MENESTELLA ‘E NATALE/PASCA

MENESTELLA ‘E NATALE/PASCA Menesta ca s’ausa a Nnapule comme trasetura ‘e ll’almuzzo ‘e Natale o ‘e Pasca (del pranzo natalizio o pasquale). chello ca ce vo’ pe sseje perzone: ‘nu vammunciello ‘e prusutto cruro ‘e 400 gramme, 500 gramme ‘e spalla d’annecchia, 300 gramme ‘e cotena ‘e purciello, passata p’ ‘o ffuoco, lavata e tagliata a vvarriglie ‘e cm. 5 x 1 x 1, 300 gramme ‘e scarola, 300 gramme ‘e vurraccia, 300 gramme ‘e cecoria, ‘na vrancatella e ‘na presa abbunnante ‘e sale duppio, ‘na pastenaca rattata e lavata e fatta a ttre piezze , ‘na llomma d’accio rattata e lavata, e fatta a ttre piezze ‘na cepolla ndurata ‘e Muntoro ammunnata e fatta a ttre piezze , ddoje pummarole tipo ROMA o SAN MARZANO scammentate (sbollentate) e spellate, ‘nu tuppeto ‘e prutusino lavato e asciuttato, 200 gramme ‘e caso ‘e pecura; 100 gramme rattato fino e 100 gramme tagliate a ffarinule ‘e ‘nu centimetro e mmiezo ‘e ‘squina (spigolo), pepe janco mmacenato a ffrisco q. n. s. Comme se fa Dinto a ‘na grossa marmitta pruvvista ‘e cupierchio mettere ‘o piezzo ‘e carne, ‘o vammunciello ‘e prusutto cruro ‘e ccotene a vvarriglie,’e piezze ‘e pastenaca, d’accio, ‘e cepolla, ‘e pummarole spellate ‘o prutusino e ‘na presa abbunnante ‘e sale duppio.Agnadí tant’acqua fredda pe cummiglià tutto e fà cocere doce doce pe ddoje ore e farne ‘nu dellicato e sabbruso broro. Arvere teniente teniente a pparte dinto a poca acqua salata (vranchetella ‘e sale duppio) tutt’ ‘e vverdure; scularle e clignarle (strizzarle) pe sculà tutta ll'acqua pussibile. Passà ‘o bbroro a cculaturo e agnadirve tutt’ ‘e verdure cotte fatte a pezzulle, ‘o vammunciello a pezzulle piccerille, ‘a carne e ‘e ccotene pure lloro a a pezzulle. Mettere ‘a marmitta ‘ncupirchiata a ffuoco allero e ccomme jesce a vvollere agnadí ‘e ffarinule ‘e caso pecurino e lassà fèrveretutto allimmeno pe n’ora; caso mai accuncià ‘e sale fino.’Mpiattà derrammanno ‘e ppurzione cu ‘o ccaso pecurino rattato e cu abbunnante pepe janco mmacenato a ffrisco.