NAPOLI – ATALANTA[4.12.21] 2 A 3 ‘A VEDETTE ACCUSSÍ

[RB1] NAPOLI – ATALANTA[4.12.21] 2 A 3

‘A VEDETTE ACCUSSÍ

Nun ce pigliammo p’’o prozo e pparlammoce chiaro:assaffa (purtroppo)stammo attraverzanno ‘nu bbruttu arfatro (periodo) e sperammo ca fósse fenuto ajeressera quanno assaffa ‘o Ciuccio, orfano ‘e Caromecosta, d’Anguissà, d’‘o Ggialante, d’Anemalonga e d’Insigne  êtte asseccà ‘a siconna scutuliata ’into a ll’urdemi quatto sibacche (match)), arrennennose  a ll'Atalanta però, tutto summato, jucanno  cu camara (orgoglio) ‘na mubbara (partita) overa, ‘e mistaua (livello) a ppietto ‘e ‘na scuatra tosta, sconceca ca nun facette cumprimente e nce credette nsi’ a ll’urdemo.Da poco s’era accumminciato ca ‘a Dea cu Malinovskiy [7’] se purtaje’ncopp’a ll’uno a zzero quanno Rrahmani  nun riuscette a ffermà a Zzapata e lle permettette ‘e mettere ‘a palla arreto p’’o cumpagno ca cu ‘na trunata (saetta) piazzaje ‘a palla addó  ll’Ecchesepastacrisciuta nun putette arrivà; però ‘o Napule nun s’arrennette e ghiucanno a ccapa sotto arrivato ô 40’ angappaje ll’uno a uno cu  Zielinski ca mettette a ffrutto ‘na bbona palla d’’o Tignuto.Turnate ‘ncampo ‘e nuoste misemo (addirittura) passajeno annante cu Ciruzzo; però po tutta ‘a scuatra ‘mmece ‘e ‘ncasà ‘a mana, venette meno dint’ê mmecce, aizaje ‘e mmane e ss’arrennette â Dea e apprimma fove angappata ô 66’ cu  Demiral(le) arrivato sulo dint’â muntaca(area di rigore) nosta e ppo  surpassata da Freuler(te)  ‘ncapo ‘e sulo cinche  Cose ‘e pazze! Me pare però ca s’ànn’’a fà ‘e cumprimente â Dea ca nce credette nsi’ a ll’urdemo.

Passammo ê ppaggelle:

 OSPINA[Ecchesepastacrisciuta] 6– Nun tenette itimme (colpe) ‘ncopp’â ‘ntrunata  (fulmine) ‘e  Malinovskyi; tre bbuoni tacculle (interventi) ‘ncopp’ê ccunchiusione ‘e Pessina, Zappacosta e Zzapata, ma s’êtte arrennere’ncoppê tire ‘e  Demiral(le) e Freuler(re); però ‘ncopp’ô doje a ttre ‘e Freuler(re)  forze êsse pututo fà coccosa ‘e  chiú partenno primma.

DI LORENZO 6   Custretto a gghiucà a ttre jucaje a ddritta ‘nu sibbacco (match) tutto summato attiento e ssenza fessarie.

 RRAHMANI 5,5 Me dispiace ‘e levarle miezu zifo (voto) pecché jucaje contro n’accunto scommeto e sse facette cartià sulo ‘na vota ca però ce custaje ‘o zzero a uno!

Juan JESUS 6 Quase nisciun’arcatta  (errore) dint’a ‘na serata cumplicata.

 MALCUIT[‘O Tignuto] 6,5  Mascullo (Brillante) dint’ê ddoje epate  (fasi),jucaje ‘nu sibbacco   (match) sustanziuso e ccu ficre (idee) chiare.

ZIELINSKI 7 Signaje ll’uno a uno e ffove prisente nsi’ a ll’urdemo cercanno ‘e sustanzià accasione uffenzive.

 LOBOTKA 6,5 – Facette ‘o ssuĵo senza fa cape d’angelo, ma senza smarrunà e dimustrannose ‘na pedina ‘e cunfianza (fiducia). [Dô 56’  DEMME 6 Facette ‘o duvere suĵo cercanno ‘e fa lignammo, ma poco urdinatamente.

MARIO RUI 6,5 Custretto a gghiucà fora pusizziona fove assaje mascullo (brillante) e uno ‘e ll’urdeme ca s’arrennette.

 ELMAS[‘O Turco] 6 Cercaje d’urtizzà (verticalizzare) ‘a munavara (manovra), ma fove poco mascullo (brillante) a ppietto d’’e cumpagne ‘e sezziona (reparto).

Hirving LOZANO 6 Quacche giadillo (spunto), ma poco zuco dato ca se ll’êtt’’a vedé cu troppi marcantonie ca nun facetteno cumprimente i ‘o vattetteno spisso. [Dô 67’  PETAGNA 6  Cu ppoca furtuna tentaje ‘e farese rispettà facenno a spurtellate cu cchi capitaje.

 MERTENS [Ciruzzo] 7  Signaje ‘o pruvvisorio  doje a uno  dimustranno ca cu uno cumme a isso ‘a scuatra ‘e Spalletti po’ sperà ‘e rummané dint’ê primme pusizzione  â faccia ‘e tanti difficultà.  [Dal 67’ A OUNAS 6  Sulo ‘nu paro ‘e giadille (spunti), ma bbelle.]

all.  SPALLETTI 7,5 Scualificato e ssenza cinche pedine ‘mpurtante  ‘o Napule jucaje ‘na mubbara (partita) ‘e mistaua (livello) auta, assaje auta; peccato ca se fermaje ô 47’ doppo ‘o doje a uno ‘e Ciruzzo e nun ‘ncasaje ‘a mana. .

 

arb.: MARIANI 5  Mannato a spezzarce ‘e passe ce siscaje contro pe partito pigliato permettenno ê mammasantissime  d’’a Dea ‘e vattere ê nuoste senza ch’isso dicesse niente; Ce siscaje contro ‘nu ricore ca nun ce steva cumme lle dicetteno ‘e duje d’’a Var(ra) e ffove custretto a ffà marcia arreto cusicché nun putette ajutà ‘a Dea ca però affuzzaje (vinse) ô stesso   â faccia nosta e pp’’a joja d’’o Palazzo.

E bbasta accussí. Dammoce n’atu pizzeco ‘ncopp’â panza e vvedimmo ‘e salvà chello ca putimmo salvà.

Mo si ‘o Cielo ‘o ccunzente ce dammo appuntamento pe viernarí diece pe pparlà  d’’o scontro ô Maradona Napoli - Leicester City sibbacco (match) d’’a Cuppetta iurupea ch’âmmo assulutamente affuzzà(vincere).Accussí sperammo.‘E cchiú, ‘e cchiú, ‘e cchiú Ciuccio fa’ tu! Staveti bbe’ Raffaele Bracale Brak

---

 [RB1]OTES