LIVERPOOL - NAPOLI (amich. 4/08/18) ‘A VEDETTE ACCUSSÍ

LIVERPOOL -  NAPOLI (amich. 4/08/18)

‘A VEDETTE ACCUSSÍ

Azze guagliú, ce simmo fatte ‘a croce a mmana smerza!

Ajere ‘o Napule, targato Jancone, scennette ‘ncampo a dDubblino contr’ê ‘ngrese d’’o Liverpulle p’’a primma ammestosa (amichevole) ‘nternazziunale d’’a tempurata (stagiona) e asseccajemo ‘na paliata cu sette parme ‘e sacicce: cinche a zzero! Ah, maje ll’êssemo fatta chell’ammestosa d’ajere! Ce fóssemo sparagnata ‘na fijura marrò ca nun m’aspettavo. ‘Mmece êttem’’a zucarce ‘o franfellicco e ssi ‘o Jancone nun vede ch’à dda fà peggio succere cu ‘o  Borussia Dortmund(o) o cu ‘o Wolfsburg(o); P’’o mumento pozzo dicere ca ajere se vedette ca ‘o Liverpulle è ppronto i ‘o Napule no e soprattutto ca ‘o Napule nun è ccumpleto e lle manca ‘nu purtiere serio dàtose ca, aspettanno a mMeret(te), cu ‘o creco ‘mportanun ce putimmo appresentà a nnisciuna parte si no ne pigliammo cinche o seje ògne vvota e pprimma ca accummencia ‘o campiunato Giunoli e dDela è mmeglio corrono cu ‘e mutande ‘mmano a accattà ‘nu guardaporta bbuono senza chiagnerse ll’evero  i ‘o centesemo e – pe pparta soja – ‘o Jancone, a cchille ca ce stanno ll’à dda fà ascí ‘e ssovere dô prozo p’’e ffà essere pronte overamente: ‘o campiunato accummencia ‘ncapo ‘e tre semmane e ttiempo ggià nun ce ne sta cchiú! Turnanno a ajere m’addimanno: ma tène significato fà n’ammestosa (amichevole) contro a ‘na scuatra ca ggià va a mmille, mentre nuje ancòra âmm’’a capí chi simmo, che vulimmo e addó jammo? I’ dico ca fósse stato meglio sparagnarcela e nun permette a  cKlopp(o) ‘e fà ‘o vallo ‘ncopp’â mmunnezza vattenno ô Jancone e ppapariannose cu ‘e suyoje ca corrono cumme tanta zoccole cu ‘o ppepe arreto  addó ‘int’ô Napule se facette fatica a ttruvà ‘na nota overo pusitiva; ‘nzomma cumme jette e ccumme venette ajere ggià ‘ncopo ‘e diece minute ‘o Liverpull(e) êva risolta ‘a facenna   signanno ddoje addaffe (reti) ‘a primma ggià ô 4’ cu mMilner(re), lassato sulo dê mediane i ‘a siconna ô 9’  cuvWijnaldum(me), doppo ‘na puttanata d’’o creco, asciuto a ppalomme, mancanno ‘a palla. A ll’arrancua (ripresa), piezzo e ppejo ‘o Liverpull(e) ne facette n’ati tre: ‘o primmo cu sSalah ô 58’, doppo però ca ‘o Masto fove miso fora cumbattimento e stiso ‘nterra  cu ‘nu sbuttulone, senza ca chillu cecagnuolo e ll’arbitro(3 e ll’aggiu trattato) e de chill’auto nnacchennello d’’o signalinia ‘e dritta dicesseno niente  e ll’auti dduje  stuche (gol) ‘e Sturrigge, ô 73’  e dde Moreno ô 77’ pe n’ati ddoje puttanate d’’o creco. E accussí foveno cinche purpette a zzero ca ‘o Napule s’alluggiaje e ddicimmo ca ‘o ttuosseco lassato ‘mmocca a nnujaute ‘ntribbuna-divano, fove amaro assaje; è overo ca ‘ncopp’ô doje a zzero Peppe ‘a ‘nguenta uno ll’aveva fatto, ma sempe chillu scurnacchiato ‘e ll’arbitro i ‘o cullabburatore suojo, chillu nnacchennello d’’o signalinia ‘e dritta vedetteno n’attasallulo (fuori-gioco) ca nun ce steva e dicetteno ca no, ma pure ca avessemo perzo cinche a uno sempe ce fóssemo ‘ntussecate!   Passammo ê ppaggelle:

KARNEZIS [‘O Creco] 3   E lle vulite mettere ‘e cchiú a uno ca ne pigliaje cinche, ddoje vote rummanenno fremmo cumme a ‘na statua ‘e sale, ‘na vota ascenno a ppalomme e n’ati ddoje vote repuzanno (respingendo) ‘ncamma (in zona) e ccumplessivamente fove prutacunista ‘e n’atalossa  (prestazione) scadente assaje?

HYSAJ[Meza Cucchiara] 5  Durante ô primmo ajone (tempo)Mane facette ‘e commerte suoje e a ll’arrancua (ripresa) cuncedette troppu spazzio a mMoreno.’Nu passo arreto a ppietto ‘e ll’urdemi vvote.

ALBIOL[‘O Masto] 6 Uno d’’e poche a ssalvarese; finché nce stette ‘a trasera (difesa) cchiú o meno mantenette; doppo pochi minute salvaje ‘o pussibbile ddoje a zzero Cumme v’aggiu ditto ‘ncopp’ô tre a zzero fove miso fora cumbattimento cu ‘nu sbuttulone, ma ll’arbitro i ‘o signalinie nun cecajeno a vvedé! [dô 60' MAKSIMOVIC 4 Ô ssolito mancaje ‘e cegna (grinta) e attenziona e ddètte ‘na mana p’’a scesa cunzignanno palla a Sturridge ca ô 73’ jette a ffottere ‘o creco!] s'invola verso Karnezis)

KOULIBALY 5,5 – ‘A vacante i ‘a chiena cu quacche sfregazzo (sbavatura) ô pprincipio e ‘ncumpenso quacche bbona chiusura, ma cchiú ‘e ‘nu pasiglio  (passaggio) sbagliato ascenno.[dô 70' CHIRICHES[‘O Vampiro] 5,5 –Ce mettette ‘na pezza appena trasuto,però pur’isso facette quacche prano (errore) cu ‘o pallone ‘nfraê piere.]

LUPERTO 6  Cunfermato titulare, s’’a vedette cu sSalah e ttutto summato non sficuraje; salvaje pure ‘o tre a zzero  doppo pochi minute  cu ‘na bbella chiusura e nun capuisco pecché ‘o Jancone ‘o levaje [dô 46’ MARIO RUI 5,5 Accumminciaje bbunariello gestiunanno (gestendo)palla a mmancina; po mullaje enaje cu ‘o riesto d’’a cumbriccula.]  

ALLAN[‘O ‘Ncrifato] 6  Uno ‘e ll’urdeme a mmullà, cumbattette cumme a ‘nu lione ricuperanno pallune e prupunenno  juoco.

HAMSIK [Marekiaro] 5,5 ‘O capitano tentaje ‘e adderezzà ‘a varca aizanno ‘a capa pe mmannà ‘mporta ê cumpagne, affannannose pure a rricuperà quacche ppalla, ma po arretraje troppo ll’arcazzebbio (baricentro) nuosto. [dô 60' DIAWARA 5  Trasuto ô mumento meno prupizzio, perduto ‘mmiez’ô ‘mbruoglio d’’a ‘mbrugliata nun facette niente ‘e pusitivo o ‘mpurtante.]

FABIAN RUIZ [Anema Longa] 5,5  Ce mettette qualità, ma senza maje riuscí a llassà ‘o signo datose ca nun avette cullabburazziona. [dô 60' ROG 5 Nun trasette ‘nsibbacco ( nel match):currette e ccuntrastaje, ma se pigliaje pochi rrespunzabbilità.]

CALLEJON[Peppe ‘a ‘nguenta] 6,5  ‘o meglio lla ‘nnante, signaje pure n’addaffa (rete) reculare attaccanno ‘mprufunno, ma cumme v’aggiu ggià ditto chillu scurnacchiato d’arbitro ‘ngrese, ‘nzurfato dô signalinia, lle facette ‘o trave ‘e fuoco e ce ll’annullaje.

[dô 60' VERDI 6  Trasuto tarde i ô posto sbagliato (pe mme êss’avut’’a trasí primma i ô posto ‘e Lorenzigno ca aizaje porvera pe ttutta   ‘a mubbara (partita)], facette vedé quacche ccusarella:quacche azziona perzunale, ‘nu paro d’arcasie(punizioni), ma troppo poco cu ‘na mubbara  (partita) cumprumessa e ‘na scuatra manujatta (demoralizzata).]

MILIK 5,5  Facwette poco pecché cercato e sservuto poco;una palla avette e sfresaje ‘o sette. Apettammolo n’atu ppoco. [dô 60' INGLESE 5  Pur’isso poco cercato e ppoco ajutato se perdette lla ‘mmiezo.]

INSIGNE [Lorenzigno] 4 Me dispiace, ma aizaje porvera pe ttutt’’a primm’ora mantenennose sempe fora d’’o juoco e ssulo ‘nu paro ‘e vote mannaje ‘mporta a pPeppe ‘a ‘nguenta. Troppo poco ‘o tiro ‘nduvinato salvato dô purtiere Alisson(ne).

[dô 60' OUNAS 5,5  Facette coccosa cchiú ‘e Lorenzigno, ma ma fove rrobba seza zuco. Peccato]

All. ANCELOTTI [‘O Jancone] 4,5 Me dispiace, ma è responzabbile pur’isso d’’a scutuliata: à dda fà faticà ‘e cchiú a cchille ca tene e nun à dda dicere ca ‘a uarrada (rosa) è ccumpleta; à dda pretennere ‘nu granne purtiere e n’atu nassía (goleador) ‘e razza.

E ccu cchesto ve saluto e cce sentimmo, si dDi’ vo’, p’’o sibbacco (match)contr’ô bBorussia Dortmund(e) speranno ‘e nun fà n’ata fijura ‘e tre ssorde. Staveti bbe’. R.Bracale Brak