MACCARUNCIELLE ‘NGALERA

MACCARUNCIELLE ‘NGALERA

chello ca serve pe seje perzone
p’ ‘a pasta
300 gramme ‘e farina janca,
150 gramme ‘e ‘nzogna,
ddoje ove,
tre cucchiare ‘e marzaletta,
cannella e ssale fino q.n.s.
p’ ‘a ‘mbuttunatura
600 gramme ‘e maccaruncielle,
100 gramme ‘e casecavallo doce tagliato a ffarinule piccerelle
50 gramme ‘e pecurino rattato finu fino,
‘nu bicchiere ‘e latte retunno,
150 gramme ‘e ricotta ‘e pecura passata a ssetaccio,
150 gramme ‘e prusutto cruro tagliato a farinule piccerelle
24 sciure ‘e cucuzzielle,
100 gramme ‘e pesielle piccerille frische o surgelate ammunnate e scuttate pe pochi minute dinto a ll’acqua salata,
½ bicchiere d’uoglio ‘auliva dunciglio,
‘nu spiculo d’aglio ammunnato ‘e ntretato,
tre ova,
50 gramme ‘e ‘nzogna,
sale duppio ‘na vrancata,
pepe niro mmacenato a ffrisco q.n.p.

comme se fa


Mettere ‘a farina a ffuntana ‘ncopp’a ll’asciuarro e rromperve a ccentro ddoje ove; agnadí ‘e 150 gramme ‘e ‘nzogna, ‘a marzaletta,’a cannella e ‘o ssale fino;cu ‘a ponta d’ ‘e ddete ‘mpastà tutto e faticà tutt’ ‘e ‘ngrediente nfi’ a uttené ‘nu ‘mpasto cumpatto. Farne ‘na palla, arravugliarla dinto a ‘nu panno e farla arrepusà pe trenta minute a ‘nu pizzo frisco. Àrvere ‘e maccaruncielle dinto a parecchia acqua salata (vrancata ‘e sale gruosso) scularle teniente teniente e revacarle dinto a ‘na zuppiera cauda. Agnadirve ‘a ‘nzogna, ‘o ccasocavallo,’o ppecurino, ‘e pesielle scuttate, ‘e ffarinule ‘e prusutto,’o llatte caudo, ddoje ova sbattute,’a ricotta e ‘o ppepe macenato a ffrisco; tuiglià a mmestiere pe quacche mminute;fraditanto dinto ‘a ‘na cazzarulella cu ll’uoglio e ‘o ttrigliato d’aglio fà marchittà ‘e sciure ‘e cucuzzielle; salà e ppepà. Stennere cu ‘o laganaturo ‘o ‘mpasto ‘ncopp’a ll’asciuarro e cu ‘na mmità ‘e ‘sta pettula fuderà ‘na prupurziunata cummedità verniciata ‘e ‘nzogna, facenne ascí ‘nu poco‘e pettula ‘a fora d’ ‘e bbabbuorde d’ ‘a cummedità. Régnere cu ‘e maccaruncielle cunnite e cu ‘e sciure ‘e cucuzzielle ‘a cummedità fuderata facennone ‘nu paro ‘e cusce; cummiglià ‘o timballo cu ‘o ‘mpasto rummaso stennuto cu ‘o laganaturo e spennellarlo cu n’uovo sbattuto; metterle dint’ô tiesto caudo a 220° e lassà cocere pe quaranta minute; Lassà arrepusà pe cinche minute, cacciarlo dô tiesto e servirlo tagliato a ffelle.
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
raffaele bracale