JUVENTUS – NAPOLI (10.11.2.013) 3 A 0 ‘A VEDETTE ACCUSSÍ

JUVENTUS – NAPOLI (10.11.2.013) 3 A 0 ‘A VEDETTE ACCUSSÍ Mannaggia a cchello ca nun se po’ ddicere, guagliú! Chello ca nn’êva maje succedere, puntualmente succedette pure ajeressera!E,ssi nun me sbaglio fove ‘o terz’anno ‘e fila ca ce ne turnajemo ‘a Turino paccheriate! E cche saciccio!È overo ca jucavamo fora dâ casa, ma doppo ‘e chella cu ‘a Roma a rRoma êttem’ ‘a asseccà ‘a siconna scunfitta d’’o campiunato.E ce ‘a chiejaimo a llibbretta facennoce ‘ncasà ‘o cappiello dint’ê rrecchie e dànno via libbera â scuatra ‘e chillu spallettone (arrogante) ‘e parrucchino conte e facennoce bbluccà ô terzo posto )a vint’otto punte) addó se sente ‘ncopp’ô cuollo ‘o sciato d’’a scuatra d’’o chiagnazzaro... Mannaggia a cchello ca nun se po’ ddicere, guagliú! Ma me ll’aspettavo; quanno sapette ca ll’arbitro fósse stato Rocchi, me sentette ‘e correre ‘na cosa ggelata dint’ê rine e a ccunte fatte nun me sbagliaje!E nun me putevo sbaglià, pecché sulo chi sta ‘nmalafete po’ ddicere ca Rocchi nun è ‘na mezacazetta,’stu cummerciante (ma nun se sape ‘e che...) fiurentino ca ati vvote (parlo pressempio ‘e ‘nu san Zziro, contr’ô Milan(no))aveva ggià spezzato ‘e passe luvarde, e ca ajeressera aumentaje ‘a ddosa d’ ‘o ‘o debbeto ca tene cu nnuje e ffavurette sfacciatamente ‘a rubbentússa, cunvalidanno doppo ‘nu minuto e mmiezo ‘na rredda ‘e llorente signata ‘nnurzo ‘e cóse ( in fuorigioco) nun siscanno ‘nu paro ‘e sacrusante ricure a ffavore d’ ‘e cuane e cunzentenno, senza sanziunarlo a dduvere, ê mariuole cu ‘a maglia janca e nnera [ca sapevano ca a lloro tutto fósse cunzentito] ‘nu juoco viulento e ammagagnato (duro), caputianno ‘e falte [comme quanno a ll’arrancua(ripresa) cu ‘o Napule ca attaccava pe pariggià, rennènnose periculuso, isso cuputaje ‘na falta (un fallo) ‘e Vidàllo ‘ncuollo a Inlèrro e assignaje â juve ‘a punizzione ca pirlo signaje nchiudenno ‘o fullé ] e sventaglianno sotto ô naso d’ ‘e cuane cartelline jalizze e pigliannosela soprattutto cu ‘e nuoste (ca si sulo guardavano stuorto a ‘nu juventino, isso siscava ‘na punizione...) e lassanno correre quase tutte ‘e ccarugnate janche e nnere , cacciannone fora uno sulo addó ca tre o quatto, accumincianno ‘a pirlo, se fósseno mmeretate d’essere pigliate a ccarocchie, pe quanto foveno overo delinquente! E cchiste ch’aggiu elencato [po ve dico ‘o riesto] so’ sulo ‘nu pare d’assempio d’’e fetenzie ca ce facette Rocchi ca ‘nzomma ajeressera facette paricchi fullune sempe ‘ndanno d’ ‘e cuane, dimustrannose arbitro senza attenziona e chiaramente ‘ncopp’ô stato paca d’Agnelli.Ma cu cchi t’ ‘a piglie?Cu cchi?Ce ll’âmm’’a piglià sulo cu DeLa ca s’êsse ‘a mettere a ffaticà p’addiventà quaccuno dint’ô Palazzo (addó nsi’ a mmo conta quanto ‘o doje ‘e coppe a bbriscula [quanno però ‘o triunfo è a mmazze]) ca si no ‘o Napule nun po’ ffà maje niente e vvene trattato sempe comm’ ô figlio d’’a criata (serva)! Passammo ê ppaggelle: REINA 6,5 Nun tenette nisciuna sfarma ‘ncopp’a ttutt’ ‘e ttre rredde juventine, anze ô pprincipio ‘e fullé levaje ‘a dint’ô sette ‘nu tiro, me parette, ‘e pogbà e doppo d’’a rredda ‘e llorente facette ‘nu miraculo pe ffermà ‘na cabbasèra (colpo di testa) ‘e Bonucci ‘a pochi passe, tenenno ‘nfullé ‘e suĵe. N’atu miezu miraculo ‘o facette a ll’arrancua(ripresa) ‘ncuollo aTevèzzo. MAGGIO 5,5 ‘Ntiuria se facette surprennere ‘a llorente, ma ‘mprattica ‘o mettette‘nnurzo ‘e cóse ( in fuorigioco) ca però nun fove nè visto, nè signalato. Tutto summato, pure pecché avette ‘na mano ‘a Cagliecònno, tenette meglio dâ parta soja a ppietto (rispetto) d‘Armero. FERNANDEZ 6 Nun tenette nisciuna respunzabbilità ‘ncoopp’ê rredde e sse nne pigliaje cchiú ‘e una ‘nfase ‘e plantamiento (impostazione) e spisso arrivaje nsi’ â trecquarte e quacche vvota dint’â camma juventina, ma [che ppeccato!] nun truvaje ‘a cunchiusione forte e ppricisa. ALBIOL 6- ‘Nu sfregazzo (sbavatura) sulo quanno, pigliato ncontropiete, cadette ciapucerianno (goffamente) e vvidàllo ‘a duje passe mannaje fora! ARMERO 5- Faticaje ô pprincipio ‘e fullé, ma dê pparte soje ‘a juve sfunnaje facilmente. ‘Nu poco meglio a ll’arrancua(ripresa) quanno se pigliaje cchiú respunzabbilità scennenno palla ô pere, ma senza maje cu cqualità dinto a ll’urdemu pasiglio (passaggio). INLER 5,5 Penalizzato ‘a ll’ arbitro ca lle siscaje contro pure ‘na guardata storta, nun riuscette a essere lione e a ffà valé ‘o fisico suĵo. (dô 79° ZAPATA sv) BEHRAMI 5 Jurnata no ‘e Valònno ca lassato troppo sulo e accerchiato ‘a troppi juventini nun riuscette a ppruteggere a dduvere (porta ‘ncopp’â cuscienza ‘a rredda ‘e pogbà) ‘a difesa e s’’a vedette sporca. CALLEJON 5,5 Dètte quacche ajuto a mMaggio ca cumminfatte sufferette meno d’Armero.’Nfase uffenziva però nun riuscette a llibberarse d’’a difesa juventina ca ‘o mettette ‘a musarola;a ll’arrancua(ripresa) s’avasciaje a ddà ‘na mana ê duje mediane. (dô 71° MERTENS 6 Trasette bbuono ‘nfullé cupulianno (dialogando)a mmestiere ‘ncopp’â fascia ‘e dritta. Custrignette a Ogbonna ô sicondo cartellino jalizzo(giallo)) Hamsik 4 Dduje passe arreto a ppietto d’’a vota passata: aizaje troppa porvera currenno a vvacante e nun riuscenno maje a ffà chello ca sape e êsse avut’’a fà: ajude (assist) e/o rredde Sprecaje ll'accasione d’’o pareggio e pp’’o riesto fove sempe ‘nritardo... E che saciccio! I’ ll’êsse sustituito cu Dzemailí, ch’êsse pututo dà ‘na mano a mmità ccampo e êsse pituto pruvà ‘o tiro ‘a fora. INSIGNE 6,5 Fove ‘o cchiú periculoso d’’e suoje; mancaje ‘e poco ‘a rredda cu ‘nu tiro a ggiro d’’e suoje, mentre a ll’arrancua (ripresa) truvaje ‘a respinta ‘e Buffònno. HIGUAIN 6- Fullé difficile p’’o Pipita, troppo sulo e nchiuso dint’â morza d’’e centrali juventine.Avette ‘na sola palla ‘a jucà durante ô primmo ajone, ‘a difennette, se ggiraje bbuono libberannose ‘e Ogbonna, ma nun truvaje ‘a porta! BENITEZ 5,5 Comme quanno se vence ave raggione isso, accussí quanno se perde quacche sfarma (colpa) è ppure d’’a soja; è overo ca ‘o fullé se mettette subbeto ‘nsagliuta cu cchella rredda ‘nnurzo ‘e cóse (fuorigioco), ma ‘o Napule cu dduje sule mediane e cu ‘nu Marekiaro a miezu servizzio evidenziaje mancanza ‘e perzunalità arresecanno assaje; pe mme s’êsse avuto rinfurzà ‘o centrocampo dànno spazzio pure a dDzemaili o a rRadoseviccio e ffacenno arrepusà a cCalgliecònno o a mMarekiaro ca nun me paretteno a ll’arriba (al top).Don Rafele po à dda sturià quacche ata soluzziona pe scardinà ‘e ddifese arruccate e schierate. ll’arbitro ROCCHI 3 E ll’aggiu trattato! Doppo chelli ggià détte, cuntinuammo ll’elenco d’’e fetenzie ca ce facette Rocchi:1° pronti via e llorente signaje ‘nnurzo ‘e cóse (in fuorigioco). Passajeno diece minute e nun vedette ca Bonucci, fermato cu ‘nu miraculo ‘a Reina se truvava pur’isso nnurzo’e cóse (in fuorigioco) e ca Isla ca aveva fatto ‘o cruzzo (cross) isso pure steva ‘mpusizziona irregulare.Ma ch’arbitro sî si nun vide niente,eh?! 16° Rocchi nun siscaje ‘nu ricore a ffavore d’Higuaínno maltrattato ‘a Bonucci trasuto ‘nritardo, mentre Buffònno ascenno êva bluccato ‘o pallone; i’ mo dico: nun t’’a siente ‘e dà ‘o ricore, ma allimmeno a bBonucci ll’hê ‘a cazzià malamente... e ‘mmece isso zitto e mmuto! Jammo annante: 28°: pogbà, futtennose a cCragnotto, se menaje ‘nterra dint’â camma napulitana ma pe ll’arbitro nun fove simulazziona, lassaje correre e ‘o francese se sparagnaje n'ammunizziona. 42° dint’â camma juventina Ogbonna primma trattenette a hHiguaínno e ppo ‘o menaje ‘nterra. Manco ‘sta vota Rocchi s’ ‘a sentette ‘e dà ‘o ricore e, caputianno ‘a facenna assignaje ‘na punizziona a ffovore d’’a juve! Ma addó ll’hê vista ‘a trattenuta d’Higuaínno ca nun tuccaje pe nniente ô jucatore juventino. Cose ‘e pazze! ‘O primmo ajone fenette cu ‘e ppruteste ‘e conte ca nun venette sanziunato; nè se capisce che ca**o jeva ascianno, ‘o parrucchino! Parte ll’arrancua e ppe diece minute niente ‘a signalà nsi’ a ‘na falta (a ppalla luntana) ‘ncuollo a Insigne ‘e Bonucci ca vene sulo ammunito ‘mmece d’essere jettato fora comme fósse stato justo visto chello ch’era succieso ô 16° ! Prosecuimmo:dinto a ppochi minute ll'arbitro siscaje tre vvote contr’ô Napule e tutt’ e ttre vvote ‘o ffacette a spruposito: Insigne anticipaje pulito pulito a ttevèzzo,e ll’arbitro l siscaje falta contro ô cuano; Insigne da dereto,senza tuccà ô jucatore juventino sradecaje ‘o pallone dê piere ‘e Isla ll’arbitro siscaje punizziona a ffavore d’’a juve; Pirlo dint’â camma napulitana cadette ‘nterra svenuto, pe ca**e d’’e suĵe e ll’arbitro siscaje n’ ata punizziona a ffavore d’’a juve anzicché ammuní ‘o nnacchennello juventino ca doppo poco (era ‘o 63°) cercaje ‘e trattené abbrazzannolo a hHiguaínno ca cuntinuaje a ccorrere; se trattaje ‘e ‘na falta tattica,ca s’êsse avuto ‘a sanziunà, ma Rocchi lasaje correre;65°ammunizzione ‘e Marekiaro p’ ‘a stessa identica falta fatta ‘a Pirlo: dduje pise e ddoje mesure! 70° ‘ncamma juventina guveto troppo auto d’Isla ‘ncuollo a Armero.... e ll’arbitro manco p’’a capa! 74° Trasuta assassina ‘e Vidàllo‘ncuollo a Armero ca furtunatamente l’esterno cuano riuscette a evità pe repartí ‘ncontropiete,ma Rocchi siscaje ‘o juoco periculoso, ed ammunette ‘o cileno, ma se scurdaje, ‘ndanno d’’e cuane, ‘a sunna (regola) d’’o vantaggio... ‘Nzomma, pe nun farla longa, ‘o fullé fove miso ‘ncopp’a ‘nu bbinario sbagliato dô primmo minuto e ‘e cuane foveno custrette a gghiucà unnece (nuje) contro a ddudece (lloro) e è ttosta quanno ‘o dudicesimo tene ‘a maglia jalizza (gialla) e ‘o sisco ‘mmocca! Ajere sera, pe cunchiurere, fove rappresentato ‘o peggio scheccio (spot pubblicitario) p’’o pallone tagliano cu ‘a rappresentazziona ‘e ‘na sceneggiata ca se sapeva addó jeva a ffení! E sse sapeva ca chi ce avesseno refuso fósseno state n’ommo(DeLa, ca ce mette ‘e denare), ‘na citta (Napule, ca ce crede) e ‘o fècato mio ca à dda cumbattere pure cu cchi nun ce vo’ credere ca ‘a juve s’accatta ll’arbitre e ca supporta ‘e perdere cu chiuncue, ma no cu ‘a scuatra savoiarda ! E mmo ca ce âmmu sciso st’ atu pinnulo, mettimmo punto e a ccapo, nun ce avvelimmo, penzammo ca sulo chi cade se po’ ssossere,e dàmmoce appuntamento p’’a prossima vota, sempe si dDi’ vo’! Staveti bbe’! R.Bracale Brak