PARMA – NAPOLI (6.04.14) 1 – 0 ‘A VEDETTE ACCUSSí

PARMA – NAPOLI (6.04.14) 1 – 0 ‘A VEDETTE ACCUSSí E cche saciccio! I’ nun ce pozzo credere.... eppure fove accussí: ‘o Napule tra andata e rritorno rijalaje tutte ‘e sseje ‘e punte dispunibbile â scuatra ducale... Cose ‘e pazze! E cchi se ll’êsse aspettato ca ajeressera a pParma ‘o Ciuccio ll’êsse pigliate ‘ncopp’ê rrecchie? Doppo d’’a bbella nichessa (vittoria) ‘e sette juorne primma contr’â juventússa ô san Paolo me credevo ca ‘o Napule n’êsse fatto carna pe ppurpette d’’a scuatra ‘e Donadoni... Ma chi t’’o dà?! Addó? Ajeressera succedette ‘o llutto e doppo scarza n’ora ‘e n’atalossa (prestazione) acrumatica (incolore), ‘nzipeta e ssenza zuco ‘o Napule ce refunnette ‘e ppenne e ô prazzo (alla fine) d’’a jurnata se truvaje a ddudice punte dâ Roma levànnose definitivamente ll’illusione ‘e puté arrivà ô siconno posto. E cche saciccio! I’ nun ce pozzo credere.... eppure fove accussí: ‘o Napule nun se ‘mparaje niente dô fullé ‘e ll’andata... Se sapeva ca ‘o Parma avesse jucato cu ddiece crestiane arret’â linia d’’a palla e avesse tentato ‘a carta d’’o contropiede..., ma don Rafele (4), me dispiace pe isso, nun riuscette a ttruvà ‘o sistema pe nne vení a ccapo e ‘mmece ‘e fà jucà dô primmo minuto a Mertenso, ll’unico capace ‘e mettere ‘ndifficultà ‘a tràsera (difesa) ducale facette jucà a Insigne, comme facette jucà a mMarekiaro ca pe troppu tiempo aizajeno porvera, senza maje cercà ‘a porta o mettere ‘mmiezo ‘nu pallone decente. ‘O riesto po ‘o ffacette ll’arbitro Bergonzi ca si cecaje bbuono a vvedé annullanno a fFernandèzzo ‘na rredda signata partenno ‘nnurzo’ecóse (fuorigioco), po nun vulette cecà a vvedé ca Marekiaro, ‘ncopp’ô zzero a zzero, fove stiso ‘nterra appena trasuto dint’â camma ‘e ricore ducale ‘a ‘nu pierepetterra ca nun me ricordo..., comme nun vulette cecà a vvedé ca, doppo ll’uno a zzero, Zapata, trasuto ô posto d’’o Pipita, fove tirato ‘nterra pe ‘nu pere ‘a Mirante. ‘Nzomma nun ce dètte no uno, ma dduje ricure... e i’ nun ce avesse sputato ‘ncoppo a ‘nu pareggio pigliato p’’e rrecchie...cu ‘nu ricore! Ma nun ghette accussí e ppacienza! Mo avesse mettere ‘e ppaggelle, ma sto’ troppo ‘ncazzato e ddeluso pe mmetterme a scartà ‘e tuoste ‘mmieze ‘e musce; mecco quatto (4) a ttutte quante e ttre (3) a Insigne e mMarekiaro ca, comme aggiu ditto, aizajeno troppa porvera e a ll’arbitro BERGONZI ca fove ‘na meza cazetta comme ô riesto ‘e tutte ll’arbitre italiane e, pe gghionta ‘e ruotolo,oltre chello ca aggiu ditto, se purtaje ancòra appriesso ‘o pisemo d’ ‘e critiche ca avette p’’e duje ricure date ô Napule (tempurata 2007/2008) contro â juventússa; ‘a tanno, quanno arbitra ‘o Napule, pe fa vedé ca nun stà abbaccato cu ‘e cuane, lle sisca sempe contro e ‘nzerra tutte ‘e dduje ll’uocchie cunzentenno(senza piglià pruvvedimente) a ll’avverzarie d’ ‘o Napule ‘e ppeggio fetenzie;e cchesto succedette puntualmente ajeressera,ca primma ‘e tirà fora ‘nu cartellino jalizzo (giallo) ‘nfaccia a ‘nu ducale, ce penzaje diece vote ‘a coppa e ppo nun ‘o cacciaje… Purtroppo tutte ll’arbitre italiane so’ meze-cazette e ce avimmo ‘a tené ‘a posta visto ca Dela dint’ô Palazzo nun è nnisciuno e ‘o Napule po’ essere trattato ‘na chiaveca ‘a ll’arbitre e ‘o presidente ‘mmece ‘e ‘ncazzarse cu ‘e tifuse ca ‘o cuntestano, s’êss’ ‘a fà sèntere cu cchi ‘e duvere e s’êss’ ‘a decidere a addivintà quaccuno addó mo conta quanto ‘o doje ‘e coppe a bbriscula quanno ‘o triunfo è a mmazze! E cu cchesto ve saluto e si dDi’ vo’ ce sentimmo ‘a prossima vota , speranno ca, doppo d’’o fullé cu ‘a Lazio [n’atu bbrutto accunto] ve pozzo cuntà bbelli ccose!Accussí sperammo. Staveti be’. R.Bracale Brak