BRESCIA – NAPOLI 31.10.10 – LL’AGGIU VISTA ACCUSSÍ

BRESCIA – NAPOLI 31.10.10 –0 A 1 LL’AGGIU VISTA ACCUSSÍ

Alleluja, alleluja! S’è ffatto chello ca s’êva ‘a fà: ‘a juventússa è stata ancappata ô quarto posto. Ajere sott’ ô delluvio d’acqua, viento, tronnele e saette spuntaje Lavezzi a recalà tre punte ô Napule, ca s’ è cunfermato squatra ‘e fora casa... capace ‘e fà precipità ‘o Bbrescia dint’ ô fuosso d’ ‘a quinta scutuliata (sconfitta) cunzecutiva; mo pejo pe Iachini ca corre ‘azzardo (il rischio) d’esserne cacciato a cauce ‘nculo! Succedette tutto a ll’ulrdemo quarto d’ora, proprio mentre ‘e padrune ‘e casa stevano passanno ‘o mumento cchiú mmeglio e ‘e napulitane pareva ca stessero affannanno e suffrenno doppo ‘na partita tenuta sí sempe ‘mmano, ma senza ‘a cuncretezza nicissaria pe bbia ca ‘o trebbeto avanzato napulitano era troppo liggiero e vrucculuso (lezioso).’Ncuncrusione però ‘a vittoria napulitana è stata meritata e nun fa ‘na chieja, pure si ‘o Brescia, ca dê primmi minute jucaje ‘nchiuso a rriccio, era riuscito a criarse quacche palla-gollo,cuglienno pure ‘nu palo. Ma ‘a partita ‘a vence chi mena ‘a palla dinto. E Napule ‘o facette! E ppassammo a ddà ‘e ppaggelle ê prutaguniste:

DE SANCTIS 6.5 : Ajere fuje ‘nu muro! Sempe sicuro e attiento.Evidentemente ll’acqua e ‘o viento lle fanno bbene Salvaje ‘o risultato cu n’asciuta (ca nun è fforte sujo...) miraculosa.Attraverza ‘nu bbuonu mumento ‘e forma; s’ammeretasse ‘a nazzionale, ma m’accuntento ca joca bbuono ggioverí a Liverpullo!
GRAVA 6,5 : Dê pparte soje se vedette Eder e ‘o surdatiello nuosto ‘o contrullaje tranquillamente.
CANNAVARO P. 6 : Culo’echiummo turnaje a ffà ‘o centrale e ringrazzianno a dDio puttanate grosse nun ne facette; dê pparte soje jucaje Caracciolo, accunto (cliente)’ntruppecuso (scabroso) e ‘ntrucchiato(corpulento), ma culo’echiummo lle permettette sulo ‘na capata ca facette ‘a varva â traverza.
CAMPAGNARO 6.5 :Turnaje a essere ‘o jucatore ‘e classe ca mme piace a mme: quantità e qualità. Difennette e se cuncedette paricchie scavallate offenzive..
ZUNIGA 5.5: Croce e delizzia d’ ‘o Napule d’ajere... Alternaje quacche bbona ripartenza cu fessarie ‘a nuvellino. Aggio paura ca ‘o prubblema d’ ‘o Napule ‘e mo è proprio l’esterno ‘e dritta...
YEBDA 7 : l’algerino sta ‘ncrescita e se vedette. Cchiú sicuro ‘e se , facette sèntere ‘e muscole.Cumplessivamente ‘o meglio d’ ‘e napulitane e forze ‘o meglio ‘ncampo!
GARGANO 6: Meglio ‘e ll’urdimi vvote: forze ‘o turreno pesante ll’ajutaje,ma comunque ajere riuscette a affrancarse (riscattarsi) dâ brutta prova fatta contro ô Milanno.
DOSSENA 4,5 :’Nu strazzio! Cumpletamente miso sotto ‘a Berardi... Avesse azzeccato ‘nu crosso!
HAMSIK 6.5 : Êsse pututo fà ‘e cchiú, ma forze se vulette sparagnà pe ggioverí... Cumunque riuscette a ffà n’assisto capolavoro e risultaje mascese (utile) ‘mmiez’ô casino ‘e ll’affullato centrocampo.Risultaje ‘ncrescita rispetto â partita contro ô Milanno.
SOSA 6.5: ‘A stoffa ‘a tène e ajere dimustraje granne tecnica e granne voglia ‘e metterse ‘ncopp’ô tusiello (in mostra). Forze Mazzarri avesse farlo jucà ‘e cchiú, magari comm’esterno ‘e dritta o ‘e mancina, pe darle cchiú ppussibbilità ‘e fà vedé quanto vale...
(all’11 st. CAVANI) 6: non riuscette a a ffà cose ‘e pazze, ma servette a ddà piso a n’attacco troppo liggiero...Sperammo ca ggioverí riesce a essere assenziale (fondamentale)!
LAVEZZI 7,5 : ‘O Pocho pure ajere dimustraje ‘e attraverzà ‘nu mumento ‘e forma eccezziunale. A ‘stu mumento putesse fà pure ‘o terzino! Ah, si riuscesse a centrà ‘o specchio d’ ‘a porta quanno tira ‘a fora!... Fuje bravissimo e dicisivo a ccogliere l’assisto ‘e Marekiaro.
(al 43′ st. BLASI) s.v
MAZZARRI 5,5 Finalmente pare ca ll’à capito ca nun po’ fà jucà sempe ê stesse e se decidette a ffà ‘nu poco ‘e turnoverro, aspettanno ggioverí ‘e jí a Liverpullo, cu Cavani chiammato ‘ncausa sulo ô siconno tempo; ma pe mme nun ll’à ‘ncarrato tutto ‘o turnoverro: d’accordo pe Yebdà e Sosa, ma Zuniga proprio no: pe mme avesse ‘a avuto fà jucà Santacroce (o Cribari) cu Grava e culo’echiummo e spustà Campagnaro a ffà l’esterno ‘e dritta o ‘e mancina. Ma siccomme chi vence ave raggione, me sto’ zzzitto e nun ‘o critico cchiú.
ARB. VALERI 6 ‘Stu romano libbero professionista (nun se sape ‘e che...)’e trentaduje anne nun m’è mmaje piaciuto: troppo capuzziello e ffatto a rrecummannascoppole, ma ajere forze pecché faceva ‘o patapato ‘e ll’acqua, nun ce danniggiaje! E ppo, pure nun tenenno nè ‘o scartiello, nè ‘o bbauglio, ce porta bbuono...

 prossima.
Brak