bbuono don Rafele a sustituirlo visto ca ll’atalossa(prestazione) d’’o guaglione era stata appannata (opaca) e ppe nniente periculosa. (Dô 66° MERTENS 4,5 Trasette bbastantamente bbuono ‘nfullè, po perdette ‘e ccerevelle e súbbeto doppo d’’o doje a zzero trasette malamente ‘ncuollo a mMissiroli a ccentrocampo cu ‘na falta (fallo) inutile ca pe mme se fósse mmeretato ‘nu cartellino jalizzo [giallo]e cca ‘mmece ll’arbitro Massa facette addivintà russo!) HAMSIK 7 Eppure nsi’ a cquanno nun mettette dinto ‘o stuco d’’a sicurezza, ‘a soja nun era stata ‘na granna atalossa(prestazione). Però, a ccunte fatte, durante ô primmo ajone fove isso ll’unico a ffà spurcà ‘e guante a cConsigli. A ll’arrancua (nella ripresa) Marekiaro se mmeretaje ‘o sette ca ll’aggiu miso, visto ca participaje a ll’azziona d’’o primmo stuco (rete) e mmettette dinto chillo d’’o dubblato (raddoppio); e mme facette piacere p’ ‘o slovacchio visto ca ‘o stuco (gol) lle mancava ‘a quatto mise. (Da ll’82° DE GUZMAN sv) CALLEJON 6 Ô ssolito currette senza stancarse , mantennennose sempe ‘mmiez’ô juoco e tturnanno ‘ncupertura garbusamente (con generosità) nsi’ a ll’urdemo, ma manco ajere lle riuscette ‘e turnà a ssignà. Peccato, pecché ll’accasiona bbona ll’avette quanno ‘ncontropiede ô finale êsse pututo mettere dinto ‘a palla d’’o tre a zzero e ‘mmece riuscette sulo a ffà ‘a bbarba ô palo luntano! (Da ll’88° MESTO sv) ZAPATA 7,5 Che crisceto, che migliuria! ‘E fisico, ‘e putenza, ‘e capa! ‘O primmo stuco (gol) dimustraje ca ‘o guaglione nun molla maje e ssi nun ll’accideno nun se ferma:cu ‘a palla ‘mmieze ê piere s’ ‘a steva vedenno cu ttre, ‘nciampecaje, cadette, ma senza perderse ‘e curaggio s’aizaje comme a n’anguilla e ccu ‘nu rasoterra s’anventaje ‘o stuco (gol) d’’o vantaggio;’o dubblato (raddoppio) ‘e Marekiaro fove pe mmità d’’o suojo ca difennette ‘a palla e ‘a mettette ‘ncopp’a ‘nu piatto d’argiento ‘nnante ô pere d’’o slovacchio. Quinto stuco (gol) ‘ncampiunato, settimo d’’a tempurata (stagione), avenno jucato sí e nno 872 minute; n’artigliero (bomber) cu ssette parme! E ddicere ca quaccheduno ‘o vuleva jettà a cchistu matarazzo ‘e sbreglie! ALL. BENITEZ 7 Vincette ancòra e, doppo ‘a qualificazziona a ll’ottave d’E.L. praticamente arrivata , [pecché ‘o Trabzonspòr(ro) quanno ‘e ppo’ ffà cinche stuche ô Napule senza pigliarne nisciuno?] confermaje ‘a maturazziona ‘e ‘na squadra oramaje curdonné (coordinata) e ca ce crede. I’ avesse dato ancòra cunfianza (fiducia ) a Rafiluccio,’o prevetariello ma avette raggiona issa a ffà jucà a Anducàrro; è overo ca ànn’’a jucà unnece jucature, ma i’ a ‘nu Zapata accussí però ‘o vulesse vedé ‘nchietta (in coppia) cu ‘o Pipita. arbitro MASSA 5 Cu st’arbitro s’è ssempe vinciuto e ppure ajere succedette, ma nun me piacette comme caputiaje quacche falta (fallo),pure si grossi fetenzie nun ce ne facette e soprattutto nun me piacette ca esaggeraje primma cu ‘o cartellino jalizzo (giallo) cu ‘o Mota e ppo addirittura cu cchillu russo cu Mertenso! E fermammoce cca. Mo ggioverí ca vene torna ll’E.L. ‘ e ssi dDi’ vo’, ce sentimmo viernarí ca vène doppo d’ ‘o fullè(match) ‘e ritorno cu ‘o Trabzonspòr(ro), ca doppo d’’e cquatto purpette pigliate a tTrebbisonda nun saccio proprio che ce vene a ffà ô san Paolo. Si fósse a lloro ‘e sparagnasse ‘e sorde d’’o viaggio! Staveti bbe’! R. Bracale Brak