PARMA - NAPOLI (04/03/12) 1 A 2!LL’ AGGIU VISTA ACCUSSÍ

PARMA - NAPOLI (04/03/12) 1 A 2!
LL’ AGGIU VISTA ACCUSSÍ
Ajere guagliú s’êv’ ‘a vencere pe levarce ‘e paccare ‘a faccia ‘e ll’annata e pe cuntinuà tenenno sotto tiro ‘o terzo posto ‘ncampiunato. E ccomme vulette ‘o Cielo â fine vincettemo mettenno ‘nfila ‘a quarta vittoria cunzecutiva..., ma quanta sufferenza! Pecché ajere ‘o Napule me parette appannato e francamente ajere nun ce mmeretàvamo ‘e vencere, ma ll’arbitro e ‘a bbona sciorta ce dettero ‘na mana e ghiette a cciammiello accussí pecché ‘e tre ppunte ce servevano comm’ô ppane. Napule apprimma sfurtunato quanno perdette dduje difenzure ‘nfurtunate e ppo furtunato e menu male pecché, pe dicerla comm’è, cierti partite se venceno pure accussí,suffrenno e apprufittanno d’ ‘e fessarie ‘e ll’avverzarie e de ll’arbitro;del resto nun ce scurdammo ch’è stata ‘a juventus(sa) a ffà scola a tutta ll’Italia ch’è assaje meglio a vvencere jucanno malamente e ppure cu n’úrzo ‘e cóse nun visto, anzicché jucà bbuono e nun vencere essenno penalizzate ‘a ll’arbitro. Sulo chest'anno ‘o Napule avanza ‘a ll’arbitre ‘na cosa comme otto o diece punte... e ce vulimmo mettere a ffà ‘e sufistiche si ajere Valeri ce ne à dato ‘nu paro?Ma nun ce facite ridere! E a cchilli ca vulessero fà ‘e virgenielle sentimentale ("non mi piace vincere cosí'" e ati ccose ‘e chistu genere), lle suggerisco ‘e scrivere poesie d'ammore o jí a gguardà ‘e tramunte dô parco ‘a Rimembranza abbracciato cu ‘na bbella guagliona e lassà perdere ‘o pallone ca nun è ‘nu fatto sentimentale . Peccato ca ‘a Roma nun ce ‘a facette a stuppà ‘a Lazzio; pe furtuna ce riuscette ll’ Atalanta cu ll’Udinese.
Passammo ê ppaggelle
DE SANCTIS 5,5 Ô ssolito sbagliaje cchiú ‘e ‘na rimessa ‘e père e p’ ‘o fà ascí ll’êtter’ ‘a dà ‘o sfratto, a pparte ca êsse pututo fà coccosa ‘e cchiú ‘ncopp’ a ll’uno a uno fermanno ‘o pallone ‘mmece ‘e respingere; p’ ‘o riesto urdinaria amministrazzione.
GRAVA 6 Sfurtunato, fuje custretto a ascí pe ‘nfurtunio, nfi’ a cchillu mumento s’era cumpurtato a dduvere. (FERNANDEZ 6- Se perdette a Zaccardo ô mumento d’ ‘o pareggio. Facette ‘o ppussibbile ma suffrette ‘a velocità ‘e ll’attaccante ‘e casa.)
CANNAVARO 5,5 ‘A chiena e ‘a vacante: quacche cusarella bbona e cchiú ‘e ‘na fessaria...
BRITOS s.v. ‘A partita soja fernette doppo vinte minute pe ‘nfurtunio.
(CAMPAGNARO 6- Êsse pututo fà coccosa ‘e cchiú, ma fuje custretto a restà arreto mettenno ‘a musarola a Biabiany)
MAGGIO 5,5 Facette quacche cusarella sulo ô primmo tiempo, ô siconno sparette.
GARGANO 6 Partita urdinata e ssempe ‘e corza.
(INLER 6 Trasette a ‘nu mumento difficile facenno repiglià ‘o centrocampo. Servette a Llavezzi ‘na bbella palla p’ ‘o 3-1 ma ‘o Pocho ‘a sciupaje malamente menannola ‘ncopp’ô palo.)
DZEMAILI 5,5 Nun riuscette a furní ‘a stessa qualità vista contro a ll’Inter(re). Ê vvote me parette frasturnato.Forze ll’emuzzione ‘e turnà a Pparma.
DOSSENA 5,5 Copia cunforme ‘e Maggio.
HAMSIK 5 Assente ingiustificato. Mancaje tanto annante ca ‘ncupertura.
LAVEZZI 7 Ll’avesse miso miezu voto ‘e cchiú si nun se fósse magnato ‘a rredda d’ ‘o 3-1. Ma sta attraverzanno ‘nu granne periodo ‘e fromma.
CAVANI 6,5 Sbagliaje ‘o rigore ca s’era prucurato cu granna cazzimma, ma riuscette a ssignà ‘ncopp’â respinta... Po se facette apprezzà pe tantu sacrifiggio.

allenatore MAZZARRI 5,5 Nun priparaje a mmestiere ‘a partita prupunenno ‘nu juoco senza cegna e povero d’ idee; â fine cunfessaje parola pe pparola: " Oggi abbiamo ottenuto piú di quanto avremmo meritato, però questa partita fa il paio con quella dell'andata dove invece avremmo dovuto avere noi qualcosa in piú. Non mi è piaciuta la squadra, eravamo stanchi e poco lucidi, il Parma à giocato meglio e meritava un altro risultato"
l’arbitro VALERI 3: ‘Na granna fetenzia ll’arbitraggio ‘e ‘stu libbero prufessiunista (‘e che nun se sape...) rumano ca siscaje sempe, pe partito pigliato, contro ô Napule caputianno ‘e ffalte (i falli) e permettenno ê delinquente ducale è chiavà mazzate ‘a cecate specie ‘ncuollo ô Pocho senza vedé maje niente. Pe furtuna ca ce dètte ‘na bbona mana cunvalidanno ‘a rredda ‘e Lavezzi partuto chiaramente ‘nnúrzo ‘e cóse; ô primmo tiempo ‘mmece annullaje ‘na rredda a Ccavani ca aveva signato ‘ncopp’a ‘nu cruzzo ‘e Dossena ca ‘ncapa a isso e ‘ncapa ô signalinia steva ‘nnúrzo ‘e cóse.
Cunchiudenno dicimmo ca ajere ‘o Ciuccio ce facette suffrí e menu male ca ll'arbitro ce dètte n’ajuto... E fósse sempe accussí!Pecché chello ca conta è vvencere e nun ‘mporta comme. Punto e bbasta. Ce sentimmo.
Staveti bbe’!
R.Bracale Brak